Albistea entzun

ATZEKOZ AURRERA. Vicent Aleixandre eta Irina Dragomir. L'Aurora erakundeko kideak

«Mediterraneoko egoera aldatu arte, guk bertan jarraituko dugu»

Mediterraneo itsasoan salbamendu lanetan aritzen diren ontziak Burrianako portura joaten dira mantentze lanak eta konponketak egitera. Han sortu dute boluntarioek L'Aurora Grup de Suport.
MONIKA DEL VALLE / FOKU Tamaina handiagoan ikusi

Olatz Silva Rodrigo -

2022ko urriak 13 - Bilbo

2018an, Open Arms itsasontzia Burrianako (Castello, Herri Katalanak) portu txikira heldu zen, eta gizarte mugimenduetako jendea laguntzera joan zen. Ontzitegia dago han, konponketak egiteko. Horren ostean, Mediterraneora erreskate lanetara zihoazen itsasontzi gehiago heldu ziren, hainbat herrialdetakoak. Boluntario taldea indarra hartuz joan zen, eta 2021ean estatutuak erregistratu zituzten, eta L'Aurora Grup de Suport sortu. Ehun bat boluntariok osatzen dute L'Aurora, eta Irina Dragomir (Buzau, Errumania, 1981) eta Vicent Aleixandre (Valentzia, 1978) dira bozeramaileak. Iruñeko Katakrak argitaletxearekin eta Irungo Harrera Sarearekin dute harremana. Joan den astean, Basauriko (Bizkaia) Txarraska gaztetxean aurkeztu zuten proiektua.

Zein da zuen eginkizun nagusia?

IRINA DRAGOMIR: Ontziak mantentzeaz gain, denetarik egiten dugu, hala nola tripulazioko pertsonak ostatuarekin lagundu edo medikuarengana joan.

VICENT ALEIXANDRE: Hasieran, gizarteko sektore batzuen gaitzespena izan genuen. Eskuin muturraren presentzia dago han, eta gorantz doa Voxekin. Haien diskurtsoen aurka egiteko, aliantza sortu dugu tokiko saltokiekin, zuzenean itsasontzietan zerbitzatu dezaten. Herritarrek proiektuari buruz ondo hitz egiten dutenez, gure lana kriminalizatzen saiatzen direnek presioa jaitsi dute.

Zergatik ailegatzen dira hainbeste itsasontzi Burrianako portura?

ALEIXANDRE: Portuak ez du portu agintaritza propiorik, eta ez du kontrolik sartzeko eta irteteko. Gainera, inguruan sortu diren laguntza sareek oso erakargarria egiten dute. GKE guztiek leku berean bat egiten duten lehen aldia da.

Ikasketa eta Sentsibilizazio Zentroa sortu duzue. Zertarako?

ALEIXANDRE: Hezkuntza komunitatearentzat egindako tresna da, itsasontziek egiten dutena ezagutarazteko dinamikak sortzeko. Gorroto diskurtsoa nagusitzen ari da gizartean, batez ere gazteengan. Diskurtso horri aurre egin behar zaio.

Beste proiektu batzuk badituzue?

DRAGOMIR: Artistas al rescat proiektua. Valentziako hainbat artistak ekarpena egin nahi izan dute, eta lamina bat eman digute dohaintzan. Bizikletekin beste proiektu bat daukagu. Ontziak iristen direnean, bizikleta batzuk jartzen ditugu haien eskura, herrian mugitzeko.

Zer eragin du honek guztiak tokiko ekonomian?

ALEIXANDRE: Bi urtean, ontzitegiaren enpresaren langile kopurua bikoiztu egin da. Italian kontrolak egiten dituzte ontziek nabigatu ez dezaten, autoaren IAT kontrolaren antzekoak. Konponketak egitera behartzen dituzte, baina Italiak ez die uzten ontziei bere portuetan konponketak egiten. Horregatik, gure herrira etorri behar dute.

