«Ilusio handiagoz nago»

Abelardok «uste osoa» azaldu du multzoan, mailari eusteko helburua lortu ahal izateko. Talde «lehiakor eta batu bat» lortu nahi du
Abelardo Fernandez atzo aurkeztu zuten bigarrenez Alaveseko teknikari gisa. Irudian, bufandarekin.
Abelardo Fernandez atzo aurkeztu zuten bigarrenez Alaveseko teknikari gisa. Irudian, bufandarekin. A. RUIZ HIERRO /EFE Tamaina handiagoan ikusi

Ainara Arratibel Gascon -

2021eko urtarrilak 14

Abian da Abelardo Fernandezen bigarren aroa Alavesen. Atzo aurkeztu zuten teknikaria, eta bi gauza utzi zituen argi: uste osoa duela multzoan, eta 2017an taldea hartu zuenean baino «ilusio handiagoarekin» helduko diola erronka berriari.

Herenegun iragarri zuen klub arabarrak Machinek entrenatzaile izateari utzi, eta haren lekua Abelardok hartzen zuela. Mailari eustea da Alavesen helburua, eta oraintxe bertan hamaseigarren postuan dago, hemezortzi punturekin. Bi puntura ditu jaisteko postuak. Machin helburua betetzen ari zen, eta taldea bere jokatzeko era barneratzen. Baina Josean Kerejeta buru duen zuzendaritzak beste norabide bat eman nahi izan dio, klubak mendeurrena betetzeko egun gutxi falta direla, eta Abelardori eman dio horretarako ardura.

Lehen aroa amaitu zenean «atseden hartzeko beharra» zuela onartu zuen. «Baina berriro ere indarrez nago, eta horregatik onartu dut itzultzeko eta taldea hartzeko erronka». Lan ona egin zuen bere garaian, baina badaki orain ez dagoela egoera bera. «Hutsetik hasiko naiz; egindakoak ez du balio orain. Izan ere, bada aldea lehen aldi hartan taldea nola zegoen eta nola dagoen orain».

Helburua zein den aipatu zuen: «Mendeurrenaren urte garrantzitsu batean, Lehen Mailan segitu nahi dugu. Talde lehiakor, batu eta entretenigarri bat izan nahi dugu, eta zaleak gutaz harro egotea». Lehiakor izatearen garrantzia behin baino gehiagotan izan zuen hizpide atzoko aurkezpen prentsaurrekoan. «Parekotasun handia dago 12-14 talderen artean. Aurkaria zaila edo erraza izan, izaera lehiakorra ezin dugu galdu».

Machinen lana goraipatu zuen, eta taldeak hobetzeko zer duen galdetzean hau erantzun zuen. «Gol aukera gehiago eta hobeak sortu behar ditugu, eta ahalegindu behar dugu aurkariak egiten dizkigunak gutxiago eta horren arriskutsuak ez daitezen izan».

Larunbatean zuzenduko du lehen neurketa, Espainiako Kopan izango da, eta Alavesek Almerian jokatuko du. Jokatzeko erari dagokionez, bi oinarri aipatu zituen: «Defentsan sendo egon behar dugu, eta erasoan zuzen eta bizkor jokatu».

Entrenatzaile batek jokalari egokiak behar ditu nahi duen jokoa egiteko. Neguko merkatuan jokalariren bat fitxatzeko aukeraz ere hitz egin zuen. «Ez dut horretaz hitz egin klubarekin. Nire egitekoa hemen daudenengandik onena ateratzea da».

Prentsaurrekoan izan zen Sergio Fernandez Kirol zuzendaria ere, eta fitxaketen inguruan argi hitz egin zuen. «Tarte gutxi daukagu. Jokalariren bat ekartzeko, aurrena hemen dagoen besteren batek irten beharko du».

Kikek Eibarren segituko du

Bestalde, Eibarrek atzo iragarri zuen beste bi urterako luzatu diola kontratua Kike Garcia aurrelariari, hirugarren baterako aukerarekin. Ekainean amaituko zitzaion kontratua, eta Eibarrek garaiz lotu nahi izan du haren kontratu berritzea. Izan ere, denboraldi txukuna egiten ari da. Taldeko golegile nagusia da. Bost aldiz zulatu du aurkariaren atea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Altuna eta Olaizola, atzo, Bilboko Bizkaia pilotalekuan. ©Marisol Ramirez / FOKU

Erakustaldia eman dute Altuna III.ak eta Mariezkurrena II.ak

Berria

Aise gailendu zaizkie Olaizola II.a-Rezustari, eta Binakako Txapelketako hirugarren puntua eskuratu dute. Bigarren dira sailkapenean.

Eibarreko jokalariak Bryan Gilen gola ospatzen, atzo, Balaidosen. ©Salvador Sas / EFE

Dmitrovic eta Gil salbatzaile, berriro ere

Berria

Neurketa hasi eta berehala hartu du aurrea Celtak, eta aukerarik onenak ere haiek izan zituzten, baina Dmitrovicen geldiketek eta Bryan Gilek bigarren zatian sartutako golak puntu bat eman diete armaginei.

Gipuzkoa Basketeko eta Bartzelonako jokalariak, atzo Illumben (Donostia) jokatutako neurketan. ©Javier Etxezarreta / EFE

Porrot egin dute bai Gipuzkoa Basketek eta bai Baskoniak

Berria

Donostiarrek 68-110 galdu dute Bartzelonaren aurka, eta gasteiztarrek 83-61 Valentziaren kontra.

Ander Gebara eta Jon Bautista, jota, zelai erditik ateratzeko prest, Betisek binakoa sartu berritan. ©GORKA RUBIO / FOKU

Lehendik ikusitakoa da

Jon Ander De la Hoz

Reala 2-0 jarri da aurretik, baina ez da gai izan irabazteko, eta Betisek aprobetxatu egin du partidaren azken txanpan bi gol sartu eta berdintzeko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.