Albistea entzun

ATZEKOZ AURRERA. Karmele Gorroño. Ilustratzailea

«Ilustrazioaren lanbidea ez da inolaz ere egonkorra»

Irrimarra bikoteko kideetako bat da Gorroño. Adierazi duenez, eskatu izan diete «mesede gisa» marrazkiak dohainik egiteko. Hala ere, uste du halakoak gero eta gutxiago gertatzen direla.
IRRIMARRA Tamaina handiagoan ikusi

Iñigo Satrustegi -

2020ko urtarrilak 22

Irene Iruretarekin batera, Irrimarra ilustratzaile bikotea osatzen du Karmele Gorroñok (Galdakao, Bizkaia, 1987). Arte ederretako ikasketak egin zituzten elkarrekin, eta 2016. urtetik ilustrazioaren munduan dabiltza buru-belarri. Askotariko lanak egin dituzte; esaterako, Altzoko Handia-ren album ilustratua, horma irudiak eta erretratuak. Hain zuzen ere, beren lanekin osatutako erakusketa bat jarri dute ikusgai Taberna Nagusia kultur etxean, Basaurin (Bizkaia). Otsailaren 7ra arte bisitatu ahalko da.

Ilustrazioekin eta pinturekin osatu duzue Basauriko erakusketa, ezta?

Hori da, eta gehienak erretratuak dira. Erakusketa oraindik prozesuan dagoela esan dezakegu; izan ere, aurreko erakusketa baterako lan batzuk aurkeztu genituen, eta, denborarekin, pinturetako batzuk kendu ditugu, eta beste batzuk sartu. Beraz, oraindik ez dugu bukatu, eta asko alda daiteke erakusketa batetik bestera.

Esanahi berezirik ba al du? Ala obra solteak dira?

Pintura lantzen aritu gara azkenaldian. Lan horiekin erakutsi nahi genuen nola begiratzen diegun ikusleok erakusketetako erretratuei, baina, aldi berean, haiek guri ere begiratzen digutela. Koadroetako pertsonaien artean ere begiradak gurutzatzen dituzte. Ilustrazio serie batean, askotariko emakumeak irudikatu ditugu: aulkietan eserita, bakoitza toki desberdinetara begira.

Bikote bat izanik, nola moldatzen zarete lanek batasun bat izateko?

Irenek eta biok batera ikasi genuen, eta lanak hasieratik egin ditugu batera: bai klasekoak, baina baita jolas modura egiten genituen obrak ere. Ez da bata gauza jakin batzuk egiteaz arduratzen eta bestea besteez. Besterik gabe, elkarrekin joan gara gure estiloa definituz.

Unibertsitatean hasi, eta gaur arte, beraz.

Ikasketak bukatuta, bakoitzak bere bidea hartu zuen: nik irakaskuntzako masterra egin nuen, eta Irenek, berriz, ilustrazioa ikasi zuen, Gasteizen. Tarteka, lantxo batzuk egiteko elkartzen ginen, eta, gustura aritzen ginenez, horretan lan egitea probatzea erabaki genuen.

Ilustrazioa lanbide aukeratzen denean, zer arriskuri egin behar zaie aurre?

Ilustrazioaren lanbidea ez da inolaz ere egonkorra. Hala uste dugu guk, behintzat. Ez dakigu hurrengo hilabetean lanik izango dugun egiteko. Hau da, proiektuak ateratzen diren heinean lana izango dugu, baina ez dugu inolako bermerik.

Herritar asko, gainera, harritu egingo dira zuen lanagatik ordaindu behar izateagatik, ezta?

Egia da sarri jendea nahastu egiten dela. Artea bizimodu hartzen dugunok, orokorrean, gure lana oso gustuko dugu, eta batzuetan fabore modura eskatzen dizkigute gauzak, ordaindu gabe, pentsatu gabe gure lana dela. Beste lanbide batzuetan ez da halakorik gertatzen. Hala ere, esango nuke pertzepzio hori, pixkanaka bada ere, aldatzen ari dela.

Horma irudi bat egiten ari zarete egunotan Bilbon. Horrelako lan asko egiten al dituzue?

Denetik egiten dugu, eta, hain zuzen ere, hori da gehien gustatzen zaiguna: aldatzea. Ilustrazio solteak edo haurrentzako ipuinak bakarrik egitea, bulegoan sartuta, aspergarria izan daiteke, eta, tarteka, horma irudiak eskatzen dizkigutenean, gogoz hartzen ditugu. Egia da fisikoki nekagarriagoa dela agian, baina euskarriak aldatzea gustatzen zaigu, batez ere denbora luzez zerbaitetan gabiltzanean, ez aspertzeko.

Zuen irudietan, emakumeen irudiek presentzia handia dute. Zergatik?

Hala egin izan dugu gustatzen zaigulako eta eroso sentitzen garelako. Horrelakoak egiten ditugunean, emakumeen eredu desberdinak irudikatzea gustatzen zaigu, fisiko aldetik edo... baina ez dugu arrazoi finkorik horretarako.

Etorkizunera begira, proiekturik darabilzue buruan?

Proiekturen bat edo beste badugu, baina ez daude baieztatuta. Album ilustratu bat ere atera nahiko genuke. Bitartean, enkargu batzuk egiten gabiltza.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jon Goenaga eta Libe Goenaga aita-alabek zaintzen dituzte Getariako (Gipuzkoa) Lahardi baserriko ahuakate ondoak. Euskal Herriko lehenak izan dira. ©Jon Urbe / FOKU

Ahuakate ondoak kateatu dira Euskal Herrian ere

Ainize Madariaga

Ahuakate ondoen ekoizpena zalu hedatzen ari da Euskal Herrian. Getariako Lahardi etxaldean duela hiru hamarkada hasi ziren; berrikiago bertze guziak. Bertako klimari eta lurrari ongi egokitzen zaie zuhaitza, baina arta bereziak behar ditu, sustut neguko malda igaiteko.

 ©JON URBE / FOKU

«Begien osasuna eta pobrezia lotuta daude»

Jakes Goikoetxea

Ikusmen arazoek bizimodua baldintzatzen dute, are gehiago herrialde pobreetan. Arazo handia eta larria da herrialde askotan. Errealitate gordin hori ikusarazten eta laguntza lortzen aritzen da Otaegi.
 ©BERRIA

Ohiko albisteetatik ihesi

Iker Tubia

Reuters institutuaren arabera, geroz eta jende gehiagok erabakitzen du gaurkotasuna albo batera uztea. Eragin psikologikoa, nekea, konfiantza falta eta ezintasun sentsazioa aipatu dituzte albisteetatik deskonektatu direnek.

 ©JAGOBA MANTEROLA / FOKU

«Aro berria hasi dugu, salto digitala emanez»

Olatz Silva Rodrigo

Euskalerria Irratiak denboraldi berriari ekin dio. Iruñerriko euskal komunitateari zerbitzurik onena eskaini nahian, salto digitala eman dute. Besteak beste, kamera adimendunak jarri dituzte estudioan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iñigo Satrustegi

Informazio osagarria

Iruzkinak kargatzen...