ATZEKOZ AURRERA. Goiuri Barriga. 'Red Fanzine'-ren sortzailea

«Emakume batzuek pentsatzen dute hilekoa zikina dela»

Barrigak bere hilekoa ezagutzeko prozesuaren ondoren erabaki zuen gaiari buruzko fanzine bat egitea. Hilekoaren estigmak apurtzea da 'Red Fanzine'-ren xedea, eta hamabi egile batu dituzte.
JUANAN RUIZ / FOKU Tamaina handiagoan ikusi

Lander Muñagorri Garmendia -

2020ko urtarrilak 25

Hilekoaren inguruko Red Fanzine aurkeztu zuten ostegunean Gasteizen. Goiuri Barrigak (Gasteiz, 1984) bere hilekoa ezagutzeko prozesua egin zuen, eta hura amaitutakoan erabaki zuen gaiaren inguruko fanzine bat egitea. Horretarako 11 egile gehiagorekin harremanetan jarri, eta horien lanak bildu dituzte fanzinean. Besteak beste, argazkilariek, ilustratzaileek, diseinatzaileak, ikerlariek edo hilekoaren hezitzaileek hartu dute parte, helburu jakin batekin: hilekoaren inguruko estigmak apurtzea. «Jendeak harrera oso positiboa egin digu, eta askok idatzi digute esanez parte hartzeko prest daudela». Sarean ikusgai jarriko dute www.redfanzine.es atarian.

Nola elkartu zarete hamabi emakume hilekoari buruz idazteko?

Gasteizko gazteria sailekoek Haziak saria eman ziguten, eta horrek mugatu du hamabi parte hartzaile izatea. Hilekoari buruzko fanzine bat egin nahian nenbilen, eta Hezkuntzarekin zein kulturarekin lotutako jendea batu dugu, soslai anitzekoa. Hilekoa prisma ezberdinetatik ikusi nahi genuen, emakume bakoitza mundu bat baita, eta ez baitago arau komun bat. Emakumeak beste hileko mota daude, eta hori irudikatu nahi genuen.

Ez da hilero argitaratuko, ala?

[Barreak]. Ez nuke hala nahiko. Gutako bakoitzak gure lan eta proiektuak dauzkagu, eta fanzineek ez dute jaten ematen. Urtean bi zenbaki egin nahiko genituzke, baina hori ikusiko dugu.

Zer lortu nahi duzue honekin?

Hilekoa normalizatu, eta bakoitzak bere ikuspegia daukala erakutsi. Batzuentzat, hilekoa tortura bat da, eta, ni bezala, beste batzuk hilekoarekin baketu gara. Hori egitean neure buruarekin adiskidetzea bezala izan da, eta aurkikuntza bat izan da. Biziaren erdia neraman hilekoa izaten, eta ez neukan ideiarik ere nire barnean gertatzen ari zenaz, eta nola eragiten zion horrek nire egunerokotasunean.

Zer ikasi duzu?

Lau zikloak kontrolatu ditut. Ikusi dut horietako bakoitzean hormonek bere dantza daukatela, eta aldi bakoitzean era ezberdinean gaudela. Hori egutegi batekin kontrolatu dezakezu: egun bakoitzean nola zauden apuntatzen duzu, eta konturatzen zara denak patroi bat jarraitzen duela. Horren arabera jakin dezakezu hurrengo egunetan nola egongo zaren.

Esan daiteke, beraz, fanzine hau zeure burua ezagutzearen ondorioa izan dela?

Bai, hau prozesu pertsonal batetik abiatu da, eta proiektu kolektibora pasatu da. Denok nozitzen dugun zerbait kolektibizatu dugu, eta ideia da gehiagora joatea.

Gaur egun, oraindik, hilekoaren tabuak apurtzeko beharra ikusten al duzu?

