Albistea entzun

ATZEKOZ AURRERA. Assumpta Aierdi. Ekintzaile soziala

«Kultura parte-hartzaileak dira bide eraldatzaileak»

Historialaria da Aierdi. Aniztasuna eta generoa lantzen ditu formakuntza saioetan, hezkuntzan zein erakunde eta enpresetan. «Bizipenei balioa eman, eta horietatik abiatzen gara eraldaketarako».
GORKA RUBIO / FOKU Tamaina handiagoan ikusi

Urtzi Urkizu -

2023ko martxoak 21 - Donostia

Maider Sagredorekin batera, Sorginlore sortu zuen Assumpta Aierdik (Donostia, 1972). 2018. urtetik, aholkularitza, formakuntza eta dinamizazioa eskaintzen dute metodologia praktikoen bidez. Nortasuna Sarean jardunaldian parte hartuko du bihar Donostiako San Telmo museoan (18:30). Komunikazio parekidearen miopiak aztertuko dituzte hizlariek.

Azkeneko urteetan aldaketarik ikusi al duzu komunikazio alorrean genero ikuspegitik?

Bai, aurrerapausoak izan dira. Kontzientzia gero eta handiagoa da. Hiztegi ez-sexista erabiltzen saiatzen da jendea, eta formakuntza ere ari dira jasotzen komunikazio arloko profesionalak.

Bidea dago egiteko oraindik, ordea, ezta?

Hala da. Eguneroko bizimoduan, txantxetan ikusten da, adibidez. Halaber, batzuen aldetik erresistentzia dago. «Beste lehentasun batzuk daude» edo «zer astuna!» moduko iruzkinak entzuten ditugu.

Nortasuna Sarean jardunaldia iragartzeko bideoan labur esan duzu batzuk ez direla eroso sentitzen betaurreko moreak jartzen.

Pertsona batzuek uste dute jada badauzkatela betaurreko moreak, eta ikusten dute beren burua zalantzan jartzen dela.

Bide eraldatzaileak helmugan esaldia ageri da Sorginloreren webgunean. Zein dira bide eraldatzaile horiek?

Iruditzen zaigu kultura parte-hartzaileak direla bide eraldatzaileak. Sakonean aztertuz gero zer ahots aintzat hartzen diren, zer bizitza, zer gorputz, eta, denei tokia ematen asmatzen badugu, hori bada bide eraldatzaile bat. Pausoka goaz eraldatzen, egoerara egokituta, pertsonei egokituta. Eta autokritikoak izan behar dugu desberdinkerien aurrean.

Zer ezaugarri izaten dituzte zuen formakuntzek?

Aniztasuna eta generoa lantzen ditugu. Oso egokituak daude talde edo erakunde bakoitzaren errealitatera, eta herri hezkuntzan eta pedagogia feministan oinarritzen gara. Bizipenei balioa eman, eta horietatik abiatzen gara eraldaketa egiteko.

Hezkuntza sistemari dagokionez, betaurreko moreak falta al dira?

Gu orain hezkidetza biltzarra ari gara prestatzen, ekainerako. Erronka handia dago hezkuntzan. Agerikoa da zein erreferentzia dauden gidaliburuetan, ariketetan, jolasetan, eta nola pentsatzen diren rolak. Horrez gain, ez da gauza bera emakume zuri aberats bat edo andre arrazializatu bat... Desberdintasun horiek ikusten dira eskolan.

Ikasleak ez dira askotan okerrenak, ezta?

Gogorrak gara horrekin, baina haiek aniztasuna zuzenean ari dira bizitzen, eta normaltasun gehiagorekin bizi dute. Helduok gara sarri zama dugunak.

Sakelako telefonoari lotuta bizi dira gaztetxo asko. Zer gomendatuko zenuke sare sozialen erabilerari dagokionez?

Gazteek erabiliko duten komunikazio kanal bat da, eta kontua da nola hezi pentsamendu kritikoarekin, erabilera funtzionala eta kritikoa egin dezaten. Ez nieke esango tresna etsaia dela, ez baitugu ezer lortuko. Edonola ere, kultura matxista daukagu, eta hori islatu egiten da sare sozialetan: helduon Whatsappetan ere bai.

Emakumeen indarra izeneko kaiera eman duzue argitara. Zer garrantzi du emakume desberdinen lekukotzak jasotzeak eta zabaltzeak?

Erabatekoa. Donostian eta Hernanin [Gipuzkoa] egin genuen lan hori. Intentsoa eta hunkigarria izan zen. Hainbat emakume taldetako kideekin haien indarraz hausnartu genuen. Indar hitzaz ere mintzatu ginen, indarkeriarekin lotzen baita askotan. Jatorri, bizipen eta egoera oso desberdinetako andreen ahotsak entzutea funtsezkoa da gure begirada zabaltzeko.

Gizarte parekide bat lortzeko, pauso asko behar dira?

Plano desberdinetan egin behar da lan: legea, hezkuntza, politikak, berdintasun planak... Guk bizikidetza planetan aniztasuna eta berdintasuna uztartzen ditugu. Plano sinbolikoan eta kulturalean ere eragin ahal da, nahiz eta ez den erraza.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©IDOIA ZABALETA / FOKU

«Izuturik egon naiz; baina arrazionala da?»

Iker Tubia

Energia krisiaren eta klima aldaketaren aurrean, filosofia aldarrikatu du Basartek, erabaki eraginkorrenak hartzeko ezinbestekotzat jotzen baitu arrazoian oinarritzea. Altruismo eraginkorrean aritzen da orain.
Erreserbetan bermeak eskatzen hasi dira hainbat jatetxe. ©BERRIA

Bezeroak etorriko diren esperoan

Unai Etxenausia

Jatetxeei galera nabarmena ekar diezaieke bezeroek erreserba bat egin, ez direla joango abisatu ez eta, azkenean, ez agertzeak. Horrelakoak ez gertatzeko, hainbat jatetxe bezeroei bermeak eskatzen hasi dira erreserba egiten duenean, bezeroak lotzeko eta galerak gutxitzeko.

La Zurdako kide Andrea Ganuza, bere komikia aurkezten, La Zurda Berria jaialdian, maiatzaren 24an. ©MIRARI ETXABARRIA

Artearen jaialdia, denen esku

Itsaso Jauregi

Iruñeko La Zurda Berria jaialdian tailerrak eta arte erakusketak egin dira maiatzaren 26tik ekainaren 10era. Esperimentatzeko espazio seguru bat sortzea da helburua.

Atal berria du estilo liburuak: ikus-entzunezkoena. ©BERRIA

BERRIAren estilo liburuan atal bat sortu dute ikus-entzunezkoei buruz

Urtzi Urkizu

Irizpideak landu dituzte belarrirako nola idatzi, nola ahoskatu eta azpidatziak nola egin zehazteko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Urtzi Urkizu

Informazio osagarria

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.