Albistea entzun

ATZEKOZ AURRERA

Flamenko doinuetan urtuta

Flamenco on Fire jaialdiak lehenbiziko saioa eskaini du Vianan; egitasmoaren aperitifa. Sandra Carrasco eta Joni Jimenez aritu dira udaletxeko balkoitik flamenkoa lau haizeetara zabaltzen.
Sandra Carrasco abeslaria eta Joni Jimenez gitarra jotzailea, atzo, Vianako udaletxeko balkoian jotzen.
Sandra Carrasco abeslaria eta Joni Jimenez gitarra jotzailea, atzo, Vianako udaletxeko balkoian jotzen. IÑIGO URIZ / FOKU Tamaina handiagoan ikusi

Iker Tubia -

2022ko abuztuak 13 - Viana

Sutan zegoen plaza. Eguerdian eguzkiak bete-betean jotzen zuen Vianako Foruen plazan (Nafarroa). Plazaren erdigunean iturria bakar-bakarrik zen, ez zen giro eguzkitan paratzeko. Besoak, aurpegia eta zintzurra freskatzera baizik ez zen bildu jendea plaza erdira. Inguruak bai, inguruak beterik ziren; itzalpean, noski: batzuk terrazetan, abanikoak astintzen eta tragoak hartzen; besteak udaletxearen parean dagoen harrizko banku luzean, zain. Bozgorailuetatik flamenko doinuak, eta plazaren erdiko publizitate oihaletan jaialdiaren izena: Flamenco on Fire. Musika jaialdia abuztuaren 24an hasiko bada ere, atzo aperitifa izan zuten Vianan. Sandra Carrascorenak eta Joni Jimenezenak izan ziren lehen notak, eta ikusleak flamenkotan urtu zituzten.

Jendea denborarekin gerturatu zen plazara, tokia hartzera. Harrizko udaletxearen erdiko balkoia atondurik zegoen ordurako. Vianako bandera alde batera, Europako Batasunarena bestera, eta bi mastek oihal luze bati eusten zioten, balkoia eguzkitik babesteko. Lore zuri-gorriak alderik alde. Ezkilek 13:00ak zirela iragartzearekin batera grabatutako ahots batek egin zuen aurkezpena: «Ahots trebea, liriko eta sakona». Sandra Carrasco zen, eta eskerrak ematearekin batera bota zuen bere mezua: «Flamenkoa babestu behar dugu. Musikak gizakia osatu eta sendatzen du».

A cappella egin zuen lehenbizikoa: Nana de Alejandría. Plazan isiltasuna erabatekoa izan zen, eta lehenbiziko doinuari ekin bezain laster atera zituzten sakelakoak gehienek: ikuskizuna grabatu nahi zuten. «Olé!» oihuek eta txaloek iragarri zuten «ama eta neska guziei» zuzendutako kanta haren bukaera.

Bigarren abestirako «sekulako gitarra jotzaile bat» aurkeztu zuen abeslariak: Joni Jimenez. Malagueña interpretatu zuten elkarrekin, eta Carrascok txalo jotzen zuen parteetan publikoak ere lagundu zuen. Fandango bat ere jo zuten, eta jendeari hitzei erreparatzeko eskatu. Hogei minutuz aritu ziren; gauean zuten saio nagusia: Voces ikuskizuna.

Carrascok gozatu zuen balkoiko saioa: «Jendea emanaldiaren zain zegoen. Errespetua, isiltasuna eta presentzia zeuden. Han goitik publikoa sentitu dut, eta ederra izan da». Behekoak ere kontent; tartean, Dolores eta Rosa. «Herrian edozer egitea beti ongi da», lehenbizikoak. «Nafarroako kulturarekin alderatuta oso ezberdina da, baina oso ongi dago hau bultzatzea», bigarrenak. Rosak sevillanak egiten ditu: «Fandangoaren oso ezberdinak dira sevillanak, baina ederrak biak». Dolores aspaldi bizi da Vianan, baina Malagan (Espainia) sortu zen. Bederatzi urterekin utzi zuen sortetxea. «Asko gozatu dut kontzertuarekin. Musika den guzia zoragarria da», bota zuen.

Flamenkoa herrietan

Azken urteetan flamenko jaialdiaren barruan antolatu dute F on Fire zikloa, kontzertuak ez daitezen soilik Iruñean eta Tuteran (Nafarroa) izan. «Nafarroa osora eraman nahi dugu flamenkoa, eta leku ederretan kontzertuak eskaini», kontatu zuen Arturo Fernandez jaialdiko zuzendariak. Atzokoari nota ona paratu zion: «Artistikoki eta publiko kopuru aldetik arrakastatsua izan da». Plazan bildutako batzuk gaueko kontzerturako gogoz utzi zituen, behinik behin. Doloresek eta Rosak bazuten sarrera. Gainerakoek abuztuaren 24tik aurrera izanen dute flamenkoaz gozatzeko parada.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jon Goenaga eta Libe Goenaga aita-alabek zaintzen dituzte Getariako (Gipuzkoa) Lahardi baserriko ahuakate ondoak. Euskal Herriko lehenak izan dira. ©Jon Urbe / FOKU

Ahuakate ondoak kateatu dira Euskal Herrian ere

Ainize Madariaga

Ahuakate ondoen ekoizpena zalu hedatzen ari da Euskal Herrian. Getariako Lahardi etxaldean duela hiru hamarkada hasi ziren; berrikiago bertze guziak. Bertako klimari eta lurrari ongi egokitzen zaie zuhaitza, baina arta bereziak behar ditu, sustut neguko malda igaiteko.

 ©JON URBE / FOKU

«Begien osasuna eta pobrezia lotuta daude»

Jakes Goikoetxea

Ikusmen arazoek bizimodua baldintzatzen dute, are gehiago herrialde pobreetan. Arazo handia eta larria da herrialde askotan. Errealitate gordin hori ikusarazten eta laguntza lortzen aritzen da Otaegi.
 ©BERRIA

Ohiko albisteetatik ihesi

Iker Tubia

Reuters institutuaren arabera, geroz eta jende gehiagok erabakitzen du gaurkotasuna albo batera uztea. Eragin psikologikoa, nekea, konfiantza falta eta ezintasun sentsazioa aipatu dituzte albisteetatik deskonektatu direnek.

 ©JAGOBA MANTEROLA / FOKU

«Aro berria hasi dugu, salto digitala emanez»

Olatz Silva Rodrigo

Euskalerria Irratiak denboraldi berriari ekin dio. Iruñerriko euskal komunitateari zerbitzurik onena eskaini nahian, salto digitala eman dute. Besteak beste, kamera adimendunak jarri dituzte estudioan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...