Aurten ere emakumezkorik ez da izango ezpata dantzari gisa Zubigaineko dantza dantzatzen, nahiz eta entseguetan aritu diren. Izan ere, antzinatasunaren arabera aukeratzen dira dantzariak. Arratsaldeko esku dantza, jota eta arin arinean ikusi ahalko dira.
Dantza hori gaurko egunez dantzatzen dute bakarrik, San Ferminen omenez, eta dantzaren berezitasun nagusia Onin ibai gaineko zubiaren petrilean dantzatzen dutela da. Hamabost ezpata dantzarik osatzen dute taldea, zubian dantzatzen duen kapitainak gidatuta. Aurten Unai Gurrutxaga lesakarra da kapitaina.
Zubigaineko dantza, hala ere, erritu luze baten parte baino ez da. Goizean goiz (08:00etan) ezpata dantzariek eta txistulariek prozesioa egiten dute elizarantz, eta joan-etorri horietan, dantzariak makil gurutzea dantzatuz joaten dira. Mezaren ondoren, zeharkako dantzak egiten dira, baita Zubigaineko dantza amaitu eta gero ere. 17:30ean, plazako dantzak egiten dira: zantza monona, esku dantza, jota, arin arina eta aurreskua; azkena, kapitainak bakarrik.
Ezpata dantzariak zuriz jantzita joaten dira, txapel gorriarekin, eta bularraldean eta bizkarrean eskapularioak daramatzate, kolorezko xingolekin. Oinetan espartinak daramatzate; orkatiletan, berriz, kaskabiloak.
Dantza horren jatorria argi ez badago ere, XV. mendetik hona dantzatzen dela diote adituek.
