Albistea entzun

PROPOSAMENAK

Etorkizuneko artzainen argia

Nafarroako Artzain Eguna eginen dute etzi, Uharte Arakilen. Ardi latxen erakusketa eta lehiaketa, esne ekoizpen eta gazta lehiaketa, eta artzain txakurren lehiaketa eginen dituzte
Artzain gazte bat, ardi bati ilea mozten, Uharte Arakilgo Artzain Egunean, 2018. urtean.
Artzain gazte bat, ardi bati ilea mozten, Uharte Arakilgo Artzain Egunean, 2018. urtean. JAGOBA MANTEROLA / FOKU Tamaina handiagoan ikusi

Iker Tubia -

2022ko abuztuak 26

Pandemiak gelditu bazuen ere, jarraitzeko gogoz dira. Nafarroako Artzain Eguna bueltan da, eta berrogeita hamalaugarren aldia eginen du etzi, Uharte Arakilen (Nafarroa). «Etorkizuneko artzainentzako arbasoen legatua den artzaintzari eustea eta hura gordetzea da festakizunaren helburua», azaldu dute antolatzaileek. Horregatik, bestarekin «irmotasunez jarraitzea» da haien nahia.

Jarraituko dute Artzain Egunean egiten diren jarduera nagusiek ere. Nafarroako ardi latxen erakusketa eta esne ekoizpenaren lehiaketa eginen dute, hogeita hemezortzigarren aldiz; Latxa arrazako ardiaren lehiaketa ere bai, hamazazpigarren aldiz; Nafarroako ardi latxen esne gordinarekin egindako gazta lehiaketak berrogeita batgarren aldia izanen du, eta Nafarroako artzain txakurren lehiaketa antolatuko dute, berrogeita hamalaugarren aldiz. Artzain txakurren erakustaldia ere izanen da. Txapelketa gehienak goizez izanen dira, 10:30etik aurrera, eta guzien emaitzak artzaineguna.eus atarian paratuko dituzte egunean berean. Sari banaketa 13:30ean izanen da.

Artzain txakur txapelketa izaten da mira gehien sortzen duen ekitaldietako bat, eta hori arratsaldean izanen da: 17:00etan. Irabazlea Oñatiko nazioarteko txapelketan eta Euskal Herriko txapelketan sailkatuko da. Goizez artisautza eta gazta azoka izanen dira herriko karriketan, eta 11:30ean artaldea karriketan barrena ibiliko dute. Ardiki eta gazta fresko dastaketak eguerdian izanen dira.

«Gaztagileendako eta sektorerako egun garrantzitsua da, haien produktua kaleratzeko aukera dutelako, eta beren burua ikusarazteko eta iragartzeko eguna delako Artzain Eguna», azaldu du Aritz Razkin Aralar Mendi kultur elkarteko lehendakariordeak. Elkarte horrek antolatzen du Artzain Eguna. Hain zuzen ere, aurtengo erronka «eustea» eta «jarraitzea» dela nabarmendu du. «Indarberriturik» eta «ilusioz» antolatu dute berrogeita hamalaugarren Artzain Eguna: «Gogotsu eta ahalegin handiekin gatoz inoiz baino garrantzitsuagoa den festaren berpizkundearekin, hau baita lehen sektoreari lagundu eta hura sustatzeko ezagutzen dugun modua».

Artzaintza iraunkorra

Kontzientziak pizteko mezu argi bat ere eman nahi dute aurten: «Funtsezkoa da gure ingurumenarekin erlazio positiboa izaten lagunduko diguten jardueren kontzientzia hartzea eta egunerokotasunean ohitura onak barneratzea; izan ere, bertatik dator gure euskarria: etorkizuneko belazeak, biharko artaldea eta geroko belaunaldiek sortuko duten gazta».

Artzain Eguna 1968. urtean egin zuten lehenbiziko aldiz Nafarroan. Oñatin (Gipuzkoa) artzain txakur txapelketa egiten hasi ziren 1961ean, eta, arrakasta ikusirik, Euskal Herri guzira zabaldu zuten lehia. Nafarroan, Uharte Arakilen egitea erabaki zuten.

Artzain Eguna

Etzi, 10:00etatik aurrera, Uharte Arakilen (Nafarroa).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / FOKU

«Argazkiak badauka benetakoaren zigilua, eta hitzek ez»

Enekoitz Telleria Sarriegi

Argazkilaritza dokumentalean sinisten du Morelesek: «Informazioa edukitzea kontzientzia edukitzea da, eta horrek ekitera eramaten zaitu». 'Urtzearen aztarna' paratu du Donostian, klima aldaketaz ohartarazteko.

 ©JON URBE / ARGAZKI PRESS

Basogintza eredu berri baterantz

Unai Etxenausia

Ez dago «baso perfektua» sortzeko errezeta magikorik, aldakorra baita Euskal Herriko paisaia. Errez kooperatibako kideak eredu berri bat ari dira lantzen eta proposatzen: baso bakoitzak espezie autoktonoak eta genetika ezberdinekoak izan behar dituela diote, «baso irregularrak» bihur daitezen.
Kotoi markak Irizarren autobusetako ehuna erabiliz sortutako jantziak. ©GORKA RUBIO/ FOKU

Moda egiteko beste modu bat

Amaia Jimenez Larrea

'Ekomoda' erakusketa jarri dute Ezkioko Igartubeiti baserri-museoan, maiatz hasierara arte. Autobusetan erabili gabeko ehunekin egindako jantziak daude ikusgai.
Naizen elkartearen aurkezpen eguneko argazkia, Donostiako Antzoki Zaharrean. ©GORKA RUBIO / FOKU

Naizendarren festa

Ane Insausti Barandiaran

Naizen elkarteak Bigarren Hezkuntzarako sortutako ikus-entzunezkoak eta kamiseta berriaren diseinua aurkeztuko ditu gaur, urteroko festan

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.