«Itsasoaren handitasunak asko lasaitzen nau»

Liburua besapean hartuta, sarritan joaten da Onintza Enbeita (Muxika, Bizkaia, 1979) Laida hondartzara egun-pasa. Itolarria baretu eta erabaki inportanteak hartzeko lagungarri du bertsolariak itsasoa.

Zein da Laidaren xarma?

Egongo dira mila leku munduan ederragoak, baina niri Laida asko gustatzen zait. Umetako oroitzapen onak ditut, eta itsasoaren handitasunak asko lasaitzen nau. Erabaki bat hartu behar dudanean, eta erabaki ezinik nabilenean, itsasoa ikusten den lekura joaten naiz, eta Laida askotan aukeratzen dut.

Erabaki garrantzitsuak hartu dituzu Laidan?

Uste dut baietz, edo hori da neure buruari esaten diodana sinesteko hartu ditudan erabakiak zuzenak izan direla. Leku zabalek itolarria kentzen laguntzen didate, arnasa hartzen.

Txapelketa inportanteen atarian, adibidez, bisita asko egiten dizkiozu Laidari?

Txapelketa sasoian joaten naiz Laidara, ez bereziki igual final bezperan, baina bai. Batez ere oso urduri nagoenean. Ura dagoen tokiek lasaitasuna transmititzen didate. Bere kabuz mugitzen den espazio horrek asko erakartzen nau. Are, gauzen handitasunak kokatzen gaitu gu gure txikitasunean.

Arnasgune eta hausnartzeko espazio duzu Laida. Bakarrik ala lagunduta joaten zara?

Ez naiz beti bakarrik joaten, baina bakarrik joatea gustatzen zait. Nire opor idealak izaten dira hondartzara joatea liburu batekin, eta, egon eta egon. Hondartzako bakardadea gaindiezina da. Erlaxatzeko beste edozein terapia baino askoz hobea!

Laida duzu kuttun, baina, agian, Urdaibaiko izarra Laga da.

Lagaren magia ukaezina da, baina ni Laidara joaten naiz. Nerabezaroan gure institutuko mundu guztia joaten zen Lagara, eta gorputz normatiboa ez geneukanontzat deseroso xamarra zen. Gogorra zen bikinian paratzea besteen aurrean. Hor egin nintzen Laidaren maitale.

Noiz egon zinen azkenekoz?

Ekaina hasieran. Uda honetan ez dut behin ere zapaldu. Irailetik ekainera bitarte joan ohi naiz.

Nolakoa da zure hondartza egun bat?

Udan, toalla bota, arropa kendu, liburua atera poltsatik eta egon. Gero, kafetxo bat edo zerbeza bat edan. Neguan, itsasertzean paseoak eman, eta garagardo bat hartu edo txokolatezko palmera bat jan.

Aukeran, hondarretan etzan ala bainua hartu?

Nik beti esaten dut ez dakidala igeri egiten. Ados, ez da guztiz egia, baina ez naiz oso igerilari ona. Agian, horregatik erakartzen nau hainbeste itsasoaren handitasun horrek.