ONDORIOAK

Berria -

2019ko martxoak 28
Ikerketa egiteko hautatu dituzten klubei, gazteei, entrenamenduei eta entrenatzaileei erreparatuta, hainbat ondorio atera dituzte.

Klubak. Euskararen sustapenaren aldeko jarrera dute. Horrek lagundu egiten die gazteei euskaraz hitz egiten. Klubek ez dute hizkuntza plangintza zehatzik, baina zenbait erabaki euskararen arabera hartzen dituzte.

Hizkuntza praktikak. Gazteak jabetzen dira klubak euskararen biziberritzearen alde daudela, eta, beraz, euskarak garrantzia duela eremu horretan. Askok entrenamenduak euskararekin lotzen dituzte, eskolarekin batera.

Entrenatzaileak erreferente. Gazte kirolarientzat erreferenteak dira entrenatzaileak, baita hizkuntza erabilerari dagokionez ere. Giroa zaintzen dute, eta gazteekin hurbiltasuna garatzen dute.

Entrenatzaile hiztunak. Entrenatzaileak jakitun dira euren rola oso garrantzitsua dela taldeetan. Euskararen erabilerak eragina du jokalariengan, eta gazteek gehiago hitz egiten dute euskaraz haiek ere hala egiten badute.

Entrenatzaileak, euskaraz. Oro har, entrenatzaile gehienak euskaraz aritzen dira ia beti taldeko gazteekin, baita jokalarien arteko jarduna gaztelaniaz denean ere.

Gazteen hizkuntza praktikak. Jokalari gazteen artean gehiago entzun dute gaztelaniaz euskaraz baino. Alde nabarmenak daude talde batetik bestera. Halere, orokorrean gehiago erabiltzen dute euskara entrenatzailearekin hitz egiten ari direnean.

Gazteen hizkuntza gaitasuna. Gazte jokalari gehienek maila antzekoa dute euskaraz eta gaztelaniaz. Oso gutxik esan dute hobeto moldatzen direla erdaraz euskaraz baino. Euskaraz hobeto moldatzen direla esan dutenak eremu euskaldunetakoak izan ohi dira.

Hizkuntza aldaketa. Gazte askok azaldu dute nerabezaroan utzi diotela euskaraz hitz egiteari, eta gaztelaniaz hasi direla.

Komunikazioaren garrantzia. Komunikazioa entrenamenduetan lantzen den arlo garrantzitsua izaten da, eta taldea indartzeko lagungarria izan daiteke.

Esaldi laburrak eta emozioak. Behatutako partida eta entrenamenduetan ez dira elkarrizketa luzeak izaten. Kirol hizkeran bi alderdi daude: emozioen adierazpena eta kiroleko terminologia edota aginduen adierazpenak. Gehiago egiten da euskaraz aginduak emateko emozioak adierazteko baino.

Entrenamenduetako giroa. Giroa lasaia eta erlaxatua da, oro har, entrenamenduetan, baina, aldi berean, formaltasuna eta diziplina handia dute. Egoera horrek aukera asko eskain ditzake gazteen artean euskararen erabilera handitzeko ariketak egiteko.

Hizkuntza lanketa. Entrenatzaileak azalpenak ematen dituenean ez ezik, partidetako eta entrenamenduetako une ezberdinak ere erabil daitezke hizkuntza lantzeko. Esaterako, entrenamenduetako jolasak emozio uneak dira.

Gazteen iritziak eta bizipenak. Gazteen artean ez dute ikusi euskararekiko sentimendu ezkorrik. Euskaraz hitz egin behar den galdetzean, baietz erantzun dute. Euskara desagertzearen arriskuari buruzko kezka azaldu dute. Halere, zenbaitek esan dute «askatasunez» erabaki dezakeela norberak zein hizkuntzatan hitz egin.

Hizkera ez-formala. Gazte gehienei kosta egiten zaie hizkera ez-formala erabiltzea euskaraz egiten dutenean. Askotan sentitzen dute ez dutela horretarako gaitasun nahikorik.

Kode nahasketa. Oso ohikoa da esaldi berean euskara eta gaztelania erabiltzea. Dena den, gehienetan gaztelaniatik euskarara egiten dute hizkuntza aldaketa, eta oso gutxitan alderantziz.

Bizipen positiboak. Kirola gazteengan eragiteko gune estrategiko bat izan daiteke. Izan ere, gazteek ikus dezakete euskara hizkera ez-formalean ere eroso erabil dezaketela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria