Amaia Garcia.
EKOGRAFIAK

Alkoholismoa

2023ko apirilaren 25a
00:00
Entzun
Gizartean alkohola normalizatua dago. Sozializatzeko egoera askotan alkohola presente dago, eta alkoholarekin arazoak dituzten pertsonek zaila izaten dute droga hori alde batera uztea eta bere inguruko pertsonekin erlazioak mantentzea. Horren adibidea da Single Drunk Female (Disney Plus) telesaila. Bertan, Samantha da protagonista. New Yorken bizi da, eta lanera ia egunero mozkor doa. Bere nagusiarekin arazo bat izan ostean, hiri handitik joan behar du, eta kartzela ekiditeko aukera bakarra amaren etxera itzultzea da.

Alkoholarekin dituen arazoen artean, bere aitaren heriotzaren dolua dago. Amaren etxera itzultzen denean, bere traumak aurkituko ditu. Besteak beste, bere lagun minari egindako kalteak konpondu beharko ditu, eta beste lagun batekin erlazionatzeko modua aldatu beharko du. Lagun horrekin festa giroan egoten da beti, eta alkohola edateko arriskua du berarekin. Samanthak bere buruari mugak jarri behar dizkio eta bere inguruak muga horiek ulertu behar ditu. Bere iraganeko mamuak gertu ditu, eta New Yorken bizi zuena ahaztua badu ere, batzuetan berriro gogoratzen du. Horretarako laguntza izango du, alkoholikoen elkarte baten laguntzaren bitarte. Bertan, bere egoeran dauden pertsonak ezagutuko ditu.

Telesail horrek gizartean alkoholak duen presentzia erakusten digu. Kapitulu batean San Patrizio egunaren ospakizunak ikusten dira. Egun horretan, Samanthak eta elkartean ezagutu diren pertsonak, alkohola saihesteko zailtasunak ikusiko ditugu. Bakoitzak estrategia desberdinak izango ditu bere helburua lortzeko. Samantha bakarrik sentituko da egun horretan. Bere lagun mina bere ezkontzarako soinekoa bilatzen ari da beste lagun batzuekin, eta bere beste lagunak festan daude. Egun horretan denek trago bat dute eskuan, eta berak egoera hori ekiditeko traba guztiak gainditzeko bideak bat batean aurkituko ditu.

Guztioi gustatzen zaigu lagunen artean gaudenean edatea, eta batzuetan norbaitek alkoholik gabeko zerbait eskatzen badu, arraro egiten zaigu. Telesaila ikusterakoan, AEBetan gertatzen dena hemen antzeko gertatzen dela argi dut. Alkoholarekin arazoa duten pertsonek babes gutxi dute gure gizartean. Askotan pertsona horiek alde batera uzten ditugu. Bitartean, besteok beste trago bat eskatzen jarraitzen dugu.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.