Eguna 11:30ean hasiko da, konpartsek jaietan antolatu ohi duten lehiaketa gastronomiko batekin: pintxoak izango dira larunbatean prestatu beharrekoak. Gosez geratzen direnek baserriko piper eta tomate banaketan parte hartzeko aukera izango dute gero, 12:00etan. Ordu berean, haurrentzako pare bat ekintza ere egongo dira: batetik, jolasak; eta, bestetik, inklusio tailerra, Txokobideren eskutik.
Jandakoei laguntzeko, ardo dastatzea antolatu dute konpartsek, 12:30ean. Geroago, 14:30ean, pintxo lehiaketako sariak banatuko dituzte, eta, jarraian, 15:00etan, konpartsen arteko bazkaria egingo da.
Goiza gastronomikoa izango da, baina arratsaldean musika izango da protagonista. Lehian taldekoen erromeriak jarriko ditu lehen notak, 17:30ean. Konpartsen kalejirarekin bukatuko da eguna: 19:30ean hasiko da, eta Orkrestak jarriko du musika oraingo horretan.
Txosnen lekuaren aldaketa
Konpartsakide Egunaren ekintzak helaraztearekin batera, udalak «aurrez ezer jakinarazi gabe» hartutako erabaki bat salatzeko ere aprobetxatu zuten atzoko prentsaurrekoa Bilboko Konpartsek.
Berriki jakin dute Bilboko Udalak Areatzako erromeria Plaza Biribilera eraman duela, eta plaza horretako txosnak Erripa kaira aldatuko dituela. Konpartsek luxuzko hotel baten irekierari egotzi diote aldaketa, eta, ondorioz, «negozio pribatuek jai eremuaren antolaketa baldintzatzea» salatu dute.Bilboko Konpartsetako kide den Iñigo Fernandez de Martikorenak aldarrikatu du doakotasunetik eta parte hartzetik antolatzen duten eragileek kudeatu behar dutela Aste Nagusia.
Konpartsakide Eguna
Etzi, Bilboko Areatzan, 11:30ean hasita.