Estrasburgori men egin gabe

Xabier Atristain atxilotu eta Martutenera eraman dute preso. Espainiako Auzitegi Gorenak bizkar eman dio Europako Giza Eskubideen Auzitegiak emandako ebazpenari —ebatzi zuen Atristainek ez zuela bidezko epaiketa izan, inkomunikazio aldian haren defentsarako eskubidea urratu zelako—. Gorenak ez du bere gain hartu Estrasburgoko epaileen ebazpena, iritzita inkomunikazio aldiko inkulpazioez gain badaudela presoaren aurka beste froga batzuk ere.

Gogorra da Espainiako Auzitegi Gorenaren ebazpena. Gogorra torturaren eta tratu txarren bidez lortutako autoinkulpazioei babes inplizitua ematen dielako. Eta gogorra, beste dozenaka presok har zezaketen auziko jurisprudentzia ezerezean uzten duelako. Agian hori da, gainera, Auzitegi Gorenak lortu nahi duen helburu nagusia: hots, ez dadila berriz gerta Parot doktrinaren modukorik.

ETAk bere jarduera armatua amaitu eta hamar urtera, Espainiako auzitegiak eta estatu barruko beste erakunde batzuk oraindik trabak jartzen ari zaizkio preso eta iheslarien egoeraren konponbideari. Eta, kasu honetan, gainera, nahiz eta Atristain atxilotzera Ertzaintza bidaltzea normalizazio keinu gisa salduko duten, Ertzaintza —eta Eusko Jaurlaritza— Espainiako erakundeen aldera lerraraztea dakar finean, Estrasburgoko auzitegiarekiko desobedientzia itxura duen ariketa juridiko batean.