Albistea entzun

Zaletasunak hauspotutako jokoa

Eneko Otañok eta Ugaitz Mugertzak aizkora apustua jokatuko dute bihar, Azpeitian. Beizamarrak 21 kana-erdiko moztuko ditu; mutrikuarrak, hogei. Otañoren laugarren jokoa izango da, eta Mugertzaren lehena.
Eneko Otaño eta Ugaitz Mugertza, elkarri eskua ematen, apustua adostu zuten egunean, Azpeitiko Mendizabal jatetxean.
Eneko Otaño eta Ugaitz Mugertza, elkarri eskua ematen, apustua adostu zuten egunean, Azpeitiko Mendizabal jatetxean. MAILO OIARZABAL Tamaina handiagoan ikusi

Jon Ander De la Hoz -

2023ko martxoak 25

Eneko Otañok (Beizama, Gipuzkoa, 1994) eta Ugaitz Mugertzak (Mutriku, Gipuzkoa, 1987) zorroztu dituzte beren aizkorak. Bi aizkolari horiek apustua jokatuko dute bihar, Azpeitiko zezen plazan (12:30). Otañok 21 kana-erdiko moztuko ditu —54 ontzako enborrak dira—. Mugertzak, berriz, bat gutxiago. Alde bakoitzak 5.000 euro jarri ditu jokoan.

Abenduan hitzartu zuten apustua, zezen plazatik gertu, Mendizabal jatetxean. Ordutik, lau hilabeteko prestaketa aldia osatu dute, eta biak garai onean ailegatuko dira. Otañok adierazi duenez, «gustura» dago egin duen lanarekin: «Luze egin da lau hilabeteko aldia, baina pozik nago egindako lanarekin, eta sasoi onean nago. Ea lan ederra egiteko moduan naizen».

Mugertzak ere tentu handiz osatu du lana, eta «ondo» dago probaren atarian. Hark adierazi duenez, programa bat bete du apustuaren egunera «ondo» ailegatzeko. «Hasieran pixka bat kosta zitzaidan, entrenamendu luzeak zirelako eta astindu handiak hartu nituelako. Halere, prestatzailearen eskuetan egon naiz, eta sasoi onean nago».

Otañok abantaila eman dio Mugertzari, egur bat gutxiago moztuko baitu mutrikuarrak, eta kontuan hartzekoa da hori. Beizamarrak uste du «lehia estua» izango dela, eta, horri esker, «politagoa» ere bai: «Uste dut apustu estua izango dela biontzat. Ez da txapelketa baten parekoa, nik egur bat gehiago moztu beharko dut eta. Zaila dago, baina lan ona egiteko moduan nago».

Hain justu, Otañok hogei kana-erdiko lana egin zuen bere azken apustuan. Orduan, Xabier Orbegozo Arria V.a izan zuen aurkari, eta Otaño nagusitu zen. Biharkoa laugarren apustua izango da harentzat. 20 urte zituela jokatu zuen estreinakoa, Mikel Larrañagaren aurka. Beste bi egin ditu gerora; Mieltxo Mindegiaren kontra bat, eta iaz beste bat. Larrañagarekin galdu ondotik, irabazi egin ditu azken biak. Sarri adierazi du gustuko dituela halako lehiak.

Mugertzak, berriz, estreinako aldia izango du biharkoa. Plazan ibilbide luzea osatutako aizkolaria den arren, lehendabiziko trabesa du oraingoa: «Ilusio berezia pizten dit. 30 urte badira aizkora lehen aldiz hartu nuela, eta asko aritu naiz txapelketetan eta erakustaldietan. Apustu bat egiteko aukerarik ez dut izan sekula; aurrerapenik behintzat ez, eta, lotu genuenetik, ilusio handiarekin ari naiz».

Mugertzak bat baztertu

Lan ezberdinak egingo dituztenez, egurren banaketak ere badu bere mamia. Otañok 11 egur eramango ditu plazara. Mugertzak, berriz, hamar. Bakoitzak bere erdiak eta bestearen erdiak prestatuko ditu. Mugertzak Otañok eramandako egurretatik bat baztertuko du, mutrikuarrak ez baitu hura ebaki beharrik izango.

Bi aizkolariek aurkari sendoa espero dute plazan. Mugertzak Otañoren ezaugarririk behinena azpimarratu du: «Otaño oldarkor ateratzen da beti, indartsu hasten da. Motor oneko mutila da, eta nire aldean, ohituago dago lan luzeetara. Zaildua dago, eta ez diot hutsik antzematen. Bakoitzak bere maila du, diferentziak dauzkagu, eta ea kana-erdiko alde horrekin apustua lotzen dugun».

Otañok, berriz, Mugertzaren gaitasuna nabarmendu du: «Urte asko egin ditu plazan, eta Gipuzkoako txapeldun ere izandakoa da. Maila handian aritu da, eta uste dut oraingoan ere hala izango dela. Badakit Angel Arrospiderekin-eta jardun dela, eta ondo ailegatuko da».

Biek ala biek apustua irabaztea dute xede, baina, oroz gain, giro «ona» nahi dute plazan. «Irabaztea dut helburu», esan du Mugertzak, baina zehaztu du gustatuko litzaiokeela lehia «estua eta ikusgarria» izatea. Zaletasunetik sortutako jokoak zaletasuna piztu nahi baitu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskariansek eta Irlandako Munster taldeak 2006an Miarritzeko Aguilera estadioan jokatutako partida. ©BOB EDME

Euskal errugbia batuz

Iñaki Berastegi

Sei urteren ostean, Euskariansek lagunarteko partida bat jokatuko du gaur: Kataluniako selekzioa izango du arerio Donostian, Anoetako estadio txikian. Zazpiko errugbian ere «anbizio handiko egitasmoa» osatu nahi dute.

Simone Inzaghi Inter Milaneko entrenatzailea eta Pep Guardiola Manchester Cityko entrenatzailea. RONALD WITTEK / efe - Adam Vaughan / EFE ©BERRIA

Cityk Txapeldunen Liga aurrenekoz irabaz dezake gaur

Eñaut Agirrebengoa

Cityk Txapeldunen Liga aurrenekoz irabaz dezake gaur, eta sasoi honetako hirugarren titulu handia lortu. Ezustean harrapatu nahi du Interrek (21:00, La 1 eta TF1).

 ©JULIO MUÑOZ / EFE

Catenak Osasunan jokatuko du, eta Traorek, Realean

Berria

Talde txuri-urdinak jakinarazi du Cecilia Marcosek beste bi urtez jarraituko duela klubean, 2025eko ekainera arte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.