Gai zehatza landuta ere, ugaria da Itsasmuseumek duen eskaintza, erakusketa iraunkorretatik harago. J. S. Elkanoren aztarnaren bila, erakusketa «mamitsua» gomendatu du Gorostiagak, nabigatzailearen zaleentzat zein hark egindakoak ezagutu nahi dituztenentzat: «Ikerketa sakon baten emaitza da erakusketa». «Bereziki» helduentzat gomendatu du, baina haurrek ere izango dute Elkanoz gehiago jakiteko aukera. Gaur eta bihar, hari buruzko tailerra antolatuko dute museoan, eguerdian; haurrek bakarrik parte hartu beharko dute ekintza horretan, baina gurasoekin joan ahal izango dira bisita gidatuan.
Elkanoren erakusketaz gain, uda hasieran irekitako beste bi ikus daitezke Itsasmuseumen. Haietako bat nabigazioaren historiaren laburpena da, playmobilez egindako dioramak erabilita. Familien artean, harrera «oso ona» izan duela esan du Gorostiagak: «Helduentzat zein haurrentzat da gomendagarria. Nabigazioaren historiaren pasarteak oso erraz uler daitezke». Udako beste erakusketak meatzaritza du hizpide, baina horretan ere urak badu zeresana: «Gaur egun itsasadarretik paseo bat ematen badugu, eta arreta jartzen badugu, gure iragan industrialaren aztarnak ikus daitezke, batez ere meatzaritza arlokoak». Erakusketa zamatzeko tokiei buruzkoa da, batez ere. Minerala kargatzeko toki horien argazki zaharrak biltzen ditu, baina baita gaur egungo irudiak ere, toki horiek utzitako aztarnak erakusten dituztenak: «Kasu batzuetan, aztarnak nabariagoak dira».
Itsasmuseumen ere osasun neurriak ezarri dituzte. Maskaraz, distantziaz eta eskuen garbitasunaz gain, irekiera orduak hamabost minutuko txandetan banatuko dira, eta bakoitzean hamabost pertsona sartuko dira gehienez. Lekua ziurtatzeko, sarrerak Internet bidez erostea gomendatzen dute; bertan, txartelarekin baino ezingo da ordaindu.
Bilboko Itsasmuseum
11:00etatik 19:00etara, asteartetik igandera bitarte zabalik.
