Talde, euskal inbertsio enpresa, AIT katalanaren akziodun nagusi egin da

Talde Private Equity arrisku kapitaleko euskal konpainiak AIT Acoustic & Insulation Techniques enpresa katalanaren akzioak erosi ditu, eta parte hartze handiena bereganatu. Ez dute ezagutarazi salerosketaren zenbatekoa, baina Taldek azaldu du Ameriketako Estatu Batuetara hedatu nahi duela AIT, zeinak eraikuntzarako eta automoziorako isolamendu akustikorako materialak fabrikatzen baititu.

AITk 60 urteko eskarmentua dauka, eta 30 milioi eurotik gorako fakturazioa. Aurrerantzean Taldek izango du kapitalaren parte hartze handiena, baina AITren bazkide sortzaileek akziodun eta kudeatzaile gisa jarraituko dute. AITk Europara, Ipar Amerikara, Hego Konora eta Asiara esportatzen ditu produktuen %85. Gaur egun, bi produkzio planta ditu Europan: Bartzelonan eta Polonian. Talde akziodun nagusi gisa sartuta, asmoa da AEBetan martxan jartzea hirugarrena.