Albistea entzun

Datorren asteko estreinaldiak

Txikien mundua ispilu

'Un monde'-k 'bullyng'-aren ertz ilunak islatzen ditu bi anai-arreba gaztetxoren begirada ardatz harturik. Laura Wandelen lehen filma da, eta harrera ona izan zuen Cannesko jaialdian
Nora eta Abel anai-arrebak dira <em>Un monde</em> filmeko protagonistak; errealitate gordin bat bizi dute.
Nora eta Abel anai-arrebak dira Un monde filmeko protagonistak; errealitate gordin bat bizi dute. BERRIA Tamaina handiagoan ikusi

Gorka Erostarbe Leunda -

2022ko otsailak 19

Eskolako jolastokia. Mundu oso bat. Umeetako askorentzat, eguneko unerik ederrena igarotzeko lekua; beste zenbaitentzat, amesgaiztoen gunea, ia infernua. Un monde-k jolastoki hori guduzelai gisa erretratatzen du; unibertso propio baten izaera ematen dio. Gizartean gertatzen diren gatazken metafora bat ere bada, eta hortik filmaren izenburua ere: Un monde. Mundu bat, bere gatazka, dibertimendu eta arauekin. Eskolako heldu jendearen unibertsotik aldenduta, mundu horretan neska-mutikoek jolastu egin dezakete eta ondo pasa dezakete, baina paira dezakete beste haurren jazarpena eta gisa askotako injustiziak, paira dezakete bullyng-a .

Laura Wandel zinemagile belgikarraren lehen filma da Un monde, eta Cannesko zinema jaialdian aurkeztu zuten, baita Fipresci saria eskuratu ere. Zuzendariak behaketa gertuko bat transmititu nahi du, horretarako kamera protagonisten aurpegietatik oso gertu jarriz, eta lehen plano horietan miserien eta erasoen kateatze bat marrazten da, konpontzeko batere itxurarik ez duena.

Lehengo eta egungo errealitate gordina da eskolako jazarpena, nahiz eta lehen akaso ez zuen izendapen hori, akaso izendapenik ere ez; eta gordinki islatzen du filmak. Ez dago ia inolako afekturik, ez dago ia enpatiarik. Salbuespen gutxi batzuekin, jende heldua apenas arduratzen den umeen arteko eraso eta jazarpenez, eta haurren artean ere inor ez da bereziki kezkatzen eraso egiten dioten horretaz. Haienganako keinu adeitsuak oso urriak dira.

Indiferentzia horri eskapo egingo dio Nora txikiak (Maya Vanderbeque), ordea; hark ez du nahiko bere adinekoekin jolastu, baizik eta etengabe bere anaia Abelen ondoan egon nahiko du (Gunter Duret). Apur bat zaharxeagoa da Abel, eta ezin izango dio kasu handirik egin arreba txikiari, nahikoa baitu etengabe pairatzen dituen eraso eta abarrak saihesten. Are, arreba txikiaren aldiroko presentziak zaildu egiten du anaiaren egoera, zaildu besteekiko harremana eta besteen erasoak leuntzeko ahalegina.

Baina arreba ez dago geldi egoteko; arreba da, eta kezkatu egiten du anaiaren egoerak. Abisua pasatzen die helduei, irakasleei, ingurukoei, baina apenas egiten dioten kasurik: «Mutikoen kontuak dira» da jasotzen duen erantzuna.

Kamera hurbilean

Gai eta planteamendu zail bat dakar filmak: zer egin dezake mutiko batek halako egoera batean, eta zer egin dezake bere arreba txikiagoak, gainera ikusirik inguruan duen tentsio horrek guztiak bere egoera ere are zailtzen duela? Un monde filmean, Laura Wandel zuzendariak kamera sorbalda gainean erabiltzea hautatu du, ia kontaketaren protagonismo guztia Noaren aurpegieran utziz. Horrela, sentsazioen gordina ia bere larruan bizi du ikusleak, eta apenas ikusten den erasotzaileen aurpegirik ere. Helduak ere ez dira askotan azaltzen, eta ematen du, hain zuzen ere, beste mundu batean bizi direla. Alabaina, era berean, azaltzen duten indiferentzia horrek berak gogoetarako bide ematen du; umetan jazarle izandakoak izan litezke heldutan hezitzaile behar dutenak...

'UN MONDE'
Zuzendaria. Laura Wandel.
Aktoreak. Maya Vanderbeque, Günter Duret, Karim Leklou, Laura Verlinden.
Herrialdea. Belgika. Urtea. 2021.
Iraupena. 72 min. Generoa. Drama-bullyng-a.
Estreinaldia. Otsailaren 25ean estreinatuko da Hegoaldean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / FOKU

«Argazkiak badauka benetakoaren zigilua, eta hitzek ez»

Enekoitz Telleria Sarriegi

Argazkilaritza dokumentalean sinisten du Morelesek: «Informazioa edukitzea kontzientzia edukitzea da, eta horrek ekitera eramaten zaitu». 'Urtzearen aztarna' paratu du Donostian, klima aldaketaz ohartarazteko.

 ©JON URBE / ARGAZKI PRESS

Basogintza eredu berri baterantz

Unai Etxenausia

Ez dago «baso perfektua» sortzeko errezeta magikorik, aldakorra baita Euskal Herriko paisaia. Errez kooperatibako kideak eredu berri bat ari dira lantzen eta proposatzen: baso bakoitzak espezie autoktonoak eta genetika ezberdinekoak izan behar dituela diote, «baso irregularrak» bihur daitezen.
Kotoi markak Irizarren autobusetako ehuna erabiliz sortutako jantziak. ©GORKA RUBIO/ FOKU

Moda egiteko beste modu bat

Amaia Jimenez Larrea

'Ekomoda' erakusketa jarri dute Ezkioko Igartubeiti baserri-museoan, maiatz hasierara arte. Autobusetan erabili gabeko ehunekin egindako jantziak daude ikusgai.
Naizen elkartearen aurkezpen eguneko argazkia, Donostiako Antzoki Zaharrean. ©GORKA RUBIO / FOKU

Naizendarren festa

Ane Insausti Barandiaran

Naizen elkarteak Bigarren Hezkuntzarako sortutako ikus-entzunezkoak eta kamiseta berriaren diseinua aurkeztuko ditu gaur, urteroko festan

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.