Eskomotor Egunaren lehenengo edizioa ospatuko dute gaur, Eskoriatzan. Herriko motorzaleek aurtengo rallysprinta antolatzeko dirua biltzeko helburuarekin antolatu dute gehienbat. Halere, antolatzaileek jakinarazi dutenez, badaude beste asmo batzuk: «Motorzaleak batzeko, zaletasuna sustatzeko eta motorra aitzakiatzat hartuta, gerturatzen diren guztiek egun on bat igarotzeko».
09:00etan hasiko dira motorrak berotzen, Joseba Iñurrategi pilotalekuan antolatu duten esku pilota txapelketarekin. Gehienez hamasei bikotek hartu ahal izango dute parte, eta hamabi tantora izango dira partidak.
Autoen txanda izango da ondoren. 10:00etatik aurrera, 4x4 trialeko autoen erakusketa egingo da Gorosarri plazan. Santa Marina plazan, aldiz, auto klasikoak eta motorrak ikusi ahal izango ditu jendeak. Eta Fernando Eskoriatza plazan egongo dira lasterketa autoak.
Trikiti soinuek kaleak hartuko dituzte eguerdian, 15:00etan frontoian egingo duten herri bazkariaren aurretik. Bazkarian, 25 euroko menua zerbitzatuko da: entsalada mistoa; txerri saiheskiak eta baserriko oilaskoak parrillan; eta Ezeizako pasteltxoak. Kupela bat sagardo ere egongo da, nahi duenak bertatik edan dezan.
Bazkalostean, 17:30ean, eskupilota txapelketako finala jokatuko da, Mutrikuko (Gipuzkoa) DJ Oier Mendizabalek pilotalekua musikaz girotzen duen bitartean.
Kontzertuen txanda izango da gauean. 21:00etan hasita, punk-rock estiloa uztartzen duten taldeen kontzertuak izango dira Fernando Eskoriatza plazan: Oihu!, Youth United, Erne eta Txakurrak inguruko herrietako taldeak igoko dira oholtzara. Eguna borobiltzeko, emanaldiak amaitzen direnean, musika dantzagarria jarriko du Mendizabalek.
Zaleen bilgune
Festa herriko motorzaleak batzeko eta motorraren munduarekiko zaletasuna sustatzeko baliagarria izatea espero dute antolatzaileek. Era berean, aurtengo Eskoriatzako rallysprinta antolatzeko diru nahikoa biltzea espero dute.
Laburbilduz, Eskomotor Egunaren lehenengo edizioak motorren zaleentzat eta familian aisialdi egun batez gozatu nahi dutenentzat jarduera «zirraragarri eta dibertigarriz» betetako eguna izatea nahi dute.
