Ekintza ugariz osatutako egitaraua antolatu dute. Alkateak 10:30ean hasiko du festa, udaletxean bertan. Ondoren, tiketen salmenta hasiko dute. Beste urte batzuetan bezala, bost euro balioko du: tiketarekin, hiru ardo eta hiru pintxo txistorra hartu ahalko dira. Ardo kopa bat oparituko dute tiketa hartzean.
Tomatea lehiaketak egiteko ere erabiltzen dute Cadreitan: etziko festan, tomate itsusiena eta pisutsuena sarituko dituzte; baita haurrek tomateei buruz egindako marrazkiak ere; tomateak botako dituzte diana batera; eta tomate jaurtiketa ere egingo dute. Lehiaketa guztiak San Anton parkean izango dira.
Eguneko momenturik garrantzitsuena eta ikusgarriena izaten da tomate jaurtiketarena, herrian pesotomate deitua: tomatea urrunen jaurtitzen duenak irabazten du. Iazko lehiaketan, irabazleetako batek 70 metrora jaurti zuen. Aurtengo lehiaketa 13:00etan izango da. Irabazleek 200 euroko saria jasoko dute.
Lehiaketen ondoren, herri bazkaria egingo dute, 14:30ean. Jamaika Show orkestrak girotuko du bazkalostea. Eguna bukatzeko, bigantxak izango dira herriko kaleetan, Pedro Vergara ganadutegikoak, 18:30etik 20:30era.
Egunean zehar, herriko taberna guztietan ekintza berezi bat egingo dute: tomatea osagai nagusi duten pintxoak eta baso bat ardo erosteko aukera egongo da, bi euroan.
Aurtengo Tomatearen Egunak berrikuntza bat izango du: tomatearen tonbola. Tiketak euro batean salduko dituzte, eta 80 sari baino gehiago banatuko dira. Sarietan banatutako diru guztia bertako merkatuan salgai egongo diren produktuetan gastatzeko izango da.
