Albistea entzun

PROPOSAMENAK

Dantzaz beteriko festak

Martxan dira Laudioko San Roke jaiak, Jabier Artetak txupinazoa bota eta agurra irakurri ostean. Bi txandatan egingo dituzte jaiak: lehen txanda, bihar arte; ondoren, hilaren 24tik 28ra
Jendetza bildu ohi da festen hasieran Laudion.
Jendetza bildu ohi da festen hasieran Laudion. LAUDIOKO UDALA Tamaina handiagoan ikusi

Maixa Utrera Puelles -

2022ko abuztuak 16 - Gasteiz

Dantza eta musika artean abiatu dira sanrokeak Laudion (Araba). Atzo hasi ziren jaiak, 12:00etan Jabier Artetak suziria bota ondoren. Jarraian, herriko kaleetan gora eta behera, festen aurreneko kalejira egin zuten laudioarrek, erraldoi eta buruhandien laguntzaz. Egun osoan hainbat kontzertu eta ekintzaz gozatzeko aukera izan zuten herritarrek, eta, gaur, gogoz jarraituko dute festarekin.

Goizean goizetik, musikak girotuko ditu Laudioko kaleak, San Roke egunean. 09:00etan, kalejira egingo dute Lankaietako Lagunak txistulariek, eta, ordubete geroago, Ekin Joleak taldekoek. 11:00etan, dianak egingo dituzte, lo geratu diren horiek esnatu, eta jai egun berria hasi dela ohartarazteko. Ordu berean izango da eguneko lehenengo entzierroa, eta 12:30ean bigarrena. Azken hori amaitu eta gero, bigantxak egongo dira 16 urtetik gorakoentzat.

Goizean, talde eta peñekin batera, kaleak musikaz eta kolorez beteko dituzte herritarrek. 14:30 aldera, txosnetan bilduko dira, herri bazkaria egiteko. Sabela bete, eta, 16:00etan, berriz ekingo diote arabarrek dantzari. Lehenik disko festan, eta geroago erraldoi, buruhandi eta txistulariekin batera.

Euskal dantzek ere beren lekua izango dute jaietan. Itxarkundia dantza taldeak Alberto Acero plazan antolatu dituen euskal dantzen lehiaketak bi izango dira: 18:00etan aurresku lehiaketa, eta 19:00etan fandango eta arin-arin dantzena.

Arratsalde osoa dantzan eman ostean, herritarrek berriro ere indarra hartzeko parada egingo dute. San Roke ermitan elkartuko dira, 20:00etan, barbakoaz gozatzeko. Berrindartuta, Lamuza parkean disko dantzan arituko dira ume zein heldu; eta, eguna amaitzeko, zezensuzkoak aterako dira herriko plazara.

Dantzatu eta abesteko gogoarekin geratzen direnek Chica Sobresalto eta Doctor Deseoren kontzertuez gozatzeko aukera izango dute plazan bertan, 23:00etatik aurrera. Bien bitartean, txosnetan, Las Sexpeare, Erroka eta Gora Etorri taldeak arituko dira jotzen.

Aurpegi ezagunak jaietan

Laudio Arabako herri ezagun bat izan arren, Euskal Herriko hainbat txokotan guztiz ezezaguna da. Hala eta guztiz ere, Laudiok behin baino gehiagotan frogatu du hango jaiak edozein euskal hiriburutakoak bezain onak izan daitezkeela. Izan ere, asko dira egunotan Laudiotik igaroko diren aurpegi ezagunak. Zea Mays han egongo da bihar, esaterako. Hurrengo egunetan ere kontzertu handiak eskainiko dituzte herrian zenbait taldek: Depistaos taldeak, abuztuaren 24an; La Pegatinak, 25ean; eta La Oreja de Van Goghek, 26an.

Iluntzera arte dantzan eta abesten ibili ostean, abuztuaren 28an, Cofradiaren eguna deritzonean, amaituko dira jaiak. 23:30ean Laudioko BHItik irtengo da jaien azkenengo kalejira, eta Roketxu panpina erretzearekin batera amaituko dira Laudioko festak.

Laudioko sanrokeak

Laudion (Araba), gaur eta bihar; eta abuztuaren 24tik 28ra.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Geu elkartearen herri bazkaria, atzo, Landatxon. ©RAUL BOGAJO / FOKU

Loratzen jarraitzeko

Edurne Begiristain

Geu elkartearen 30. urtemuga ospatzeko, egun osoko jaia egin dute Gasteizen. Elkarteko kideen ustez, «mugarri» bat ezarri da euskarak hiriburuan dituen erronkei heltzeko.
 ©OSKAR MATXIN EDESA / FOKU

«Dena dut gogoan: iruditzen zait italiarrak ikusten ari naizela zubitik etortzen»

Amaia Igartua Aristondo

Ederto gogoratzen ditu Basabek 1936ko gerran eta frankismoan bizi izandakoak: hegazkin bonbardatzaileak, italiarrak, beldurra eta gosea; egur eta ikatz bila joan behar izatea txikitan, amari ezer ez faltatzeko. «Bizitza osoan eraman behar da hori».
 ©BERRIA

Hamaikak telebista adimendunetarako bere aplikazioa estreinatu du

Enekoitz Telleria Sarriegi

Hamaikaren digitalizazioan «beste jauzi bat» da aplikazioa. Ostiralean jarri zuten eskuragarri

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.