Albistea entzun

Italiako Giroa

Ihesean argi eta atzean geldi

Koen Bouwman bigarrenez gailendu da Giroan, eta oilarrek ez dute ia imintziorik ere egin
Koen Bouwman besoak altxatuta atzoko etapa garaipena ospatzen, Castelmonteko santutegian. Bigarrena du aurtengo Giroan.
Koen Bouwman besoak altxatuta atzoko etapa garaipena ospatzen, Castelmonteko santutegian. Bigarrena du aurtengo Giroan. MAURIZIO BRAMBATTI / EFE Tamaina handiagoan ikusi

Eñaut Agirrebengoa -

2022ko maiatzak 28

Hiru guztien gainetik. Eta hirurak elkarri ihes egin ezinik. Gidoi hori izan du orain arte Italiako Giroak, eta atzo ez zen bestela izan, Marano Lagunare eta Castelmonteko santutegia lotu zituen 19. etapan. Mendiko azken-aurreko saioa izanagatik, apenas mugitu ziren Richard Carapaz (Ineos), Jai Hindley (Bora) eta Mikel Landa (Bahrain). Eman baino, nahiago izan zuten indarrak gorde. Oso bukaerarako utzi zituzten erasoak, eta batera helmugaratu ziren berriz ere. Elkarren artean kateatuta daudela dirudi. Carapazentzat mesede: beste egun batez eutsi zion maglia arrosari. Koen Bouwman (Jumbo Visma), berriz, aske, loturarik gabe dabil, tropeletik ihesi. Etekin handia atera zion atzoko jardunari: bigarren etapa irabazi, eta oso puntu baliotsuak bildu zituen mendiko sailkapenerako. Ezbeharrik ezean, berea du maglia urdina.

Giro honetan bederatzigarrenez, alde egindako ziklista bat iritsi zen azkarren helmugara. Eta ez hori bakarrik: aste honetako etapa guztiak ihesean erabaki dira. Atzo, Bouwman izan zen indartsuena hamabi lagunek osaturiko multzoan. Erabateko baimena eman zieten bidea egiteko. 11 minuturen aldea ere izan zuten. Ineosek muzin egin zion aginte makilari; are gehiago, Richie Porte bizikletatik jaitsi eta erretiratu ondotik. Babesle nagusietako bat galdu zuen Carapazek. Egoera horretan, Bora taldeak jarri behar izan zuen lanean, ia behartuta. Interesa izan zezakeen ihesaldia harrapatzeko, helmugako gainsariak gogoan, baina ez: trostan eraman zuen multzo nagusia.

Txirrindulariak Eslovenian sartu ziren. Kolovrat igo zuten han, helmugarako 50 kilometroren faltan. Min handia egiteko moduko mendatea zen, baina onenek ez zuten zirkinik ere egin. Ihesaldia, berriz, aletuz joan zen, eta lau ziklista iritsi ziren gailurrera: Bouwman bera, Mauro Schmid (Quick), Attila Valter (Groupama) eta Alessandro Tonelli (Bardiani). Jaitsieran, Andrea Vendrame (Ag2r) batu zitzaien.

Bukaeran erabaki zen dena, Castelmonteko santutegiko igoeran. Aurrekoak azken hiru kilometroetan hasi ziren erasoka. Bouwman, Schmid eta Valter ziren ahaltsuenak maldan gora, baina Tonellik eta Vendramek eutsi egin zieten. Bihurgune txarra zegoen azken zuzengunearen aurretik, eta Bouwman sartu zen aurrena, arriskua hartuta. Bidea itxi zion Schmidi, eta balazta sakatu behar izan zuen. Esprinta guztiz baldintzatu zuen horrek. Vendrame jokoz kanpo gelditu zen. Epaileek herbeheretarrari eman zioten garaipena.

Hautagaiak ia lau minutu geroago iritsi ziren. Carapazek piztu zuen sua haien artean, eta Hindley eta Landa saiatu ziren geroago. Alferrik izan zen, ordea, eta sailkapenean ez zen aldaketarik izan: Carapaz da lider oraindik, eta hiru segundoren aldea du Hindleyrekin. Landa hirugarren dago, 1.05era, eta Pello Bilbao (Bahrain) bi koska beherago ageri da, 6.22ra.

Gaur, Pordoi eta Marmolada

Baliteke gaurko etapak lurrikarak eragitea, San Pellegrino, Pordoi (Coppi gaina) eta Marmolada kateatuko baitituzte. Mendiko azken etapa izango da, igandeko erlojupekoaren aurretik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nerea Nevado baloiarekin, atzo, Levanteren aurka. ©Athletic

Denboraldiko lehen porrota Athleticentzat

Berria

Levantek kontrolatu du neurketa, eta Redondoren eta Mayra Rodriguezen golei esker lortu ditu hiru puntuak. 

Nerea Arruti, garaipena ospatzen. ©Idoia Zabaleta / FOKU

Nerea Arrutik eta Andoni Iruretagoienak irabazi dute Euskal Pentatloia

Edu Lartzanguren

Iruretagoiena bigarren urtez nagusitu da. Iazko irabazle Karmele Gisasola bigarren geratu da.

 ©UNAI ZABALETA

«Eibarrekin Lehen Mailara igotzea baino ez daukat buruan»

Iñaki Berastegi

Etxean bikain abiatu du sasoia Eibarrek, baina etxetik kanpo, nahi eta ezin. Arbillaren ustez, partida guztiak irabazteko «gosea» izan behar du taldeak igoeragatik borrokatzeko.
Evenepoel, bakarrik helmugaratzen. ©DEAN LEWINS / EFE

Evenepoelek irabazi du Munduko Txapelketa, modu ikusgarrian

Berria

25 kilometroz bera bakarrik aritu da ihes eginda. 2018an ere irabazi zuen lasterketa.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Eñaut Agirrebengoa

Informazio osagarria

Iruzkinak kargatzen...