Albistea entzun

ATZEKOZ AURRERA

Bigarrenez lehendabizi

Pandemiak obraren ibilia eten zuen, eta urtebete egin du geldirik. Xentimorik Gabe konpainiak 'Gu primer!' antzezlana taularatuko du berriro, bihar eta etzi, Donostiako Antzoki Zaharrean.
Inazio Tolosa, Nerea Gorriti eta Ramon Agirre aktoreak, atzo, Alkizan.
Inazio Tolosa, Nerea Gorriti eta Ramon Agirre aktoreak, atzo, Alkizan. JON URBE / FOKU Tamaina handiagoan ikusi

Enekoitz Telleria Sarriegi -

2021eko ekainak 9

Diosalak ez du protokolorik; anfitrioiaren araberakoa izan ohi da. Alkizako (Gipuzkoa) Garmendia Azpikoa baserriko txakur zaindariak zaunka betean egiten du harrera. Barruan entseguan ari direnek, berriz, beren instrumentuak atariraino aterata, musikaz eta kantuz, irribarre betean [patata tortillarena eta etxeko sagardoarena... ez dira denak hemen jartzekoak].

Inazio Tolosa klarinetearekin ari da; Nerea Gorriti, teklatuarekin, eta Ramon Agirre, gitarrarekin. Badute pox bat urduria, keinu bat artega: ilusioa deitzen zaio. Primer bat segun bihurtu zaie, bigarren bat lehendabiziko. Xentimorik Gabe konpainiak (xentimorikgabe@gmail.com) iazko ekainaren 13an estreinatu zuen Gu primer! antzezlana, Donostiako Antzoki Zaharrean, eta urtebete geroago bueltatuko da toki berera, bihar eta etzi. Pandemiak eta aktoreen beste konpromisoek eten zuten obraren ibilia. Ramon Agirre La Casa de Papel telesaila grabatzen aritu da—www.berria.eus-en dago ikusgai Madrilerako joan-etorrietan idatzitako Joan-etorriko paperak kaiera—, eta Konpromisoa antzezlanarekin ere ari da. Inazio Tolosak Kutxidazu bidea, Ixabel musikalarekin segitu du, eta klaseak ematen ere bai. Nerea Gorriti Xake Produkzioak konpainiaren Lur emanaldiarekin aritu da, eta Vaiven konpainiaren Ni munduko txarrena obrarekin.

«Berriz haste bat» da Antzoki Zaharrera bueltatzea, «eta hasierako ilusio berberarekin», Ramon Agirrek dioenez. Itxialdiaren ostean antzoki horretan estreinatu zen lehen obra izan zen Gu primer!. Urtebete joan da, eta aldatu da zerbait tartean —edo ez horrenbeste—. Inazio Tolosa: «Ni tonto samarra naiz, eta beti ikusten dut argia tunelaren amaieran. Duela urtebete ere ikusten nuen, eta orain ere bai; halako abilidadea daukagu batzuk. Txertatuta gaude, beste egoera batean gaude, eta ea behingoz pandemiari protagonismoa kentzen diogun».

Laugarren antzezlana

Gu primer! elkarrekin ondutako laugarren antzezlana dute Ra- mon Agirrek eta Inazio Tolosak. Xentimorik gabe (2010) izan zen lehena, eta haren atzetik heldu zi- ren Kokakola eta barea (2013) eta Putinen guardasola (2015). Guztietan Ray eta Nik izan dira bi aktoreak, eta beti musika eta umorea izan dituzte bidelagun. Ramon Agirre: «Egun hauetan berriro abestiekin-eta hasi garenean, irribarrea irteten zitzaidan. Oso ondo pasatzen dugu hau egiten. Xentimorik Gabe konpainiak egin duen gauzarik biribilena da, eta horren erru handia dauka Nerea Gorritiren inkorporazioak. Bitik hirura, musikan bereziki, salto handia da».

Agus Perez BERRIako antzerki kritikariak Ray eta Nik pertsonaiei buruz idatzi zuen bi musikari «bohemio, axolagabe, despistatu, ganberro eta inuxente» direla. Nerea Gorritik dio «ganberroak» direla, batez ere, baina: «Bi hauekin ni ilargiraino joango nintzateke. Oso giro ona dugu».

Agirrek erantzun du konplize: «Oso ondo ekarria ilargiarena Nerea». Izan ere, horixe da obrak kontatzen duena: 1969an ilargira iristen lehenak bi euskaldun izan zirela. Alegia, Ray eta Nik izan zirela primer, baina sekretupean egon dela hori orain arte. Ramon Agirrerena eta Egoitz Lasarena da testua, eta Asier Sotarena zuzendaritza.

Aldaketa batzuekin

Ostiraletik aurrera ikusiko den obra ez da aurrekoaren «guztiz» berdina. Testuari eta musikari «ukitu batzuk» egin dizkiotela aurreratu du Agirrek: «Nahiz eta istorioa duela 50 urte ustez gertatutako zerbaiten ingurukoa den, edozein pasartek ekartzen zaitu gaur egunera. Egoera aldatuz doan heinean, gure ikuskizunak ere kolore berriak hartzen ditu. Ondo dago hori baliatzea».

Gabonetako apaingarriak urre koloreko lanparetan, biga zahartu batean telefono zartatu bat. Jarraitu egiten du musikak Garmendia Azpiko egongelan. Azken ohar bat: «Etor dadila jendea beldurrik gabe. Kutsatzekotan, umorea kutsatuko diogu».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Iruñeko Arrotxapea auzoko Runa parkea, atzo eguerdian. Ostiralean zabaldu zituzten barrakak. ©IDOIA ZABALETA / FOKU

Ihesbide bat Runa parkean

Ane Eslava

Sanferminak aurten ere bertan behera gelditu diren arren, Iruñean barrakak jarri dituzte. Uztailaren 3ra arte egongo dira zabalik. Langileak itxaropentsu daude; bisitariak, ilusioz beterik.

 ©GUILLAUME FAUVEAU

«Baionako zikin garbitzaileak ezagutu ditut behi eta orgekin»

Ainize Madariaga

Erramun «denek» ezagutzen dute Baionan: hiriko arima da. Bestek har lezakete haren izena. Bar Du Marcheko ostalerrak «azkar» aldatzen ikusi du hiria, bai Banka sorterria ere.
<em>Onward</em> animaziozko filma (2020) katalanez ikus daiteke Disney Plus plataforman. ©PIXAR / EFE

Disney Plus, katalanez

Urtzi Urkizu

Katalanera bikoiztutako 25 lan ikus daitezke 'streaming' plataforma horretan. Azken bi asteetan jarri dituzte zerbitzuan 25 film horietatik 21

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.