Albistea entzun

ATZEKOZ AURRERA. Geraint Rhys. Musikaria

«'Brexit'-aren eraginez, bakartuago geratu gara»

Galesen independentziaren aldeko mugimendua sustatzeko asmoz, Rhysek 'Who are you' bideoklipa estreinatuko du gaur. «Herriaren mugimendu bat izan behar dugu», esan du.
GERAINT RHYS Tamaina handiagoan ikusi

Urtzi Urkizu -

2021eko martxoak 12

Ingelesez eta galesez kantatzen du Geraint Rhysek (Swansea, Erresuma Batua), eta hainbat diziplinatako artistekin egiten ditu filmak. 2017an, Kataluniako mugimendu independentistaren aldeko kanta bat sortu zuen: Visca la terra. Antzeko zerbait egin du bere herriko mugimendu abertzalearekin.

Nola dago egoera Galesen etorkizunean independentziarako erreferendum bat eskatzeari begira?

Inkestek diote independentziaren aldekoen kopurua gorantz doala. Brexit-aren erreferenduma edo Donald Trumpek irabazi zituen bozak aintzat hartuta, argi dago ezin zaiela soilik inkestei begiratu. Edonola ere, asko ugaritu dira Yes Cymru mugimendu independentistaren partaideak.

Eskoziak independentzia lortuko balu, gauzak aldatuko lirateke?

Eskozia joango balitz, Galesko herritarrek galdetuko lukete ea zein den Erresuma Batuaren funtsa, eta ea ahaztuak eta baztertuak jarraitu nahi duten Ingalaterrarekin duten harreman desorekatu horretan. Katalizatzailea izan daiteke Eskoziakoa.

Zer adierazi nahi duzu Who are you kantarekin?

Bi zentzu dauzka: batetik, auzitan jarri nahi ditut Ingalaterratik Galesen izenean hitz egiten duten horiek; eta, bestetik, nahiko nuke Galesko herritarrek hausnarketa egitea eta planteatzea ea zer izan nahi dugun etorkizunean.

Nortzuk zarete zuek, abestiko «zuek» horiek, alegia?

Ez gara soilik Galesko herria, baizik eta independentzia nahi duten nazio txiki guztiak gara gu.

Zure asmoa da abestia herritarrena bihurtzea eta ez soilik kantari batena izatea, ezta?

Bai. Deialdi bat luzatu nuen Twitter bidez independentziaren aldekoek irudiak bidali ziezazkidaten. Bideoklipean, jatorri, arraza, erlijio eta adin desberdinetako herritarrak ageri dira babesa ematen. Independentzia lortzeko, herriaren mugimendu bat izan behar dugu.

Zer iritzi duzu The National Wales hedabide jaioberriaz?

Iruditzen zait benetan ona dela Galesen bertako komunikabide berriak sortzea. Londresko egunkarietan konfiantza gehiegi jarri dute herritarrek, baina hedabide horiek Ingalaterrako ikuspegia dute, eta ez dituzte aintzat hartzen Galesko albisteak. Gure historia kontatuko duten hedabideak behar ditugu.

Brexit-ak zer aldaketa ekarri dizkio Galesi?

Sentsazioa dut Brexit-ak dagoeneko txikiagoak bihurtu gaituela, haren eraginez bakartuago geratu garela. Galesek independentzia lortzen baldin badu, gustatuko litzaidake herriak kanpora begiratzea eta Europako Batasunera itzultzea.

Gales hizkuntzaren egoera zertan da?

Hizkuntza ofiziala da, eta herritarren %20k hitz egiten dute. Erakunde publikoak legez behartuta daude zerbitzuak galesez ematera.

Kantari asko al daude galesez abesten dutenak?

Badaude. Kultura eta hizkuntza baten osasuna nolakoa den ulertzeko, oso garrantzitsua da haren eszena zertan den ikustea, eta Galesen musikari asko daude. Nik bi hizkuntzatan kantatu ohi dut, galesez eta ingelesez. Who are you? kantari dagokionez, ingelesez abestea erabaki dut, ahalik eta publikorik zabalenera iristeko. Galesez hitz egiten dutenek, bestalde, joera handiagoa dute independentziaren alde egiteko.

Zinemagilea ere bazara. Baduzu proiekturik esku artean?

Gehienetan, pelikulak beste artista batzuekin batera sortzea izaten dut gogoko; baliagarria egiten zait haien sormen prozesuak eta neureak alderatzeko. Azkenaldian, Errusiako artista batzuekin egin dut lan: iaz, Pavel Otdelnoven obraren inguruko film labur bat egin nuen, eta, berriki, Victoria Lomasko artista grafiko eta aktibistaren inguruko film bat amaitu dut.

Nolako artelana sortuko zenuke Boris Johnson Erresuma Batuko presidentearen parodia egiteko?

Zintzoki, Boris Johnsonek ez du nire beharrik parodia baterako; berak bakarrik egiten du hori. Gezurtia eta tranpatia da. Eta esango nuke ez dela ezertarako gai.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

Agnes Karrasch, Basqe Culinary Centerreko afarian, herenegun. ©BCC

Barrunbeetan kozinatzen dena

Enekoitz Telleria Sarriegi

Culinary Zinemako laugarren egunean eman dute 'She Chef' dokumentala. Agnes Karrasch bekadunak jatetxe izardunetan egindako ibilia kontatzen du. Berak eskaini du afaria BCCn.

 ©BERRIA

Bakarraren buru jana

Enekoitz Telleria Sarriegi

Jatetxe batzuk mugak ezartzen hasi dira otordua egitera bakarka doazenei. Kontrara, geroz eta gehiagok eskatzen dute otordua bakarka egitea. Tartean, jendaurrean jateari fobia diotenak ere badaude: 'solomangarefobia' dute.

 ©KANALDUDE

«Errezeta bera da, baina zapore berria eman nahi diot saioari»

Beñat Mujika Telleria

Sei urte eman zituen Crouspeyrek Euskal Irratietan, eta lehen esperientzia du telebistan, Kanaldudeko 'Harri Salda'-n. Adierazi duenez, bertako «kodeak eta moldeak» ezagutzen ari da.
Euskal bixkotxak erakusgai, aurreko ekitaldi batean, Kanbon. ©JOSEAN GIL-GARCIA

Bixkotxaren usaina

Enekoitz Telleria Sarriegi

Euskal bixkotxaren XX. jaia ospatuko dute gaur eta bihar Kanbon. Lehiaketak, tailerrak eta gastronomia ibilaldiak egingo dituzte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Urtzi Urkizu

Informazio osagarria

Iruzkinak kargatzen...