Albistea entzun

Azkarrena esprintean, bigarren aldiz

Pedersenek irabazi du Vueltako 16. etapa. Roglic erori egin da, eta Evenepoelek zortzi segundo galdu ditu matxura baten ondorioz
Pedersen garaipena ospatzen, atzean Roglic lurrean dela.
Pedersen garaipena ospatzen, atzean Roglic lurrean dela. JAVIER LI ZON/ EFE Tamaina handiagoan ikusi

Beñat Mujika Telleria -

2022ko irailak 7

Espainiako Vueltako aurreneko esprintetan bigarren egiteaz gogaitu ere egin zen Mads Pedersen (Trek). Sam Bennettek (Bora) ez zion aukerarik utzi, baina irlandarrak lasterketa utzi zuenetik, Pedersen ari da nagusitzen. Hark irabazi zuen atzo Espainiako Vueltako 16. etapa.

Primoz Roglicek (Jumbo-Visma) erasoa jo zuen azken hiru kilometroetan, eta, harekin batera, zenbait txirrindularik egin zuten aurrera; horien artean Pedersenek. Taldetxo horretako ziklisten artean erabaki zen garailea, esprintean. Erraz gailendu zen danimarkarra, eta Roglicek eroriko itsusia izan zuen. Remco Evenepoel (Quick-Step) liderrak matxura bat izan zuen azken hiru kilometroen barruan. Ordurako Roglicen erasoa joa zuen, eta tropelean zen flandriarra. Tropela zortzi segundora iritsi zen helmugara, eta denbora hori eman zioten liderrari. 1.26ren aldea dauka liderrak orain, Roglicekiko.

Aurtengo Espainiako Vueltako azken atseden egunaren ostean, hirugarren eta azken astean murgilduta dago lasterketa. Beroa eta haizea izan ziren atzoko oztopo nagusiak. Lehen 175 kilometroetan ez zen nabarmentzeko askorik izan. Ibilbidea laua zen arren, azken hamabost kilometroetan gailur handi bat zegoen, eta hori zen eguneko mugarrietako bat. Amaiera zorrotza eta sigi-sagatsua zen: Azken kilometroan 600 metroko gainari (%8ko pendiza) egin behar izan zion aurre tropelak, eta handik helmugako aldaparaino (%4an) ibilbidea estua eta teknikoa zen.

Ander Okamika (Burgos-BH) eta Luis Angel Mate (Euskaltel-Euskadi)izan ziren eguneko ihesaldian, eta elkarrekin egin zuten egunaren zati handiena. Tropelean lasai aritu ziren, baina hogei kilometro gelditzen zirenean abiadura handitu zuten. Helmugarako hamahiru kilometrora harrapatu zuten bikotea.

Abiadura bizian egin zituzten azken kilometroak. Roglicek erasoa jo zuen azkeneko maldetan gora, eta esprinterrez beteriko talde txiki batekin egin zuen aurrera. Tarte txiki bat zabaltzea lortu zuten, eta orduantxe Evenepoel liderrari gurpila zulatu zitzaion.Taldetxoan erabaki zen garailea. Pedersenek abiatu zuen esprinta, eta erraz lortu zuen garaipena.

Emakumezkoena, gaurtik

Gaur hasiko da emakumezkoen Espainiako Vuelta. Marina de Cudeyon izango du hasiera, erlojuaren aurkako saioan, eta Madrilen amaituko da, igandean. Bost euskal herritar arituko dira: Eukene Larrarte (Bizkaia-Durango), Ane Santesteban (BikeExchange), Usoa Ostolaza, Idoia Eraso eta Tania Calvo (Laboral Kutxa).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JON URBE / FOKU

«Soilik izozmendiaren punta ikusten da garaipenarekin»

Beñat Mujika Telleria

Lehenengoz hartu zuen parte Helene Alberdik nazioarteko triatloi batean, joan den asteburuan. Europako Txapelketa Bilbon jokatu zen, eta urrea kolkoratu zuen.
Juan Cruz Osasunako atzelaria eta Alexander Sorloth Realeko aurrelaria, lehian, aurreko denboraldian Anoetan jokatutako partidan. ©JAVIER ETXEZARRETA / EFE

Komeni indarberritu izana

Iñigo Lasa Fresneda

Realak eta Osasunak gaur ekingo diete norgehiagokaz betetako bost aste gogorri. Talde txuri-urdinak Gironan jokatuko du, eta gorritxoak Real Madrili egingo dio bisita

Masterseko finalerdiak jokatu zituzten herenegun gauean Nafarroa Arenan. 1.500 ikusle izan ziren harmailetan. Gehiago izango dira gaur finalean. ©JESUS DIGES / EFE

Udari txapela jarri nahi diote

Julen Etxeberria

Ezkurdia-Mariezkurrena eta Altuna-Imaz ariko dira gaur Masterseko finalean, Nafarroa Arenan

Alavesek ezin du burua altxatu, eta 0-4 galdu du Vila-realen kontra

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Beñat Mujika Telleria

Informazio osagarria

Iruzkinak kargatzen...