Bide berri bat urratzen ari da

Luis Sanchez atzelari iruindarra da berezkoen txapelketa nagusietan ari den Hego Euskal Herriko lehen pilotaria. Oso ondo ari da Bigarren Mailakoan: bi kanporaketa gainditu ditu, eta final-zortzirenak jokatuko ditu etzi.
Luis Sanchez, pilota jotzeko prest, Bixente Cubiaten aurkakoan.
Luis Sanchez, pilota jotzeko prest, Bixente Cubiaten aurkakoan. GOIZEKO IZARRA Tamaina handiagoan ikusi

Julen Etxeberria -

2020ko urtarrilak 17

Trinketak inon ospea eta tradizioa baldin badu, hori Ipar Euskal Herrian da. Hango trinketlariak nabarmendu dira diziplina horretan betidanik. Salbuespen bakarra izan da, Agusti Waltaryrena. Kubatarra nagusi izan da urte askoan, eta makina bat txapel irabazi du: seitan banakakoa, eta beste seitan binakakoa, besteak beste.

Baina duela urte batzutik hona, Hegoaldeko zenbait pilotari ari dira Iparraldeko trinketetera hurbiltzen, eta txapelketa nagusiak jokatzen. Mikel Gonzalez izan zen lehena. Berrizkoak (Bizkaia) urteak egin ditu trinketlari onenekin nor baino nor gehiago lehiatzen. Azkenaldian, berriz, Eneko Maiz billabonatarra, Ekhi Ziarrusta dimoztarra eta Inhar Ugarte sopelarra nabarmendu dira.

Luis Sanchez (Iruñea, 1997) da trinketera gerturatu den azkenekoa. Hura da berezkoen bi txapelketa nagusietako batean ari den Hego Euskal Herriko lehen trinketlaria. Oso ondo ari da Bigarren Mailakoan, bi kanporaketa pasatu baititu jada: 40-17 irabazi zion Cedric Lucuri aurrenekoan, eta 40-24 Bixente Cubiati bigarrengoan. Final-zortzirenak jokatuko ditu etzi, Gregory Agirreren aurka, Zuraiden (Lapurdi), 16:00etan.

«Lehen aldia izanda, ez nuen galdu nahi aurreneko kanporaketan, eta jada bi gainditu ditut. Beraz, oso pozik nago. Ea urruti irits naitekeen», esan du. Akuilua badu. «Enpresak [Esku Pilotak] esan dit lan ona eginez gero, martxoan Lehen Mailako Binakako Txapelketan tokia izan dezakedala. Itzela litzateke. Badakit zer egin behar dudan: binakakoan ahal dudan lanik onena egin».

Duela zazpi urte hasi zen Sanchezen eta trinketaren artekoa. Urteak zeramatzan etxe ondoan ezkerparetan jokatzen: Huarten eta Esteribarren (Nafarroa). Baina ez atzera, ez aurrera ikusten zuen bere burua. «Frontoia nire tokia ez zela konturatu nintzen; ezin nuen pilotekin. Gainera, berandu hazi nintzen, eta horrek are eta gehiago zaildu zuen dena».

Trinketean probatzeko gomendatu zioten. «Esan zidaten pilotak ez zirela horren exijenteak, eta horregatik eman nuen pausoa». Pausoa eman, eta katigatuta geratu zen. «Jokatzen hasi, eta ikusi nuen banuela gaitasuna; ondo moldatzen nintzen. Hori gutxi ez, eta orduan eman zuen jauzia hazkundean [1,87 metro da luze]. Denak bat egin zuen».

Segituan hasi zen nabarmentzen, eta garaipen zerrenda polita osatzen: bi Gravni txapelketa irabazi ditu, eta brontzezko hiru domina eskuratu ditu 22 urtez azpiko eta maila nagusiko munduko txapelketetan eta Munduko Kopan. Konturatu orduko, espezialista onenen aurka ari zen: Battitta Ducassou, Peio Larralde eta Waltaryren aurka, besteak beste. Azkar konturatu zen oraindik «oso urrun» dagoela haiengandik. «Alde handia dago Lehen eta Bigarren Mailaren artean. Bigarren Mailan, nor baino nor gehiago aritu naiteke. Lehen Mailan, aldiz, nekez. Gaur-gaurkoz, iritsezinak dira maila horretakoak. Ducassou da nire eredua: onena da».

«Lehiakorra eta osoa naiz»

«Jokoaren aberastasuna». Hori da trinketaz gehien gustatzen zaiona. «Frontoiarekin konparatuta, askoz jokaldi gehiago egiten dira. Ez da horren monotonoa; bizi-bizia da. Nik gozatu egiten dut».

«Trinketlari lehiakor eta osotzat» jo du bere burua. «Txukun moldatzen naiz arlo guztietan». Atzelaria izanik, oso barneratua du defentsako lana, baina nabarmendu du trinketean atzelarien lana ez dela mugatzen soilik pilotak eramatera. «Erasora ere joka dezaket, eta horrek ere asko erakartzen nau». Teilatutxoak ere aspaldi utzi zion traba izateari. «Hasieran, kosta egiten da, baina jada hartu diot neurria. Baliabide ona da». Halaber, haren ustez, ezkerparetan aritu izanak «mesede» egiten dio zenbait postura hartzeko orduan.

«Asko» du hobetzeko, eta ari da lanean. Iruñean entrenatzen da, Mendillorrin, eta, astean partidarik ez duenean, lan saio bat egiten du Urruñan (Lapurdi), hango taldean, Urruñarrak-en, aritu baitzen bi urtez. 2020tik, berriz, profesionala da. Biologia ikasketak amaitu zituen iaz, eta pilotako monitore izateko ikasten ari da orain. «Nekeza izan zen Unibertsitateko garaia, eta orain, urtebetez, pilotan aritu nahi dut, buru-belarri».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiari 1813an su eman ziotela oroitzeko Dora Salazarrek egindako eskultura, maskara jantzita ©JUAN CARLOS RUIZ / FOKU

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan.

PCR proba bat, Indian. Bigarren herrialde kaltetuena da hura. ©SANJEEV GUPTA / EFE

Milioi bat lagun baino gehiago hil ditu COVID-19ak

Iosu Alberdi

AEBetan erregistratu dute kasu eta heriotza gehien. Euskal Herriak munduko heriotza tasa handienetako bat du: 77 heriotza 100.000 biztanleko.

Konfinamendua ezarri zuten Azkoienen. ©Idoia Zabaleta / Foku

Hegoaldeko kasuen erdiak baino gehiago, Nafarroan

Uxue Rey Gorraiz

Beste 603 positibo zenbatu dituzte Hego Euskal Herrian; Nafarroan atzeman dituzte horietatik 318. Halaber, bi pertsona zendu dira birusaren ondorioz.

Maria Txibite, agerraldi batean. ©Jesus Diges / Efe

Txibitek esan du egoera «kontrolatuta» dagoela Nafarroan

Arantxa Iraola

Positibo «asko» izan arren konfinamendu orokorrik ezartzeko asmorik ez dutela adierazi du

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna