Aisialdian gozatzea da helburua, baina balioei ere garrantzia emango die parkeak. «Elkartasuna, gizalegea, jasangarritasuna, berdintasuna, familia eta bizitza osasungarria umeen Gabonetako parkearen nortasunaren eta esentziaren parte dira», antolatzaileek ohar bidez azaldu dutenez. Alde horretatik, euskara ere «zeharkako balioa» izango da, haren erabilera sustatzeko hainbat ekintza izango baitira.
Lehen pabiloiko atetik sartzean, kirol jarduerei lotutako ekintzak topatuko dituzte haurrek, bizimodu aktiboa eta osasungarria bultzatzeko helburua dutenak: Gabonetako lasterketa, saskibaloiko, eskubaloiko eta mahai teniseko txapelketa, eta beisbolean aritzeko tunela, besteak beste. Hainbat jarduera ere egingo dituzte.
Hirugarren pabiloia izango da hiruretan formalena, Gabonetako parkea aurrera atera ahal izateko lankidetzan aritzen diren erakunde eta enpresek informazio postuak jarriko baitituzte. Alabaina, bosgarren pabiloian itzuliko da dibertsioa, barrakek beteko baitute gune hori. Ohe elastikoak, zezen mekanikoak, autotxoke tradizionalak, noria eta sorginaren trena egongo dira, besteak beste.
Elbarritasunen bat duten haurrei ere erraztu nahi izan diete jolas parkean parte hartzea. Hori dela eta, abenduaren 19tik 22rako arratsaldeetan, 15:00etatik 19:00etara, desgaitasun txartela aurkeztuta, erabiltzaileek eta haien laguntzaileek lehentasuna eta hobaridun sarrera izango dituzte parkean sartzeko. Horrez gain, pabiloietan soinua eta argiztapena egokituko dituzte egun horietan.
Bizkaiko Gurutze Gorriak ere egingo du ekarpena haurren jolastokian. Izan ere, lehenengo pabiloiaren alboan, opariak jasotzeko gunea jarriko du erakunde horrek, oparirik jaso behar ez zuten haurrek opariren bat izan dezaten.
Ordutegiak eta sarrerak
Parkearen ordutegi orokorra 11:00etatik 20:00etara bitartekoa izango da, abenduaren 24an eta 31n eta urtarrilaren 5ean izan ezik. Egun horietan, 11:00etatik 17:00etara irekiko dute. Jaiegunetan, hau da, abenduaren 25ean eta urtarrilaren 1ean eta 6an, itxita egongo da. Abenduaren 19tik 22ra, ordutegia 10:00etatik 19:00etara artekoa izango da. Sarrerak BECen webgunean eros daitezke: pin.bilbaoexhibitioncentre.com-en .
