Albistea entzun

Maila berria, antzeko Miarritze

Top14ra itzuliko da gaur Miarritze, Bordeleren aurka. Mailari eustea da denboraldiko helburua
Miarritzek Baionaren aurkako derbian lortu zuen Top14ra igotzea.
Miarritzek Baionaren aurkako derbian lortu zuen Top14ra igotzea. BOB EDMEP Tamaina handiagoan ikusi

Iñaki Berastegi -

2021eko irailak 4

Zazpi denboraldiko egonaldia egin du Miarritzek ProD2an, Frantziako errugbiaren bigarren mailan. Aro luzeegia, liga bost aldiz irabazi duen Miarritze bezalako talde historiko batentzat. Urrun geratzen dira lapurtarren urrezko azken urteak, 2005eko eta 2006ko ligako garaikurrak eta 2012ko Europako errugbi kopa, besteak beste. Orain, bestelako testuinguru, talde eta helburu batzuekin itzuli da Top14ra. Baionaren aurkako derbia eta finala irabazteak emandako grinarekin itzuli dira, eta urte luzez jarraitzeko asmoarekin.

«Helburu bakarra mantentzea da. Aurrekonturik baxuena duen taldea izango gara, maila ez dugu ezagutzen, eta hamabi partidako blokeak ez ditugu sekula egin. Klubeko edozeinek sinatuko luke mailari eustea», esan du Roger Ripolek (Bartzelona, 1978), taldeko entrenatzaile laguntzaileetako batek. Shaun Sowerby eta Barry Maddocks entrenatzaile nagusien aginduetara ariko da kataluniarra, klubean emango duen laugarren denboraldian.

Nicolas Nadau iazko entrenatzaile nagusiaren agurraz gain, hamar jokalari joan ziren sasoi amaieran, eta, taldea osatzeko, bederatzi jokalariri kontratua berritu eta hamalau fitxaketa egin ditu klubak. Mugimendu asko diruditen arren, Ripolek dio taldea ez dutela «eraberritu», eta aurreko denboraldikoaren «antzekoa» izango dela azpimarratu du: «Jokatzeko modua eta sistema ez dira aldatuko, eta taldearen oinarria iazko jokalariak izango dira. Fitxaketa berriak ondo egokitzen badira, agian, ditugun jokalari batzuk baino eraginkorragoak izango dira, baina besterik ez».

Egindako hamalau fitxaketen artean «denetarik» dago: «Gazteak, Frantziako goi mailako jokalariak, eta baita nazioartean aritutakoak ere. Top14ra igotzeak klubari indar handiagoa eman dio negoziazioetan, baina urtarriletik zebilen kluba haiekin hitz egiten. ProD2an egonda ere, horrelako taldea izatea zen asmoa. Taldetik alde egin duten jokalariei dagokienez, urtarrilean erabaki genuen ez zutela jarraituko. Proiektuak aurrera egin eta taldea berritzeko hartutako erabakiak dira». Talde teknikoan egindako aldaketei buruz gauza bera esan daiteke.

Hori kontuan hartuta, erronka handia dauka talde lapurtarrak, adituen iritziz asteburuero final bat jokatzea bezala baita Top14an aritzea. Hasiera, gainera, ez da batere erraza. Izan ere, lehenengo bost jardunaldietan iazko ligako aurreneko lau sailkatuen aurka jokatu beharko dute: Bordele, Racing 92, La Rochele eta Tolosa, eta, tartean, Perpinya ProD2 ligako txapelduna.

Top14ko talde gehienek pisuaren eta indarraren aldeko apustua egiten badute ere, abiadura izan da Miarritzeren azken urteetako bertute nagusia. Hala, Ripolek uste du maila berrian «sufritu» egingo dutela, baina, aldi berean, argi dauka ezin diotela uko egin euren «bertuterik onenari»: «Hirugarren urtez, taldearen abiadura izango da gure baliabiderik onena. Top14ra igo eta jokatzeko modua aldatuko duten fitxaketak egiten badituzu, hiru urte modu berean jokatzen daramatenek agian urtebete beharko dute sistema berria barneratzeko».

Jaitsierako borrokan

Lapurtarren helburu berarekin, beste hainbat talde ariko dira. «Paue, Perpinya, Brive eta gure artetik aterako dira, nire ustez, mailaz jaitsiko diren bi taldeak», zerrendatu ditu entrenatzaile kataluniarrak. Aurrekontuetan dauden alde handiak, bereziki, taldearen osaeran nabaritzen dira gehien, eta hori gakoa izango da mailari eutsi ahal izateko: «Abendura arte, ia ez dugu atsedenik izango. Goi mailako berrogei jokalari dituztenek atseden eman diezaiokete hainbat jokalariri, baina guk ez, maila horretako 25 jokalari baino ez ditugulako, agian». Gutxi-asko, 45 jokalari ditu taldeko teknikariak bere aginduetara, eta horietatik 32k dute kontratu profesionala: gainontzekoak bigarren taldeko jokalariak dira.

Bordele izango dute lehen aurkaria gaur, eta, hiru aste atzera jokatu zuten lagunartekoan, 28-7 galdu zuen Miarritzek. Dena den, Ripolek «sinatuko» luke ligakoa «antzekoa» izatea: «Bost minuturen faltan, 7-14 atzetik gindoazen. 60 minutuan gertu bagaude, uste dut irabazteko aukera izan dezakegula». Agilera estadioan jokatuko dute estreinako partida (14.00).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Bizkaiko Batel Ligaren 7. eta 8. jardunaldiak, 2019ko martxoan. Bizkaiko arraun taldeetako 500 neska-mutil batu ziren. / ©Bermeo Arraun Argazkiak

Pandemiak moteldu egin ditu

Natalia Salazar Orbe - Bizkaiko Hitza

Bizkaiko Futbol eta Atletismo federazioek esan dute behera egin duela bi kirolotan federatu diren gazteen kopuruak. Uste dute gazteek beste ohitura batzuk hartu dituztela azken aldian, pandemiaren ondorioz. Arraunera gazte gehiagok jo dute, baina fitxa kopurua antzekoa izango da aurten ere.

Peio Etxeberria, Altuna III.aren aurkako atzoko norgehiagokan egindako tantoetako bat ospatzen. ©RAUL BOGAJO / FOKU

Oparia bere buruari

Ainara Arratibel Gascon

Peio Etxeberriak garaipen handia lortu du Altuna III.aren kontra, 18-22, eta oin eta erdi du finalerdietan. Ezkurdiak 22-15 hartu du mendean Urrutikoetxea
 ©JON URBE / FOKU

«Toki aproposenean nago ikasteko; onenekin nago»

Julen Etxeberria

Bera Berak Paris 92 hartuko du gaur Gaskan, Europako Ligako bigarren kanporaketako joaneko partidan (12:00, ETB1). Loidik estreinakoa du Europan: «Markatua nuen egun hau».

Anbizioa eta beharra

Eñaut Agirrebengoa

Osasunak esne mamitan jarraitu nahi du, gaur Vila-realen zelaian beste hiru puntu lortuta. Alavesek premiak estututa hartuko du bihar Betis

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna