Herri Soinuko kideek hainbat lan egin ohi dituzte euskal kultura sustatzeko, eta urteko lehenengoa izango da Hartzaro. Ohiturak eta sorkuntza hedatzea dituzte xede, «gazteria, haurrak, helduak eta zaharrak eskuz esku». Duela 23 urte hasi ziren Uztaritzeko inauteriak berpizteko asmotan, eta ez dute hutsik egin ordutik. Kalean zein aretoetan egindako ikusgarriak izango dira aurten, Uztaritzeko taldeekin eta hortik kanpokoekin: guztira, bostehun lagun inguruk parte hartuko dute inauterietako ekitaldietan, «soinulari, antzerkilari eta dantzariak» kontuan hartuta. Astearte gizena izaten da egunik garrantzitsuena —aurten, martxoaren 5ean—, baina horren aurretik izango da zer ikusi franko. Datorren asteburuan, esaterako, kaskarotak etxez etxe ibiliko dira. Horrez gain, mintzaldi bat eta kontzertu bat izango dira. Ostiralean, hilaren 22an, Xabier Agotek Euskaldunak eta itsasoa hitzaldia emango du Lapurdi gelan. Larunbatean, berriz, Manez eta Kobreak taldearen kontzertua izango da Arruntzako elizan.
Dantza eta musika nagusi
Hilaren 27an, asteazkenean, Kabalkadako momenturik onenak biltzen dituen film bat emango dute, Latsan. Hurrengo egunean, ostegun gizena dela-eta, kotilunak ibiliko dira herrian. Horrez gain, Tutak eta Zirt Zart ikuskizunez gozatzeko aukera izango da Hiribehere pilota plazan.
Ostiralean, martxoaren 1ean, musika eta dantza izango dira nagusi, astebururako motorrak berotzeko. Lehenik, kiroletan, Uztaritzeko gaiteroen emanaldia izango da, eta, horren ostean, Aukeran dantza konpainiak 20 urte ikuskizuna taularatuko du. Gero, gaztetxeak hartuko die lekukoa: Xeiki taldeak kontzertua emango du, eta Patcha Mama taldeak dantzan jarriko du jendea.
Kiroletan izango dira martxoko lehen larunbateko ekitaldiak ere. Dantza izango da nagusi arratsaldean. Lehenengo zatian, Zarena Zarelako, So-K eta Izartxo taldeek emanaldi bana eskainiko dute. Bigarren zatian, berriz, Uztaritzeko txistulariak eta bi dantza emanaldi izango dira: Üda Batez eta Johañe Etxebestek zuzendutako Bedatse batez ikuskizunak.
Igandean, martxoaren 3an, kaskarotak etxez etxe ibiliko dira goizean goizetik. Inauterietako bazkaria ere egingo dute, Latsan, eta Iruñeko Jarauta 69 txarangak girotuko du herria. Inauterietako egun nagusia martxoaren 5a izango da, eta huraxe izango da festibalaren azken eguna: kotilunak, zirtzilak, hartza, zanpantzarren auzia eta beste izango dira.
Hartzaro festibala
Martxoaren 5era arte,Uztaritzen (Lapurdi).
