Albistea entzun

Ez dute alderik ikusten

Ezkurdiak esan du «kezka» duela, ez baitu «txapelketaren tentsioa» bizi izan azken bi asteetan. Jakak ez du uste aurkariak abantaila duenik
Joseba Ezkurdia eta Erik Jaka, finalerdirako aukeratutako pilotekin, atzo, Eibarko Astelena frontoian.
Joseba Ezkurdia eta Erik Jaka, finalerdirako aukeratutako pilotekin, atzo, Eibarko Astelena frontoian. RAUL BOGAJO / FOKU Tamaina handiagoan ikusi

Julen Etxeberria -

2022ko maiatzak 12

Bezperan Jokin Altunak eta Unai Lasok Bilbon egindako pilota aukeraketan ez bezala, osasunari lotutako kontuak bazter batean geratu ziren atzo Joseba Ezkurdiak eta Erik Jakak Eibarko (Gipuzkoa) Astelena frontoian egindakoan. Bi pilotariok bete-betean ariko dira igandean, Buruz Buruko Txapelketako bigarren finalerdian; bete-betean, ez batak ez besteak ez baitu min hartu txapelketan.

Hala ere, aldea dago batak eta besteak finalerdietarako sailkatzeko egin behar izan duten ahaleginean. Jakak lau partida jokatu ditu; final-zortzirenetako kanporaketa, eta final-laurdenetako ligaxkako hirurak; Ezkurdiak, ordea, bi neurketa besterik ez ditu jokatu: final-zortzirenetako kanporaketa, eta ligaxkako bakarra, aurrenekoa, Jose Javier Zabaletari 22-21 irabazi ziona; ez du jokatu besterik, bai Jokin Altunak eta bai Dario Gomezek min hartu baitzuten, eta uko egin baitzioten haren kontra aritzeari. Apirilaren 23tik ez du jokatu txapelketan; beraz, azkenekoz jokatu eta hiru astera ariko da berriro. Denbora asko da, eta, sasoiari eusteko, binakako partida bat jokatu zuen joan den larunbatean, Donostian. Gustura amaitu zuen norgehiagoka.

Jokatu gabe egon den garaian, «buru-belarri» aritu da entrenatzen: «Nire eskuetan zegoen guztia egin dut ahalik eta ondoen iristeko. Lasai nago, lan ona egin baitut. Gustura nago; sentipen onak ditut». Nolanahi ere, badu «kezka», azken bi asteetan ez baitu bizi izan «txapelketa jokatzeak eragiten duen tentsioa».

Haren arabera, «sekulako saria» litzateke finala jokatzea; lehena luke berak. «Oso polita litzateke. Lana egin dugu bertan izateko, baina azken koska falta zaigu, eta zaila da; lan handia egin beharko dut irabazteko. Baina ezin naiz itsutu horrekin. Buru-belarri ekin behar diot partidari».

«Aurkari arriskutsua da, eta erasokorra; beti jokatzen du mugan, eta azkar bukatu nahi izaten du tantoa»; halaxe definitu zuen Jaka. Argi du egitekoa: «Frontisetik urrun eduki behar dut. Nik eraman behar dut erritmoa».

Pilota ezberdinak

Jaka, berriz, «oso pozik» dago bi urte geroago finalerdiak jokatuta. Txapeldun izan zen duela bi urte, eta iaz ezin izan zen txapela lortzeko lehiatu, perikarditisa izan baitzuen txapelketa aurkeztu baino bi egun lehenago. «Gogotsu nago, baina oso zaila izango da. Galtzeko gutxi dut, eta ilusio handia. Lanak eman nahi dizkiot».

Ez du aitzakiarik ondo ez jokatzeko. «Hobeto egon naiteke, baina okerrago ere bai. Ezin naiz kexatu; astero jokatu ahal izan dut. Beste batzuk, ordea, okerrago ibili dira, min hartu baitute. Argi dago Josebak atseden handiagoa izan duela, baina horrek ez du zertan abantaila izan».

Tantoa azkar bukatzen saiatuko da, eta hori kontuan hartuta aukeratu zituen pilotak. Ezkurdiak aukeratutakoen pisu antzekoa dute, baina horiek baino gutxiago irteten dira frontisetik.

Bitan jokatu dute elkarren aurka buruz buru, eta bietan nagusitu da arbizuarra: 2018an, final-zortzirenetan: 22-15; eta 2019an, final-laurdenetan: 22-14. Jakak ez dio garrantzirik eman horri: «Orduz geroztik, biok egin dugu gora. Irekia dago partida».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Marcelino Garcia Toral, atzo, Athleticeko aulkian ez duela segituko iragartzeko prentsaurrekoan. ©MONIKA DEL VALLE / FOKU

Ez du interesik ikusi

Haritz Gallastegi

Marcelino Garciak uko egin dio Athleticen jarraitzeko aukerari, hiru hautagaien partetik ez duelako proiektu bat garatzeko apusturik ikusi. Penatuta doa

Jai Hindley, Richard Carapaz eta Mikel Landa, lehia betean, atzo. ©ITALIAKO GIROA

Beste urrats bat podiumerantz

Eñaut Agirrebengoa

Landak erasora jo du etapa nagusian, eta indartsu dagoela berretsi du; Hirt gailendu da Aprican

 ©Monika del Valle / FOKU
Ilunpe Azpeitiko taldeko pilotariak. ©BERRIA

Etxean uso, kanpoan otso

Jon Eskudero

Ultzamako Buruzgainek eta Azpeitiko Ilunpek irabazi egin dute Berria txapelketan, eta elkarren kontra jokatuko dute final-laurdenetan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.