Emakume batzuek pentsatzen dute hilekoa zerbait zikina dela. Herrialde batzuetan, emakumeak hilekoa dutenean euren tribuetatik kanporatzen dituzte. Hemen bertan ere, duela ez denbora asko esaten zen hilekoarekin maionesa moztu egiten zela, loreak ureztatuz gero hilko zirela... Jabetzen al gara zer esaten ari ziren? Duela gutxi, Burgosko unibertsitatean nengoela, lagun batek esan zidan nola irakasle ikasketak egiten ari ziren neska ikasle batzuentzat nazkagarria zen sare sozialetan hilekoa erakusten duten mugimenduak. Nola liteke 20 urteko neska batzuek euren prozesu biologiko bat nazkagarritzat hartzea?

Fanzineak badu, beraz, funtzio didaktikoa?

Bai, didaktikoa, dibulgatzailea, artistikoa... Ikuspegi ezberdin asko daude, eta bakoitzak bere zergatia dauka.

Minaren gaia landu duzue?

Bai. Jendeak oro har uste du hilekoak min ematen duela, eta min eman beharra daukala. Ez badizu minik ematen, zorionekoa zu! Baina eman dezagun txiza egiterakoan mina ematen dizula, medikuarenera joanez gero, arazoa nondik datorren begiratuko lizuke, ala? Guri, hilekoak min ematen badigu eta medikuarenera joaten bagara, gauza normala dela esaten digute. Baina hilero igaro behar dugun prozesu biologiko bat da; beraz, ez dauka zentzurik horrela erantzuteak.

Eta horrek hilekoa ikusezin bihurtzen du...

Bai. Azken batean, sistema kapitalista batean gaude, eta gehien egiten duenak gehiago balio du. Ezin gara gelditu. Erritmo horiek egiten dute hilekoak min ematea. Zortea daukat, autonomoa bainaiz eta etxetik egiten baitut lan. Obarioek min ematen badidate, sofan jar naiteke lasai, eta bi orduz gelditu. Baina emakume askok ezin dute hori egin, eta ez dute esaten hilekoa dutenik ere. Betiko aipamen ergel hori egiten ahal dizute, gainera: «Esaten nuen ba hilekoa ote zenuen, ozpinduta zaude-eta».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Larry King telebista aurkezle eta irrati esataria ©

Larry King irrati esatari eta telebista aurkezlea hil da

Uxue Gutierrez Lorenzo

Los Angeleseko Cedar Sinai Medical Center ospitalean zendu da, 87 urterekin. 'Larry King Night' gaueko irrati saioak egin zuen ezagun.

Lanaren aurkezpen ekitaldia. ©@bizipoza_org

'Mundu berri bat guztiontzat' lana aurkeztu du Bizipozak

Berria

Hamabi abestiz eta 11 ikus-entzunekoz osatutako lan bat da, eta Bizipoza osatzen duten elkarteen errealitatea erakustea du helburu.

Angel Azkorbebeitia artzaina, bere Abadiñoko baserrian, Gorbeiako euskal artzain txakurra ondoan duela. ©ANDONI CANELLADA / FOKU

Euskal arraza, galzorian

Jone Arruabarrena

Euskal Artzain Txakurraren Adiskideak elkarteak bultzatuta, EHUko Biomics ikerketa taldeak egin duen azterlanean ondorioztatu dute euskal artzain txakurra egoera larrian dagoela. Endogamia handia dauka arraza horrek, eta gaur egun 470 banako daude erregistratuta. Nazioartera jauzi egin du ikerketak orain.

 ©JAGOBA MANTEROLA / FOKU

«Denek gaizki pasatuko genuke zortzikoa jo eta ezin dantzatuta»

Iker Tubia

Irakaslea eta abeslaria da Onsalo, eta musika beti du erdigunean. Erromeria taldea izanik, egoerara moldatu behar izan dute, baina ez da hain txarra izan 2020a: «Urtea gazi hasi zen, baina goxo akitu da».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Lander Muñagorri Garmendia

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna