Albistea entzun

Itxuraldaketarik handiena

Txupinazoaren eztandarekin batera hasi dira Iruñeko bestak; hiria zuri-gorriz jantzi, eta musikaz eta parrandarako gogoz bete da

Udaltzainak saiatu dira plazan ikurrinak egotea eragozten, baina hamaika sartu dira
Udaletxeko plazan, urtero bezala, jendetzak egin zuen bat atzo Iruñeko besten hasiera iragartzen duen txupinazorako.
Udaletxeko plazan, urtero bezala, jendetzak egin zuen bat atzo Iruñeko besten hasiera iragartzen duen txupinazorako. LANDER F. ARROIABE / ARGAZKI PRESS

Edurne Elizondo -

2011ko uztailak 7

Sanferminekin batera itxuraldaketa erabatekoa jartzen da martxan Iruñean. Atzo eguerdian eztanda egin zuen, ohi bezala, besten hasiera iragarri zuen txupinazoak, eta, suziria lehertzearekin batera, Iruñeak egunerokoa ez duen aurpegia erakutsi zien etxekoei, bai eta Nafarroako hiriburura ailegatu diren bisitari guztiei ere. Lehen hutsik zena, jendez bete zen. Bestak hartu zituen hiriko txoko guztiak, eta uztailaren 14a bitarte zaila izanen da musikaz, parrandaz, edariz eta bestarako gogoz beteta ez dagoen izkinarik aurkitzea.

Eguerdiko hamabietan eman zion su suziriari Iruñeko alkate Enrique Maiak. Udaletxe plazan, dena den, besta anitzez ere goizago hasi zen. 09:30erako jada hasi ziren lagun taldeak plazan bat egiten. Iruñetik kanpoko jendea zen gehiena, ordu horretan, etxekoak, hamaiketakorako prestatzen ari baitziren, oraindik ere.

Eguraldia alde izan zuten iruindarrek, eta tarteka hodeiek zerua estali bazuten ere, eguzkia izan zen nagusi. Plazako tenperaturak, hala ere, eguzkiaren eraginez baino gehiago, bertan zirenen bestarako grinaren eskutik egin zuen gora.

Plazan, eguerdia hurbildu ahala, koloreak aldatuz joan ziren. Hasieran zuri zen arropa ardoaren, xanpainaren, ketxuparen ondorioz gorri eta beltz bilakatu zen. Hasieran, lagun talde txikia zen, baina, gero, jende andana bihurtu zen. Jendetzak hartu zuen plaza. Inork ez zuen txupinazoaren unea galdu nahi. Denek izan nahi zuten une horren lekuko.

Hamaika ikurrina

Besta izan zen atzoko txupinazoan nagusi, baina hainbat tentsio une izan ziren Udaletxe plazan ikurrinak sartzerakoan. Kalejira egin zuten 11:00 aldera Txapitela karrikatik Udaletxe plazaraino ikurrinaren aldekoek. Txapitelan Foruzaingoa zegoen, baina kalejiran parte hartu zutenek aurrera egin zuten. Mercaderes karrikan, berriz, Udaltzaingoa zuten zain. Bultzadak izan ziren, eta borrak ere eskuetan hartu zituzten udaltzainek. Hala ere, ikurrinak zituzten pertsonek lortu zuten plazara sartzea, eta udaltzainek atzera egin behar izan zuten.

Hainbat ikurrina txiki eta bi handi zabaldu zituzten Udaletxe plazan 11:30 aldera. Euskal presoen aldeko pankarta handi bat ere zabaltzea lortu zuten.

Plazako oihu guztiak San Ferminen aldeko bilakatu ziren eguerdirako minutu eskas falta zirenean. 11:57an zabaldu zen herriko etxeko balkoia, eta, 12:00etan, txupinazoa bota zuen Enrique Maia alkateak. «Pamploneses, pamplonesas, viva San Fermin, Gora San Fermin!», oihukatu zuen UPNko agintariak. Udaletxean bat egin zuten, bertzeak bertze, Yolanda Barcina alkate ohiak eta Gipuzkoako ahaldun nagusi Martin Garitanok.

Suziriaren eztandarekin batera besta lehertu zen Iruñean. Sanferminek hartu zituzten hiriko txoko guztiak, eta bestak ez du etenik izanen uztailaren 14a bitarte. Bertze Iruñea piztu da sanferminekin batera, eta bertze Iruñea horretaz gozatzeko aukera izanen dute datozen egunotan etxekoek, bai eta egunotan etorri diren bisitari guztiek ere. Bada zer ikusi eta zer egin. Denentzako bestak baitira sanferminak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Olatu sinkronizatua

Berria

Bi urte barru Europako kultur hiribirua izateko bidean, bosgarren Olatu Talka lehertu da asteburu honetan Donostian, 250etik gora proposamen sinkronizatu eskainita parte hartu nahi duen orori. Sormena, kirola argazkian, Easo igeriketa taldeko kideen atzoko erakustaldia, aldarrikapena eta elkartasuna nahastu dira egitarauan. Donostiatik kanpo ere zabaldu da aurten eskaintza, gainera.

Alarmak piztuta

Berria

Nafarroan, berezko arraza batzuk galzorian

60 urteko gaztea

Berria

Fender Stratocaster gitarra elektrikoa, 1954tik doinuka

Hemen da Olentzero

Berria

Gaur kalez kale eta etxez etxe ibiliko da, haurren begiradapean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.