Albistea entzun

ATZEKOZ AURRERA. Lander Ibarretxe. Zinemagilea

«Nepalgo haurrek elkar zaintzen dute»

Inazio Mujika Iraola idazlearen narrazio batean oinarrituta, Ibarretxe bere lehen film laburra zuzentzen ari da: 'Regina'. Nepalgo haurrekin grabatutako dokumental bat ere bukatzen ari da: 'Balika'.
JOAN PLANELLES Tamaina handiagoan ikusi

Urtzi Urkizu -

2019ko abuztuak 29

Bartzelonan bizi da Lander Ibarretxe (Bilbo, 1992). Veredastudio ekoiztetxea sortu du, Aitor Sanchezekin batera, eta ikus-entzunezko hainbat proiektutan murgilduta dabil. Esku artean dituenak bukatu ostean, Ganbiara joan nahiko luke dokumental bat egitera.

Argazki kameren artean ibiltzea gustatu izan zaizu beti. Baina ofizioa beste kontu bat da, ezta?

Askotan egin dut lan argazki kamerarekin. Musika taldeei argazkiak egin izan dizkiet. Baina ez naiz inoiz jarri erakusketa bat prestatzera. Jolas edo zaletasun bat izan da niretzat argazkilaritza.

Ikus-entzunezkoetan modu duinean lan egiteko aukera hobeak al daude Bartzelonan Euskal Herrian baino?

Bai, Bartzelonan publizitate asko grabatzen da. Kostaldea eta mendia oso gertu daude, eguraldi ona dago eta agentzia askok jotzen dute bertan grabatzera. Hiri garrantzitsua da ikus-entzunezkoetan.

Veredastudio ekoiztetxean, bidaiekin lotutako espezializazioren bat bilatzen al duzue?

Dokumental batzuk, bideoklip bat eta bidaia agentzia batentzako bideo batzuk egin ditugu. Horiek bidaia etikoak dituzte ezaugarri komun.

Noiz da bidaia bat etikoa eta noiz ez?

Bidaia etikoa da bidaiariak tokian tokikoak errespetatzea. Tokikoen ohituretara egokitzen da, norberarenak tokian tokira eraman beharrean. Ingurumenarekin ere errespetuz ibiltzen dena da bidaia etikoa.

Nepalen grabatutako Balika dokumentala editatzen ari zara egunotan. Zer ikasi zenuen herrialde horretako haurrengandik?

Harrigarria izan da arazoei nola aurre egiten dieten ikustea. Familiaren kontzeptu berezia dute: nahiz eta guraso berak ez izan, haur askoren artean familia bat osatzen dute. Haurrideak balira bezala sentitzen dira asko. Txikitatik elkarrekin egon diren 30 haur topatu nituen. Haurrek elkar zaintzen dute, ikustekoa da. Dokumentala udazkenean amaituko dugula espero dut.

Non aurkeztuko duzue?

Kataluniako aholkularitza erakunde batek salmenta agente batekin jarri gaitu harremanetan. Hainbat jaialditan aurkeztuko dugu dokumentala, eta, gero, telebista kateei saltzen saiatuko gara.

Bideoklipak ere zuzendu dituzu. Belakoren bi bideoklip, tartean.

Belako taldeko musikariak lagunak ditut aspalditik, eta, hasieran, argazkiak ateratzen nizkien. Antzeko gustuak ditugu, gainera.

Render me Numb bideokliparekin MIN saria irabazi zenuen iaz. Aterik zabaldu al dizu sari horrek?

Ba, orduz geroztik, ez dut bideoklip gehiago egin. Madrilen proposamen edo enkargu pare bat jaso nuen, baina oso diru gutxiren truk egitekoak ziren, abestiak ez nituen oso gustukoak, eta ezezkoa eman nien azkenean.

Proiektuetarako finantzaketa lortzea ere zure lanaren parte da. Nekeza da ate joka ibiltzea?

Bere alde onak eta txarrak ditu. Testu eta txosten batzuk prestatu behar dituzu aldez aurretik, aurkezpenak egiteko. Horrek laguntzen dizu definitzen zer kontatu nahi duzun. Okerrena da kasu batzuetan lan asko egin dezakezula, eta azkenean ezertxo ere lortu ez.

Regina film laburrean, berriz, 1920ko hamarkadan girotutako istorio bat grabatu duzue Galapan ekoiztetxearekin. Zergatik jo duzue denboran ehun urte atzera?

Ikuslearekin jokatzeko, beste garai batera eramateko. Kontraste handiak zeuden orduan, eta horretara jo dugu, Mujika Iraolaren narrazio bat aintzat hartuz. Idazleari gustatu zaio gure ideia. Espero dut film laburra estreinatzen dugunean haren iritzia jaso ahal izatea.

Galapan ekoiztetxe berria gazte euskaldunez osatuta dago. Ez dute erraza izango, ezta?

Ez, egoera zaila da. Baina pausoa eman dute ekoiztetxea sortzeko, eta bidea egiten ari dira pixkanaka.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Jacques Essebag ekoizlea eta Gilles Pelisson TF1eko zuzendari nagusia ©LUDOVIC MARIN / Efe

TF1 eta M6 kate pribatuek bat egingo dute

Urtzi Urkizu

Negoziazioak hasiko dituzte, eta datorren urtearen amaieran bat egitea gauzatzea espero dute. Erabateko nagusitasuna lortuko lukete Frantziako telebista pribatuan. Bi konpainien artean publizitate merkatuaren %70 inguru bereganatzen dute.

 ©KALAMALANGALA

«Deseraiki ahal izateko, zuritasuna onartu eta tratatu egin behar da»

Amaia Ramirez de Okariz Kortabarria

Zuritasunaz indibidualki eta kolektiboki hausnartu behar dela uste du Gottliebek, orain arte eraikitakoa deseraikitzeko. Arrazismoa jasaten dutenen ahotsa entzutea ere garrantzitsua dela azpimarratu du.
Emakumezko bat maskara jantzita, bere buruari argazki bat ateratzen, Alemaniako Bonn hirian, lorez betetako parke batean. ©SASCHA STEINBACH / EFE

Iragazki bat doministikuentzat

Enekoitz Telleria Sarriegi

Alergologoek berretsi dutenez, maskaren erabilerak nabarmen arindu ditu polenari alergia diotenen sintomak. Oraintxe behar lukete denek bete-betean, baina esan dute inoiz baino kasu gutxiago dituztela. Lehen ere gomendatzen zuten maskara erabiltzea, baina orain jabetu da jendea haren onurez.

Hatari, 2019ko Eurovisionen. ©BERRIA

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Urtzi Urkizu

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna