Albistea entzun

Kataluniako hauteskundeak. Auzibideak

Prozesu subiranistaren aurkako kausa zabaldu du Auzitegi Gorenak

Independentziarako bide orria ezarri zuten batzordeko kideak ikertzeko agindu du Llarena epaileak. Aske uzteko eskatu du Junquerasek, «elkarrizketan» oinarritutako programa defendatzeko
Tentsio uneak izan ziren atzo Lleidan, Sixenako artelanak Espainiara eramatea eragotzi nahi zutenen eta Mossos d'Esquadren artean.
Tentsio uneak izan ziren atzo Lleidan, Sixenako artelanak Espainiara eramatea eragotzi nahi zutenen eta Mossos d'Esquadren artean. ADRIÁN ROPERO / EFE Tamaina handiagoan ikusi

Igor Susaeta -

2017ko abenduak 12

Pablo Llarenak eskatu dio Guardia Zibilari iker ditzala Kataluniaren independentziarako bide orria ezarri zuten batzordeko kideak. Jakin nahi du zein rol jokatu zuten. Beraz, prozesu subiranistaren aurkako kausa judiziala zabaltzea erabaki du Espainiako Auzitegi Goreneko magistratuak. Ikerketapean jarri ditu politikari kargudunak —Marta Rovira ERCko idazkari nagusia eta Anna Gabriel CUPeko diputatu ohia, adibidez—, baita batzordearen jarduna babestu zuten eragile sozial independenteak ere. Hortaz, Llarenak irekitako diligentziek ehunka laguni eragin diezaiekete.

Zenbait komunikabidek atzo kaleratutakoaren arabera, kausaren sumarioan berebiziko garrantzia du Generalitatearen barne dokumentu batek. Josep Maria Jove Generalitateko Ekonomia eta Ogasun Departamentuko idazkari nagusiaren etxean atzeman zuen Guardia Zibilak joan den irailaren 20an, urriaren 1eko erreferenduma prestatzea egotzita hamabost lagun atxilotu zituenean. Dokumentu horrek zehazten du, ustez, independentziarako bide orria, eta batzordearen jardunaren berri ematen du.

Matxinada, sedizioa eta diru publikoaren erabilera okerra delituak egotzita inputatuta dauden Kataluniako Gobernuko kideen defentsek zalantzan jarri dute dokumentu horrek sumarioan eduki dezakeen balioa. Halere, Llarenak horri heldu dio, hainbat hedabidek iturri judizialak aipatuta adierazitakoaren arabera, Oriol Junqueras presidenteordea, Joaquim Forn Barne kontseilaria, eta Jordi Sanchez zein Jordi Cuixart ANC Biltzar Nazional Katalaneko eta Omnium Culturako presidenteak espetxean mantentzeko.

Llarenak eskatu dio Guardia Zibilari argitu dezala ea independentzia lortzeko ahaleginenean estrategiarik partekatu ote zuten CDC Kataluniako Konbergentzia Demokratikoak, ERCk, ANCk, Omnium Culturalek eta AMI Independentziaren aldeko Udaleko Elkarteak. Eta jakin nahi du, besteak beste, irailaren 20an eta 21ean —Ekonomia Kontseilaritza miatu zuten—, urriaren 1ean, eta urriaren 3ko zein azaroaren 8ko greba orokorretan «ekintza biolentorik» egon ote zen. Horretarako, bideoak, argazkiak eta beste eskatu ditu.

Gorenak joan den azaroaren 24an hartu zuen Kataluniako prozesu subiranistaren aurkako auzi judizialaren erabateko kontrola, eta bi erabaki hartu zituen lehengo astean. Batetik, auzia Belgikatik Espainiara lekualdatzeko asmorekin, Carles Puigdemont Kataluniako presidenteari eta lau kontseilariri Auzitegi Nazionalak ezarritako euroaginduak kentzea. Eta, bestetik, Junquerasi, Forni, Sanchezi eta Cuixarti Auzitegi Nazionalak jarritako kautela neurriei eustea.

Hain zuzen, Junquerasen defentsak haren kartzelatzearen aurkako apelazio helegitea aurkeztu zuen, atzo, Auzitegi Gorenean. ERCren zerrendaburua da abenduaren 21eko bozetan, eta, haren abokatuen arabera, espetxetik kanpo egon beharra dauka «elkarrizketan» oinarritutako programa defendatu ahal izateko. Defentsak dioenez, kanpainan parte hartzeko eskubidea du, eta ez dago, gainera, haren behin-behineko kartzelatzea justifikatzen duten ustezko delituak errepikatzeko arriskurik.

Aldebakarreko bidea

Alderdiak kanpainan murgilduta daude. Eta ERCk, azken asteotan esandakoaren kontrara, ez dio aldebakarreko bideari muzin egiten. Hala egingo luke, Rovirak herenegun adierazi zuenez, subiranismoak irabazi «eta Espainiako Gobernuak negoziatzeari uko egiten badio». Mariano Rajoy Espainiako Gobernuko presidentea mintzatu zen atzo, ekitaldi batean, eta Rovirari gogorarazi zion Espainian «beti» betetzen dela legea. «Eta hala jarraituko du». ERCko idazkari nagusiak geroxeago erantzun zion, mitin batean: «Rajoyk ez badu aldebakarreko biderik nahi, ez luke negoziazio mahaitik altxatu beharko».

Josep Rull Junts Per Catalunyaren hautagaiak, berriz, nabarmendu zuen hilaren 21eko hitzorduan bi aukera daudela: «Nazioaren eta sumisioaren artean aukeratzea tokatzen da». Eta Carles Riera CUPeko zerrendaburua TV3n elkarrizketatu zuten. Zehaztu zuen zein bi baldintza jartzen dituzten antikapitalistek, gobernu independentista bateko kide izateko: «Generalitatea berrezartzea eta errepublika gauzatzea».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Zero COVID neurrien aurkako manifestariak, bart, Pekinen. ©MARK R. CRISTINO / EFE

Milaka lagun kalera irten dira Txinan, Zero COVID politiken aurkako protestetan

Paulo Ostolaza

Herrialdeko hiri nagusietan izan dira protestak, tartean, Pekin hiriburuan. Urumqi hiriko sute batean hamar lagun hil izanak leherrarazi ditu manifestazioak.

Gerald Darmanin Frantziak Barne eta Itsasoz Haraindiko ministroa —irudiaren erdian—, gaur, Noumean, bilkura batean ©@GDarmanin

Darmaninek «elkarrizketei berriz ekitea» jarri du helburutzat Kaledonia Berrian

Ander Perez Zala

Urtebetean baino gehiagoan lehen aldiz, independentistek baiezkoa eman diote negoziazioetan parte hartzeari.

Peruko presidente Pedro Castillo (erdian), Ministroen Kontseilua berritu ostea, joan den ostiralean, Liman. ©EFE

Peruko Botere Judizialak Castillori eskatu dio estatuko erakundeak bilera batera dei ditzala, adostasuna lortzeko

Mikel O. Iribar

Gobernuaren eta Kongresuaren arteko tentsioa areagotu egin da azken egunotan; ganberak ezezkoa eman dio presidentearen konfiantza mozioari, eta Ministroen Kontseilua berritu behar izan dute.

Irango emakumeen aldeko protesta, Istanbulen (Turkia), iragan larunbatean. ©EFE / Erdem Sahin

Iranek ez du NBErekin kooperatuko protestetako errepresioa ikertzeko

Maddi Iztueta Olano

NBEk misio independente bat sortu du mobilizazioen aurkako errepresioa ikertzeko. Mahsa Aminiren hilketaren aurkako manifestazioetan 300 lagundik gora hil dituzte, eta 15.000 herritar atxilotu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.