Zer harrera dauka taldeak Burrianan?

DRAGOMIR: Batez ere, gu gara hor gaudenak. Gure maitasuna ematen diegu, iristen direnean etxean egongo balira bezala egon daitezen.

ALEIXANDRE: Baina herriak ez du oso harrera ona egin. Gehienei berdin zaie, eta badago gure kontra egin nahi duen jendea; adibidez, Vox.

Zer harreman duzue agintariekin?

ALEIXANDRE: Ahalik eta inplikaziorik txikiena daukagu politikariekin, badakigulako politikari bati fabore bat eskatuz gero zerbait eskatuko digula bueltan. Hauteskundeak datoz, eta politikariak etorri dira proiektua ikustera. Urriaren 15etik aurrera argazkietan ateratzera etortzen den politikariak uretan amaituko du. Ez dugu gure proiektua manipulatzerik nahi.

Nola ikusten duzue etorkizuna?

ALEIXANDRE: Ez dut uste aldaketarik egongo denik. Gure sistema osoa aldatu beharko litzateke, eta herrialde horiek agortzeari utzi, baina kapitalismoak ez du onartuko. Jende asko itsasoan hiltzen da, baina jende gehiagok galtzen du bizia basamortuan, edo pertsonen salerosketan sartuta dago. Hor egon beharko genuke, baina Europak ez du ezer egin nahi. Europak bere enpresek haien lurretan negozioak sortzen jarraitzea besterik ez du nahi.

Egoera okertu daiteke Italiaren gobernu berriarekin?

ALEIXANDRE: Aurreikusi genezakeen hauteskundeetako emaitza. Salvini barne ministro izan zenean, pertsonak kriminalizatzen saiatu zen, baina Poliziak prozesu judizialak egin zituen haren aurka. Italiak erreskatatutako jendea itsasoan mantentzen du, portu segurua esleitu gabe. Tentsio egoerak sortzen dira ontzian. Pertsona batzuek lau miliatara dagoen lurra ikusten dute eta salto egiten dute igerian joateko. Europako auzitegiek diote Italiak ezin duela hori egin, eta egiten jarraitzen du. Egoera aldatu arte, guk bertan jarraituko dugu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©OIER ARANZABAL

«Audio plataforma bat sortuko dugu datozen hilabeteetan»

Urtzi Urkizu

Ikus-entzunezkoetarako Primeran iritsiko den moduan, irrati eta audioetarako beste plataforma bat sortuko dute, Goñik iragarri duenez. «Kolaborazioak sustatuko ditugu euskalgintzarekin».
 ©JAIZKI FONTANEDA / FOKU

«Guztiok gatoz leku beretik: guztiok gara afrikarrak»

Unai Etxenausia

'Geu, afrikarrok' aurkeztu du Arrosagaraik, zenbait gazteren istorioak biltzen dituen erakusketa bat, Gasteizko Montehermoso kulturunean. Otsailaren 26ra arte egongo da ikusgai.
Madrilgo komentu batean

'Marten' hegaldia

Enekoitz Telleria Sarriegi

Francoren erregimenak, Eliza katolikoarekin batera eta Australiako Gobernuarekin tratua eginda, ehunka euskal emakumezko bidali zituen Australiara, 1960ko hamarkadan. Han lana eginaraztea eta aurretik hara bidalitako gizonezkoekin ezkonaraztea zen bidaia haien benetako helburua. 'Marta plana' deitu zioten, eta 'El avión de las novias' dokumentalean jaso dute.

«Misiolari gisa bidali nahi gaituzte»

«Misiolari gisa bidali nahi gaituzte»

Enekoitz Telleria Sarriegi

Natalia Ortiz ikerlariak, besteak beste, Josefina Erezuma bizkaitarraren istorioa jaso du bere ikerketan, Jaime Aberasturi senargaiarekin izan zuen eskutitz trukearen bidez.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Olatz Silva Rodrigo

Informazio osagarria

Iruzkinak kargatzen...