Albistea entzun

Justiziak dio legezkoa dela kaferako eta erretzeko denbora lanalditik kentzea

Espainiako Auzitegi Nazionalak arrazoi eman dio Galp enpresari. Gorenak izango du azken hitza, CCOOk helegitea jartzea espero baita
Galp enpresan lanalditik kentzen ari dira kaferako tartea.
Galp enpresan lanalditik kentzen ari dira kaferako tartea. BERRIA Tamaina handiagoan ikusi

Irune Lasa - Xabier Martin -

2020ko otsailak 12

Hizpide aproposa izan daiteke lankide arteko kafe eta zigarretetarako Espainiako Auzitegi Nazionalak eman berri duena: arrazoia eman dio Galp Energia enpresari, legezko iritzi baitio langileei fitxaraztea kaferako eta erretzeko hartzen dituzten tarteengatik. Lanaldiaren derrigorrezko erregistroa ezarri zenean, Madrilgo Galp Energiak mezu elektroniko bidez jakinarazi zien langileei fitxatu egin behar zutela kafe bat hartu edo zigarreta bat erretzeko jarduna hartzen zuten aldiro, eta tarte horiek lanalditik kanpokotzat jotzen zituela.

Hori ikusita, CCOO sindikatuak auzitara jo zuen enpresaren erabakia indargabetu zezan. Argudiatu zuen tarte horiek lanaldiaren parte zirela, «langileen onurarako» jada eskuratutako eskubideak ziren heinean, eta enpresak, alde bakarrez, langileen lan baldintzak okertzen zituen aldaketa bat egin zuela. Baina, Auzitegi Nazionalaren arabera, Galp Energiaren kasuan, erregistro berriarekin enpresak egindako moldaketa horiek ez dira «lan baldintzen funtsezko aldaketa bat», eta, beraz, ez dira zertan negoziatu langileen ordezkariekin.

Lanaldiaren erregistroa

Ebazpen horrek hautsak harrotu zituen atzo Espainiako sindikatuen artean, enpresetan oso erroturik baitaude kaferako eta zigarretarako tarte horiek. Gainera, Espainiako Gobernuak lanaldiaren erregistroa egiteko derrigortasuna ezarri zuenean, enpresek pagatzen ez dituzten ordu estrei muga jartzeko ezarri zuen. Galpek, nolabait, lege berri horri aurre egiteko neurria hartu zuen, eta aditu asko dira aurreratu dutenak legearen helburuen eta arimaren aurkakoa dela lehen lanaldiaren barruan uzten zituen tarte horiek orain lanalditik kanpo uztea.

Alabaina, tarte horiek negoziatu beharreko aldaketak izateko, epaiaren arabera, baldintza horiek aurretik existitu beharko lirateke langilearen kontratuan, enpresaren hitzarmenean edo aurretik enpresak hartutako aldebakarreko erabaki batean; Galp Energiaren kasuan ez dago halakorik. Ez da frogatu argi, gainera, erregistroaren aurretik enpresak kaferako eta erretzeko tarteak lanaldiaren barneko gisa ulertzen zituenik, eta, ondorioz, tarte horiek ez ditu aitortzen eskuratutako eskubide gisa.

Dena den, pentsatzekoa da kafearen tartearena auzi luzeagoa izango dela. CCOOk helegitea jartzeko aukera dauka, eta, itxura guztien arabera, horrelaxe egingo du. Beraz, azken hitza Espainiako Auzitegi Gorenak izango du auzi horretan. Hark jurisprudentzia ezar dezake lan itunetan gaia argi islatzen ez dutenen kasuan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nord Stream 1 gasbidea, Alemanian sartzen den lekuan. ©STEFAN SAUER / EFE

Berlinek eta Moskuk «sabotajetzat» jo dituzte Nord Streameko isuriak

JokinSagarzazu

Gertakariak ez du eraginik izango Europarako gas horniduran, gaur egun bi gasbideak ez baitaude martxan. Danimarkako Gobernuak energia alorreko larrialdia ezarri du herrialdean
Mahats bilketa betean ari dira egunotan Bastidan. ©JAIZKI FONTANEDA / FOKU

Lehortearen uztak bilketa astuna dakar

X. Martin

Eguraldi lehorrak %20 inguru apalduko du 2022ko uzta Arabako Errioxan. Mahats aleak txikiak dira, eta azidotasun apala dute. Litekeena da horrek urteko ardoen kalitatean eragitea, baina egurrerako gordetzen den zukua ez du zertan hondatu. Bastidako kooperatiban buru-belarri dabiltza jadanik mahats bilketan.
Arabako Mahastiak ez da aurten hasiko, «baimena ez delako garaiz iritsi»

Arabako Mahastiak ez da aurten hasiko, «baimena ez delako garaiz iritsi»

Xabier Martin

Mahats bilketa betean dira jadanik Arabako Errioxan, eta sor-marka berria abiarazteko prest daudenek onartu dute beren ardoak Errioxako izenean jarraituko duela aurten
Hauteskunde sindikaletarako ELAren kanpainaren aurkezpena. Erdian, Mitxel Lakuntza idazkari nagusia. ©BERRIA

Sindikatuek ordezkarien erdiak izango dituzte jokoan ekainera bitarte

Imanol Magro Eizmendi

Hurrengo bederatzi hilabeteetan hauteskunde sindikalak abiatuko dituzte Hego Euskal Herriko lantoki handietako gehienetan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...