Albistea entzun

ATZEKOZ AURRERA. Zorione Erezuma. Poeta

«Ingurukoei maite ditudala esateko modua da poesia»

Zorione Erezuma olerkigileari barren-barrenetik ateratzen zaio poesia idaztea. Bere olerki ikuskizunak «meditazio bidaia mistiko» moduan definitzen ditu.
RAUL BOGAJO / FOKU Tamaina handiagoan ikusi

Unai Etxenausia -

2022ko maiatzak 17 - Gasteiz

Betidanik poesia idazteko «beharra» sentitu du Zorione Erezuma poeta gasteiztarrak (Bilbo, 1969). Autoeditatutako lau poesia liburu idatzi ditu, eta bosgarren lana argitaratuko du laster. Bihar, berriz, 20:00etan, Ohar baten bihotzera bidaia errezitala aurkeztuko du Gasteizko Vital fundazioko kulturunean, Dendaraban.

Nolakoa izango da biharkoa?

Emanaldia ez da kaleratuko dudan izen bereko olerki bildumaren aurkezpena; izan ere, liburu berriko olerkiez gain, PoemArte aurreko laneko poemak errezitatuko ditut. Are, bost musikarik girotuko dute errezitala. Beraz, meditazio bidaia bat izango da, bidaia mistiko bat; poesia eta musika arimaren hizkuntzak baitira. Horrez gain, duela gutxi hil den tango dantzari bat omenduko dut.

Zer-nolako esperientzia izan da ikuskizuna prestatzea?

Bidaia zirraragarria izan da, hasieratik. Ohorea da musikari apartekin lan egitea. Gainera, haiek nirekin lan egin nahi izateak nire lana duina dela sentiarazten dit. Sorpresaz inguratuta egon da prozesu osoa.

Eta, hitz batean, nola definituko zenuke ikuskizuna?

Arima.

Noiz erabaki zenuen zure olerkiak argitaratzeaz gain jendaurrean errezitatu nahi zenituela?

Nire olerkiak jendaurrean errezitatzen hasi nintzenean, poemak ea norenak ziren galdetzen zidan jendeak. Amorru pixka bat ematen zidan horrek, eta horregatik erabaki nuen publikatzea. Horrez gain, duela sei urte hasi nintzen Poetak Maiatzean egitasmoan parte hartzen. Orduan eman nuen bigarren pausoa, eta olerkiak paperetik atera eta jendaurrean aurkezteko momentua zela pentsatu nuen. Poemak errezitatzen direnean, momentu mistiko bat sortzen da, ikustera datorren jendearekin konektatzen duzu: bizirik dagoen zerbait entzuten du jendeak.

Zure errezitala Poetak Maiatzean egitasmoaren barruan dago. Beharrezkoak al dira horrelako proiektuak?

Oso eskertuta nago ekimen honek urtero ematen didan bultzadagatik. Halere, eskertuko genuke babes handiagoa izatea. Ez antolatzaileen aldetik, inondik inora, proiektuaren alde dauden sinaduren aldetik baizik. Artistok kontziente gara irabazi asmorik gabe aurkezten ditugula olerkiak; baina ez irabazteaz gain, dirua galtzen dugu askotan.

Orduan, olerkiak idaztetik bizi nahiko zenuke?

Gustatuko litzaidake, noski, baina zaila da. Halere, barrenetik ateratzen zait poesia idaztea. Ez dut honetaz bizi behar olerkiak idazteko, beharrak bultzatzen bainau.

Merezi du idazten jarraitzea?

Bai. Olerkia arimaren lengoaia dela sentitzen dut, emozio batena, sentimendu oso sakon batena; jainkoari baldintzarik gabe lotuta dagoena. Eta, nola ez, ingurukoei maite ditudala esateko modua da poesia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Taldea. Eltziegoko dantzariak, jantzi tradizionalekin. ©BERRIA

Bost dantza ziklo bakarrean

Amaia Ramirez de Okariz Kortabarria

Irailaren 7tik 11ra ospatzen dira Eltziegoko festak, eta irailaren 8an egiten dituzte Ama Birjinaren omenezko dantzak. Bost dantzaz osatutako dantza ziklo oso bat da Eltziegoko dantza. Zortzi dantzarik dantzatu ohi dute, Katximorro pertsonaia lagun dutela.

 ©GOTZON ARANBURU / FOKU

«Furgoneta bidaiariei lana erraztea da helburua»

Ane Insausti Barandiaran

Furgonetan bidaiatzen dutenek sarri «kalitate eskaseko» elikagaiak jaten dituztela uste du Alberdik. Janaria nola garraiatu eta kontserbatu azalduko du, besteak beste, tailer batean.
Erromes bat, Donejakue bidean Donostia eta Orio arteko zatia egiten. ©BERRIA

Erromesak 'Done Euri' bidean

Jakes Goikoetxea

Ez da beste Donejakue bide batzuk bezain ezaguna eta jendetsua, baina erromes askok Kostaldeko bidea aukeratzen dute, paisaiagatik eta eguraldiagatik.
Hainbat ekitaldi egingo dituzte udan Txillida Lekun. ©JON URBE / FOKU

Eguzki izpiak eskulturen artera

Miren Mujika Telleria

Txillida Lekuko udako egitarauak artea, yoga, zinema, musika eta dantza biltzen ditu. Jaialdi handien egoitza ere izango da, hala nola Jazzaldiarena eta Musika Hamabostaldiarena

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Unai Etxenausia

Informazio osagarria

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.