Albistea entzun

Lehengo lantegi bat, kulturgune bat egiteko

Mauleko Zinka ostatuaren gibeleko lehengo fabrika erortzekotan zen; alta, baziren urteak Kutx Ala Pil elkarteak zuberotarrei eman nahi ziela. Azkenean, Etxalde elkartea jabetuko da hartaz, eta gune kulturala sortu nahi dutenen esku utziko du.
Mauleko Zinka ostatuaren gibeleko usina, urtarrilaren 15ean, ohiko obretan.
Mauleko Zinka ostatuaren gibeleko usina, urtarrilaren 15ean, ohiko obretan. GUILLAUME FAUVEAU Tamaina handiagoan ikusi

Joanes Etxebarria - Ipar Euskal Herriko Hitza

2022ko otsailak 5

Mauleko Zinka ostatuaren eta eraikin berean diren apartamentuen jabe da Etxalde elkartea. Eraikin horren gibeleko partean gordetzen den lehengo usina edo fabrikaren jabea, berriz, Baionako Kutx Ala Pil elkartea da; badira hamarkadak gunea hutsik dela eta jabeek Zuberoako elkarteei euro sinboliko baten truk proposatzen dietela, baina egin beharreko lanek beldurra eragiten zuten. Badira aste batzuk orain, hamar bat laguneko taldea astez aste obrak egiten ari dela.

Prentsan jadanik aipatu bada ere, ez da deus finkatua. Jabea Kutx Ala Pil elkartea da oraino, eta barneko antolaketaz gogoetan ari dira zenbait partaide: Etxalde elkartea, Zinka ostatuko kideak, gaztetxe bat egin nahi luketenak, Xiberoots taldea eta entsegu gela bat nahi lukeen dantza taldea. Gogoetan eta obretan, bietan ari dira aldi berean, lan batzuk presaka egin behar baitziren.

900 metro koadroko eraikina publikoari itxia izan da azken urteetan, «lanjera» iragartzen zuten afixa batzuk iltzatuak zirela ate nagusian. «Lehen galdera zen eraikina hartu behar genuenetz edo utzi lurrera erortzera, abiatua zen bezala», oroitzen du Beñat Etxebestek, Etxalde elkarteko kideak, 2021eko apirilean hasi gogoetaren berri ematean. Zinka ostatuko Joel Arla ere hastapenetik ari da xede horretan: «Gero joanen gara instituzioengana, zeren dirua problema bat izanen da. Hor, obrak badira, baina, gero, dena hutsa da barnean», dio. Zinkak logela kolektibo bat plantan ezarri nahi luke, besteak beste Hego Euskal Herriko taldeak baldintza onetan errezibitzeko.

Gaztetxe baten mentura

Hamar bat dira asteburuez lanera doazenak; horietan, kuriositatez hurbildu ziren gazteak azkenean espazio bat irekitzen ari dira gaztetxe bat egiteko menturan. Argi Uthurriaga lagun batzuekin agertu zen hasieran, «laguntzera»: «Aipatu zuten gaztetxearentzako egoitza bat izaten ahal dela; beraz, han ginenak interesatuak ginen, baina anitz aipatu gabe, ez baikara deusez segur oraino». Ez dira formalki bildu; elkarte gisa antolatuko dira lehenik,

Uthurriagak erran duenez: «Biltzar nagusiaren ondotik interesatuak diren oro gomitatuko ditugu. Haboro izanen garelarik, egiazki lanean hasiko gara, zinez gaztetxearen izenean».

Gaztetxe bakoitzak bere historia, egiteko manera eta antolaketa baditu ere, Donapaleukoa adibide bat izan daiteke zuberotarrentzat, Joel Arlaren ustez: «Duela zenbait urte Donapaleun gaztetxe bat ukan genuen, eta Amikuzeko Herri Elkargoak pagatzen zituen alokairua, ura, argindarra... Orain Euskal Elkargoak pagatzen du».

Gaztetxea nahi dutenek bezala, kudeaketaz interesatuak diren beste taldeek ere argi dute instituzioengana joko dutela aitzinago, diru laguntza eske. Oraingoz, obrak aitzinatzeko behar diren materialentzat adibidez, diru bilketa bat abiatu du Etxalde elkarteak Interneten. Lehentasuna gaztetxean ezarri dute, baina, Etxebestek esplikatu duenez, «normak oro errespetatuz» irekiko dute, eta, horretarako, profesional batzuen lana ezinbestekoa da. Horretarako ere gastuak izan dira, bistakoa denez. Haien esku dena, berriz, haiek egiteko xedea dutela dio Etxaldeko kideak: «Bada autonomia ideia bat ere, obrak egiten ikasten baita hemen».

Bakoitzak berea, taldean

Barne antolaketarako egituratzen ari diren arren, interesatuak direnek beren xokoa antolatzeko planak badituzte: Zinkak, logela; Xiberoots taldeak, entsegu gela berria eta grabaketa estudioa; dantza entseguetarako gunea, eta gaztetxea. Etxaldek jabegoa hartuko duelarik, gastuak partaideen artean banatzea da ideia, Etxebestek dioenez: «Ez da alokairu bat. Kalkulatu dugu zergak eta asurantzak 2.000 euro direla urtean; horien berreskuratzea galdetzen dugu».

Etxalde elkarteko kideak beste xede bat ere badu epe luzeagoan: gune bat erostea. «Berantago, ontsa litzateke elkarte horrek bil dezan sos beste gune bat erosteko Zuberoan edo Euskal Herrian, Etxalde elkartearen logikan»dio, eraikinen jabegoa eta gozamena bereiziz.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

 ©Gorka Rubio / FOKU

«Arima pixka bat falta da orain, bai unibertsitatean eta bai hedabideetan»

Unai Zubeldia - Gipuzkoako Hitza

Bokazioz irakaslea dela aitortu du Joxerra Garziak, baina lan asko egindakoa da bai bertsolaritzan eta bai komunikabideetan. Erretiroa hartuta ere, ikastaroak eman eta eman ari da oraindik.

Herritar ugarik produktuz beteriko poltsak utzi dizkiete Elikagai Bankuko boluntarioei. ©JAIZKI FONTANEDA / FOKU

Elkartasunez bete dira orgak

Aitor Biain

Hego Euskal Herriko Elikagai Bankuek bilketa nagusia egin dute, urtero bezala. Ehunka tona elikagai eta oinarrizko produktu bildu dituzte dendetan eta supermerkatuetan.
 ©IÑIGO URIZ / FOKU

«Trantsizioa egitea, nola esan... zoriontasun eztanda bat da»

Iker Tubia

Gorputza estaltzen duten babesetan gordetzen da Gomez izotz hockeyan aritzeko. Ia bizi osoan gorde behar izan du emakume zela, baina orain ez du ezkutatzen. Partida hor dago oraindik.
Gazte Euskaltzaleen Sarekoek protesta egin zuten EITBren Bilboko egoitza aurrean, azaroaren 16an. ©KLAK

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.