Albistea entzun

AEBek segurtasun eskaerei emandako erantzunak ez du asebete Errusia

Moskurentzat, Washingtonen eta NATOren dokumentuak ez du ematen «baikortasunerako arrazoi askorik». Kremlinek ez du elkarrizketa baztertzen
Errusiako armadaren tanke bat, herenegun, Rostov (Errusia) inguruan.
Errusiako armadaren tanke bat, herenegun, Rostov (Errusia) inguruan. EFE Tamaina handiagoan ikusi

Igor Susaeta -

2022ko urtarrilak 28

Errusia hasi da aztertzen AEBek eta NATOk ondutako proposamena, egindako segurtasun eskaerei erantzunez, eta Kremlinek uste du ez daudela «baikortasunerako arrazoi askorik» horri erreparatuta. Nolanahi ere, Moskuk uste du «elkarrizketarako perspektibak» badaudela. Hori bai, iruditzen zaio Washingtonek eta aliantza militarrak «modu argi batean» adierazi zutela herenegun Errusiaren eskaera nagusiak baztertzen dituztela. Horietako bi dira NATOren hedatzea geldiaraztea Europa ekialdean, eta Ukraina NATOko kide bihurtzeko aukera baztertzea. Baina Jens Stoltenberg aliantzako idazkari nagusiak prentsaren aurrean jakinarazi zuen Vladimir Putin Errusiako presidenteari idatziz adierazi diotela ez batari, ez besteari ez diotela uko egingo.

Dokumentazioa Putinen esku dago. «Denbora beharko da hori aztertzeko, eta ez gara presaka ibiliko ondorioekin», nabarmendu zuen Dmitri Peskov Kremlinen bozeramaileak atzo, egunero egin ohi duen prentsa agerraldian. Aldi berean, Sergei Lavrov Atzerri ministroak atzo ohartarazi zuen dokumentuan jasotakoak «elkarrizketa serioei» ekiteko bidea eman lezakeela; «baina bigarren mailako auziez». Izan ere, «gai nagusiei» dagokienean, ez da «erreakzio positibo bat» egon. Lavrovek gai nagusia zein den gogoratu zuen: «NATOren ekialderanzko hedatzearen onartezintasuna eta Errusiako lurrak mehatxatu ditzaketen armen kokapena».

Aliantza militarrak eta AEBek ez dute publiko egin Errusiari emandako erantzunaren edukia. Antony Blinken AEBetako Estatu idazkariak herenegun esan zuenez, Errusiak gauza bera egitea espero du. Moskuk konpromiso hori hartu du. AEBen arabera, uneotan Errusiako armadaren 100.000 bat soldadu daude Ukrainako mugan maniobra militarrak egiten. NATO, bestalde, Europa ekialdean duen indar militarra handitzen ari da.

Eta Errusiari erantzun bat bidali eta gero, Blinkenek Txinako Atzerri ministro Wang Yirekin hitz egin zuen telefonoz. Yik adierazi zion Errusiaren «kezka legitimoak» errespetatu behar direla. Bide batez, «lasaitzeko eta eusteko» eskatu zien alde guztiei. Pekinek Washingtoni eta NATOri esan die, gainera, «hedatze militarrak» ez duela «segurtasun bermatuko».

Ukraina, konforme

Ukraina konforme dago AEBen eta NATOren erantzunarekin. «Eragozpenik ez dago«, idatzi zuen Dmitro Kuleba Atzerri ministroak atzo Twitterreko bere kontuan. «Errusiarekin izandako kontaktu guztiak eta gero, inportantea da AEBek harreman estua edukitzea Ukrainarekin. Hori da urrezko araua». Handia da Errusiaren eta Ukrainaren arteko tentsioa, eta Putin eta Volodimir Zelenski Ukrainako presidentea 2019ko abenduan batzartu ziren azken aldiz. Bi herrialdeetako ordezkaritza diplomatikoa, ordea, herenegun bertan bildu zen Parisen, Frantziako eta Alemaniako gobernuetako ordezkariekin batera, Normandiako laukoaren formatuan. Moskuk eta Kievek Ukraina ekialdeko Donbass eskualdean 2014tik duten gatazka izan zuten hizpide, baina elkarrizketa horiek termometro bezala balio dezakete ikusteko bide diplomatikoak zer aukera dituen. Bi aste barru Berlinen biltzekoak dira.

Alemania, hain zuzen, Ukrainari eraso eginez gero jasan beharko zituen «ondorioez» mintzatu zitzaion atzo Moskuri, eta Annalena Baerbock Atzerri ministroak azpimarratu zuen Nord Stream 2 gasbidea blokeatzeko prest dagoela. Errusiatik Alemaniara gasa eramateko eraiki zuten azpiegitura hori—Itsaso Baltikoaren azpitik—, eta baimenen zain dago zerbitzua ematen hasteko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Sanna Marin Finlandiako lehen ministroa, ezkerrean, eta Sauli Niinisto presidentea, eskuinean, otsailean egindako agerraldi batean, Helsinkin. ©KIMMO BRANDT / EFE

Finlandiak NATOn sartzeko eskatuko duela ofizialki baieztatu dute presidenteak eta lehen ministroak

Edu Lartzanguren

Legebiltzarrak datozen egunetan eztabaidatuko du gaia, eta baietz esatea espero duela adierazi du Sanna Marin lehen ministroak. Suedian agintean den alderdi sozialdemokratak ere sostengua eman dio herrialdea NATOn sartzeari.

Annalena Baerbock Alemaniako Atzerri ministroa, atzo, G7koen bileran. ©EFE

G7koek ez dituzte aitortuko Errusiaren inbasioaren ondorio diren mugak

Igor Susaeta

Munduko herrialde industrializatuenek «behar beste denboraz» lagunduko dute Ukraina militarki. Putin: «Finlandiaren segurtasuna ez dago kolokan»
Bi pertsona elkar besarkatzen, sarraskiaren lekutik gertu. ©BRANDON WATSON / EFE

Hamar pertsona hil dituzte AEBetan, eraso arrazista batean

Edu Lartzanguren

Erasotzailea New Yorkeko Buffalo hiriko auzo beltza batera joan da, eta supermerkatu batean sartu da tiroka. Supremazista zuri bat dela esan dute agintariek.

Pinocheten kontrako protesta bat, 2012an, Santiagon. ©FELIPE TRUEBA / EFE

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...