HIZPIDEAK

Ezohiko greba

Mikel P. Ansa -

2019ko urtarrilak 5
Ez da ohiko greba bat. Batetik, immigranteak direlako langile asko, gehienak. Bestetik, lehen sektorean gertatzen ari delako, laborantzan. Eta, azkenik, LAB delako borrokaren gidaria, non eta Erriberan, Azkoienen. Huerta de Peraltako greba mugagabeak beste osagai askoren arrastoak ditu aldamenean, eta horrek ezohiko bihurtzen du, baina funtsean lan gatazka ohiko bat da: beren eskubideak defenditu nahi izan dituzten langile batzuk kaleratu ditu zuzendaritzak, eta horiek berriro lanean hartzea nahi du langile batzordeak; prekarizatutako sektore batean —laborantza—, prekarizatutako langile jendearen artean —immigranteak— eta prekarizatutako eskualde batean —Erribera—. Astearteko bileratik zuzendaritzak zer erantzungo zain zeuden, eta atzo erantzun zieten ezetz. Hortaz, abenduaren 26an hasitako greba mugagabearekin jarraitzea erabaki du langile batzordeak. Orain arte, egin dituzte manifestazioak, blokeatu dituzte lantokiko ateak, egin dituzte protestak egunero, eta jaso dituzte foruzainen borrakadak. Baina ez dute lortu zuzendaritzak eskua ematea, eta, orain, langile batzordeak Nafarroako Gobernuari eskatu dio bitartekari gisa esku hartzeko. Ez da enpresa txikia Huerta de Peralta. 2016an lau milioi euroren inbertsio bat egin zuen, produkzio sistemak berritu eta baratzeak handitzeko. Nafarroako Gobernuak ia 300.000 euroren laguntza eman zion orduan. Aurreko urteetan ere eman izan dizkio laguntzak. Administrazioak baluke zer esana, beraz; hitz egiteko borondaterik izango balu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna