Los Sabandeños taldeak hasiko du jaialdia gaur, Hondarribiko Arma plazan, 21:30ean. 1966an sortu zuten taldea, Kanaria uharteetan, Sabandan (Espainia): unibertsitateko ikasle multzo bat biltzen hasi zen ostiralero, parranda giroan, eta azkenerako konpromisoa hartu zuten uharteetako musika babesteko eta hedatzeko. Hala, 95 lan argitaratu dituzte honezkero, eta hango musika tradizionalaren erreferente nagusienetako bat bihurtu dira; itsasoa eta historia tarteko, taldearen abestiek Europako, Amerikako eta Afrikako eraginak dituzte.
Atrebentziaren alde ona
Irunek hartuko dio lekukoa bihar Hondarribiari: Sharon Shannonek kontzertua emango du Urdanibia plazan, 21:00etan. Shannonek ikusleei ustekabeak ematea du gustuko, eta kemen horrek ikur bihurtu du, bi hamarkadatik gorako ibilbidean. Trebea da eskusoinuarekin, biolinarekin zein flautarekin, eta jakin-minak hainbat musika estilo probatzera eraman du: musika klasikoa, reggaea edo hip-hopa, besteak beste.
Hendaian amaituko da jaialdia, etzi, Zokoburun, Dyaa Zniber & Groupe Patriomoine de la Musique Andalouse Marocaine taldearekin: 20:30ean izango da kontzertua. Horren aurretik, Alma Gitanak dantza saioa emango du 19:00etan.
