ATZEKOZ AURRERA

Transmisioa berma dadin

Tolosako inauteriak gerturatu ahala, hainbat gazte kuadrilla jo eta ke ari dira karrozak berritzen. Udalak 90 dezibeleko muga ezarri dio karroza bakoitzari aurtengo jaietarako.
Tolosako kuadrillak hasi dira inauterietarako karrozak prestatzen.
Tolosako kuadrillak hasi dira inauterietarako karrozak prestatzen. J. C. RUIZ / FOKU Tamaina handiagoan ikusi

Mikel Orañanos Iribar -

2020ko otsailak 15

Urduritasuna nabaria da Tolosako (Gipuzkoa) kaleetan, egun gutxi geratzen baitira inauterietako festak eztanda egiteko. Jaiak gozatzeko, ordea, prestaketa lana egitea ezinbestekoa izan ohi da. Usabalgo poligonoan, esaterako, ezohiko mugimendua sumatzen da; trailerrak joan-etorrian ibiltzeaz gain, inauterietako karrozak egiten dabiltzanak ere badira, bakoitza bere erritmoan.

Iaz erabili zuten karroza berberarekin aterako dira kalera gehienak. Soilik atoiaren gainean dagoen plataforma aldatu edota kanpoko diseinua berritzen diote, karrozarekin ateratzea ez baita merkea. Iker Sukiari eta haren kuadrillakoei, esaterako, lan franko ematen ari zaizkie soldaketa lanak. Sukiaren lagun baten gurasoek utzi zieten atoi zaharra, eta plataformaren gainean baranda batzuk jartzeko ahaleginetan dabiltza. «Eskerrak gutxi batzuk soldaketa lanetan iaioak diren», dio, barrez. Bi aste daramatzate lanean, eta egunean bertan erruleta lehiaketa bat antolatuko dute.

Kuadrilla guztietan gertatzen den moduan, hiruzpalau lanean dabiltzan bitartean,beste guztiak begira egon ohi dira. Xabi Artieda da horietako bat. Halere, harena izan da aurtengo inauterietako ideia, Madrildik ekarria, gainera. «Bingo lehiaketa antolatzeaz gain, egoera horretan sortzen den ikuskizun bat imitatuko dugu». Horretarako, aurkezle eta zerbitzari mozorrotuko dira. Karrozaren iazko hezurdura mantendu duten arren, kanpotik gorriz margotu dute brotxaz, eta pabiloi ondoko enpresan erositako egurrarekin eta metalarekin itsasontzi bat irudikatuko dute. Artiedarentzat zazpigarren aldia da karroza handietan ateratzen. «28 urte edukita ere, tradizioari eutsi egin behar zaio».

30 lagunek osatzen dute taldea, eta, beste guztiek bezala, igandean eta asteartean karrozarekin ateratzeko asmoa dute. 08:30ean elkartuko dira karroza udalak esandako lekura eramateko. 11:00etan, karroza guztiak finkatuta daudela, bakoitzak bere ikuskizuna emango du jendaurrean. «Eguneko unerik txarrena amaieran karrozak berriz ere Usabalera eramatea izaten da. Halere, aurpegi ona jartzen ere badakigu», esan du Artiedak.

Era guztietako diseinuak ageri dira Usabalgo pabiloian: txinatar etxe bat, tanke bat, edota elizaren diseinuan oinarritutako karroza. Tentu handiz, karrozaren kanpoaldeko zuloak tapatzen dabiltza Ainhoa Urkia eta Julen Vecino. Jaunartze bat egingo dute, eta hala, apaiz, sakristau eta ikasle mozorrotuko dira. Dantzaldi bat ere prestatu dute, entseguekin «larri» dabiltzan arren.

Urkiaren eta Vecinoren egoera bertsuan dago Josune Sanchezen taldea ere, nahiz eta urtarrilean hasi ziren lanean. «Oihaneko animalia gisara mozorrotuko gara», zehaztu du Sanchezek. Guraso izanda ere, seme-alabekin ateratzeko asmoa dute karrozan. «Gure arbasoek karrozen gainean magia egiten zuten, eta usadio hori belaunaldiz belaunaldi transmititu egin behar da. Inauterietako tradizioak bai ala bai bizirik iraun behar du».

Dezibelen mugan, zalantza

Karrozen, konpartsen eta txarangen arteko harremana «ona» izan dadin, udalak lege bat jarri du martxan. Hemendik aurrera, karroza bakoitzak 90 dezibelera arteko muga izango du musika jartzeko. Arau berri horrek zalantza sortu du karrozetan aterako diren gazteen artean. Vecinoren ustetan, 90 dezibeleko mugarekin musika «oso gutxi» entzungo da. Artieda ere iritzi berekoa da: «30eko talde batean konpartsan ateratzen diren azken lerroetakoek hutsaren hurrengoa entzungo dute».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ezkerretik eskuinera, Inma Moro, Itziar Llanera eta Begoña Olaskoaga, Arrondegiko osasun etxean. ©LUIS JAUREGIALTZO / FOKU

Aztarnariak zaintzaile

Maite Asensio Lozano

Koronabirusean positibo eman dutenen gertuko kontaktuak bilatzea baino gehiago da aztarnari sistemako kideen lana: gaitzari eta bakartzeari buruzko informazioa emateaz edota zailtasunak dituztenen jarraipena egiteaz ere arduratzen dira.

PCR proba bat, Donostian. ©Idoia Zabaleta, FOKU

Beste 855 positibo atzeman dituzte Hegoaldean

Uxue Rey Gorraiz

Inoiz baino PCR proba gehiago egin dituzte azken egunean: 14.298, zehazki. Horietatik 855 kasutan detektatu dute birusa. 337 Nafarroan detektatu dituzte. Aurreko egunean, laurehunetik gora izan ziren lurralde horretan, lehenbiziko aldiz.

Miren Basaras, EHUko COVID-19aren Zaintza Batzordeko arduraduna. ©EHU

EHUk Miren Basaras izendatu du COVID-19aren Zaintza Batzordearen arduradun

Mikel O. Iribar

Mikrobiologoa eta EHUko irakaslea da Basaras, eta koronabirusaren ikerkuntzan badu esperientziarik. Zaintza Batzordearen lehen erronka EHUko egoera epidemiologikoa zein den aztertzea izango da. 

Moto gidari bat gaur goizean, herritik ateratzeko kontrolean. / ©Idoia Zabaleta, Foku

Sarbideak itxita eta kaleak hutsik Azkoienen

Berria

Normaltasuna izan da nagusi konfinamenduaren lehen orduetan. Herritik irten diren ia denak lan arrazoiengatik irten direa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna