Adorea ematen duten sei istorio

Berez, ez dago urrunera jo beharrik zailtasunei eta ezinei, bazterkeriei eta bidegabekeriei aurre egiten dien jende saiatu eta eredugarriaren istorioak ezagutzeko eta haietan sakontzeko, baina interesgarria izan daiteke guregandik geografikoki urrun dauden horrelako pertsonak eta istorioak ezagutzea ere. Horretarako aukera ematen du Impact with Gal Gadot dokumental sailak (National Geographicen YouTubeko kanalean). Kasu horretan, zehazki, AEBetakoak eta Brasilgoak dira pertsonaiak eta kontakizunak. Gal Gadot israeldar aktoreak ekoitzi ditu, hainbat kiderekin batera —horien artean Vanessa Roth, Freeheeld dokumental Oscar saridunaren ekoizlea—, eta Gadot da dokumentalen aurkezlea ere.

Sei dokumentalek osatzen dute Impact with Gal Gadot, eta bakoitzean emakume gazte bat da protagonista. Lehenengoan, Ice Breakers, Kameryn, Detroiteko 20 urteko patinaje artistikoko entrenatzailea, emakume beltz gazteak izotz pistan zein pistatik kanpo ahalduntzen ahalegintzen dena. Bigarrengoan, Surf Sisters, Kelsey, ahizpa bikia COVID-19aren ondorioz hil ondoren dolua beste era bateko traumak nozitzen dituzten emakume batzuekin batera surf-terapiako programa baten bidez igarotzen ari dena, Kalifornian. Hirugarrenean, The Ripple Effect, Arianna, ur edangarria eskuratzeko arazoak dituzten bizilagunei lagundu nahian ura iragazteko sistema bat ikertu duen 19 urteko Puerto Ricoko unibertsitate-ikaslea. Laugarrenean, Coming Home, Kayla, etxerik gabe geratutako Memphisko emakume beltz transexualei era askotako laguntza ematen aritutakoa. Bosgarrenean, Killer Red Fox, Shirell, Louisianako bere tribuko lehen emakume buruzagia. Seigarrenean, Nao Ponta dos Pés, Tuany, Rio de Janeiroko favela arriskutsuenetako batean neskentzat dantza konpainia sortu zuen 23 urteko dantzaria.

Amorragarria eta arriskutsua gertatzen da sarritan fedea izanez gero eta saiatuz gero dena lor daitekeela dioen autolaguntzako filosofia, ezin baita ahaztu batzuetan federik sutsuenak eta meritu handieneko ahaleginak ere alferrikakoak izaten direla, baina ezin da ukatu Gal Gadotek dokumental horietan hurreratzen dizkigun istorioak, interesez eta enpatiaz ikusteko modukoak izateaz gain, ikusleari adorea emateko modukoak ere badirela.