Europa iparraldea, Errusiarekin kezkatuta

Norvegiako, Danimarkako, Finlandiako eta Suediako defentsa ministroek eta Islandiako Atzerri arduradunak artikulu bat argitaratu dute Aftenposten egunkari norvegiarrean. Kezka agertu dute bertan, Europa iparraldeko segurtasun egoerak «okerrera» egin duelako azken urtebetean. Errusiako Gobernuak handitu egin ditu defentsako inbertsioak, eta jarduera militarra areagotu du Itsaso Baltikoan. Mugimendu horiek «erronkatzat» jota, defentsarako lankidetza handitu behar dutela ebatzi dute herrialde nordikoek, «sor daitezkeen krisi edo gertakarietarako prest egoteko». Europako Batasunak eta NATOk daukaten defentsarako hitzarmenaren osagarri litzateke aliantza berria, nahiz eta Islandia eta Norvegia ez diren EBko kide, ez eta Suedia eta Finlandia NATOkoak ere.