Albistea entzun

Izei Permach. Zubileta Evolution Zuazoko jokalaria

«Egindako lan onaren fruituak jasotzeko, pauso bat ematea falta zaigu»

Europako Txapelketarengatik izandako etenaren ostean, larunbatean itzuliko da Espainiako Ohorezko Maila. Zuazok Gijonen kontra jokatuko du. Permachek dio lan «ona» egin dutela etenean eta «gogoz» daudela.
MONIKA DEL VALLE / FOKU Tamaina handiagoan ikusi

Ainara Arratibel Gascon -

2022ko azaroak 24

Bigarren denboraldia du Izei Permachek Zuazon (Zarautz, Gipuzkoa, 1999). «Gustura» dago. «Hasieran pixka bat galduta nengoen, baina oso eskertuta nago eman didaten konfiantzarekin».

Europako Txapelketa dela-eta izandako etena nola joan da?

Egia esan etena behar genuen, fisikoki taldea nahiko kargatua zegoelako. Bi asteko oporraldia izan genuen, eta azken bietan, berriz, gogor egon gara entrenatzen. Bi lagunarteko jokatu ditugu, Gijonen eta Bera Beraren kontra. Gijonen kontrakoan kostatu egin zitzaigun partidan sartzea. Goizez jokatu genuen neurketa, eta ez gaude horretara ohituta. Baina gero ondo aritu ginen. Bera Beraren kontra ere itxura ona eman genuen.

Halako etenak hobetzeko ere baliatzen dira. Zertan jarri duzue arreta?

Beti daude tekniko-taktikoki konpontzeko gauzak. Baina, hortik harago, arretan eta irmotasunean hobetu behar dugu, partidetako momentu jakin batzuetan sartuago egoteko. Hori landu dugu. Gainontzean, uste dut talde txukuna dugula, eta ondo ari garela lanean. Azken pauso txiki bat falta zaigu, partidak erabaki eta egiten ari garen lanaren fruituak jasotzeko. Izan ere, aurreko sasoian bezala, ikusleentzat eta jokatzen dugunontzat erakargarria den jokoa egiten ari gara.

Garaipen bat, bi berdinketa eta hiru porrot pilatu dituzue. Irmotasun eta arreta falta puntual horiengatik galdu dituzue partida horietako batzuk?

Bai. Askotan segundo gutxi batzuen kontua izaten da, gainera. Baina goi mailan ordaindu egiten da. Adibidez, berdindu ditugun bi norgehiagokak irabazteko modukoak ziren. Aurreko denboraldian antzekoa gertatu zitzaigun.

Taldea gaztea izateak badu eraginik horretan?

Alde batetik bai. Baina taldeak baditu eskarmentua duten jokalariak ere. Uste dut gehiago dela izaera kontua, eta alde horretatik agian falta zaiguna da irmotasun handia duen jokalari bat. Baina, aldi berean, denon lana da hori, eta talde gisa eman behar dugu aurrerapausoa alor horretan.

Puntu aldetik espero zenuten tokian zaudete?

Liga hasiera nahiko gogorra izan genuen, lehen hilabetean Ro'Casaren eta Malagaren aurka jokatu behar izan genuelako, ligako bi talde indartsuenetakoak. Partida horiek galtzea normala izan daiteke. Baina Porriñoren eta Granollersen aurkako partidekin minduta amaitu genuen. Nor baino nor gehiago aritu ginen haien kontra, baina ez genuen asmatu irabazten. Elxen kontrako berdinketa justua izan zen, eta Logroñoren kontrako garaipenak konfiantza handia eman zigun. Hasiera zailari buelta ematen ari gara, eta datozen hiru partidak oso garrantzitsuak izango dira hori berresteko. Izan ere, gure pare ari diren hiru talde izango ditugu aurrean: Gijon, Beti Onak eta Aula Valladolid. Aurkariak gutxietsi gabe, irabazteko moduko partidak direla uste dut.

Horiek irabazia, eta orain arte baino apur bat erregularragoak izanda, posible ikusten duzu sasoi amaieran titulurako kanporaketak jokatzea?

Bai, erregularrak izanez gero, aukera izan dezakegu borroka horretan egoteko.

Aurreko denboraldian iritsi zinen Barakaldora, eta jada jokalari garrantzitsua zara taldean. Gustura egongo zara, ezta?

Nahiko hasiera zaila izan nuen, lagunarteko lehen partidan min hartu nuelako. Urrira arte ezin izan nuen jokatu. Baina, behin osatuta, Josebak [Rodriguez, Haito entrenatzailea] konfiantza handia eman zidan. Asko jokatu dut, eta taldean rol garrantzitsua nuela sentiarazi dit. Zorte handia izan dut hona etortzeagatik. Oso gustura nago hemen. Horrek guztiak jokalari moduan hazten lagundu dit. Hona etorri nintzenean ahulgune nagusia erasoan nuen. Konfiantza falta nuen, eta hemen asko ikasi dut.

Pibotea postu gogorra da, are gehiago goi mailan. Ez zen erraza izango egokitzea, ezta?

Bai, sekulako saltoa dago: indarrean, potentzian, mugimenduetan, intentsitatean.... Alde handia sumatu nuen, batez ere erasoan. Ez da batere erraza zuloak topatzea. Hasieran zertxobait galduta nengoen. Baina pixkanaka ohituz joan naiz. Gainera, azken partidetan, lesioak tarteko, ia minutu guztiak jokatu ditut. Fisikoki gogorra egiten da. Baina asko jokatzeak hobetzen laguntzen dizu, eta alde horretatik oso gustura nago. Iritsi nintzenetik aurrerapauso handia eman dut. Zuazo lekurik egokiena da horretan segitzeko, eta, hain taldea gaztea izanda, egiten ari garenak meritu handia du.

Gipuzkoarra izanda, gustatuko litzaizuke egunen batean Bera Beran jokatzea?

Nik gustuko dudalako jokatu izan dut eskubaloian. Sekula ez nuen pentsatu Zarauztik irtengo nintzenik beste talde batera jokatzera, are gutxiago goi mailan. Zuazok horretarako aukera hori eman zidan, eta oso eskertuta nago. Gauzak ondo, ez dut neure burua beste toki batean imajinatzen.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Brasilgo selekzioko jokalariak, Suitzari sartutako gola ospatzen. ©RUNGROJ YONGRIT / EFE

Distirarik gabe, aurrera

Zuriñe Iglesias Sarasola

Brasil eta Portugal Qatarko Munduko Kopako final-zortzirenetarako sailkatu dira. Brasildarrek Suitza hartu dute mendean (1-0), eta portugaldarrek, Uruguai (2-0).
AEBetako eta Irango jokalariak, 1998ko Frantziako Munduko Kopan jokatu zuten norgehiagokan. ©BERRIA

Baloia, geopolitikaren gainetik

Ainara Arraitbel Gascon

24 urteren ostean, AEBek eta Iranek elkarren aurka jokatuko dute gaur. Final-zortzirenetarako sailkatzea izango dute jokoan. Geopolitikoki ere esanahi handia du neurketak.
 ©NURIA CASTEJON

«Aurkariek egindako kanpainengatik du ospe txarra Qatarrek»

Ricard Gonzalez

'Qatar. La perla del Golfo' liburua idatzi du Alvarez-Ossoriok. Nabarmendu du Qatar potentzia txikia dela berez, baina potentzia ertaina arlo ekonomikoan eta energetikoan: «Eta hala jokatzen du».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...