Klitoria, plazeraren erdigunean

Hautsak harrotu ditu klitori xurgagailu gisa ezagun egin den jostailu sexualak. Bolo-bolo dabil gailua: klitoria du foku, eta xurgatzea metodo. Adituen ustez, orgasmo femeninoan arreta jarriz, plazer sexuala lortzeko aukerak zabaldu ditu. Plazer «azkarraren» eredua ezartzea da arriskua.
Askotariko klitori xurgagailuak.
Askotariko klitori xurgagailuak. I. ZABALETA / FOKU Tamaina handiagoan ikusi

Uxue Gutierrez Lorenzo -

2019ko azaroak 28

Kontaktu zuzenik bako haize hurrupatzeak, suabe, leun eta distantzia laburretik. Aire kirria, intentsitate txikiko bibrazio uhinekin uztartuta. Dena zeharka. Jostailu sexual tradizionalen kontrara, organo genitalen azala ukitu gabe jarduten da klitori xurgagailu esaten zaion tresna. Orain artean, erotikaren alorreko jostailurik gehienek bibrazio zuzena izan dute mekanismo; eta, maiz, sarketa orgasmorako bide. Egitura hori irauli du jostailuak: klitoria jarri du orgasmoaren erdigunean, eta berau kitzikatzeko modu berriak topatu. Sistema horrekin izugarrizko arrakasta lortu du, eta bolo-bolo dabil emakumeen artean.

Gailua ez da berria, ordea. Baina, orain, Satisfyer markak hedatu du, batik bat. Duela bost urte agertu zen plazer lerro hori urratu zuen lehen gailua: Womaizer markak merkaturatu zuen, baina orduan ez zen horrenbeste zabaldu. «Garestia zen; 200 euroren bueltan saltzen genituen guk; Satisfyerrek jostailua merkatu du, eta, gainera, publizate izugarria egin du». Iruñeko Sex Haizegoa sexu dendako arduraduna da Fernando Alonso sexologoa, eta ez du zalantzarik: jostailuaren arrakasta ukaezina da. «Lau hornitzaile ditut, eta laurek dituzte agortuak xurgagailu guztiak; bi aste daramatzagu horrela dagoeneko». Dendan, oraintxe, erakusteko dituen piezak besterik ez du, produktua sustraitu den seinale. «Probatu bezain pronto jakinarazi ziguten bezeroek jostailua oso berezia zela, eta gu ere hasi ginen produktua lehen lerroan jartzen». Egun salgai dituen modeloek 19 eta 55 euro arteko prezioa dute. «Batez ere, baterian dago aldea; merkeenak pila bidez funtzionatzen du, eta gainerako guztiek karga daitezkeen bateriak dituzte». Are, merkaturatu dituzten enpresen zerrenda ere hazi da.

Arrakastaren gakoak

Maria Torre sexologo eta kazetaria jostailuaren arrakastaz kontziente da. Hainbat fakotoreren emaitza dela uste du. «Hasteko, marketina; ikaragarria izan da Satisfayerrek xurgagailua sustatzeko egin duen kanpaina». Baina ez hori bakarrik: «Eta, noski, orgasmo femeninoa erdigunean jarri du; eta plazeraren zentroan, klitoria». Berritasunak duen xarma nabaritu du Torrek; izan ere, sexualitatearen ulerkeran aldaketa dakar jostailuak. «Emakumeon sexualitatea hizketagai bihurtu da tankera honetako gailuei esker». Agurtzane Ormatza sexologo eta psikologo klinikoak baieztatu du lehendabizikoz baliatu direla «emakumeen balorazioak» erotikaren alorreko produktu bat bultzatzeko: «Irrika piztu du, desioa; 'nik ere nahi dut' efektua sortu du: andreentzako gailu sexual batekin hori ez da inoiz pasatu». Hedadura horretako proiekzio kolektiboa estreinakoz ezagutu du Ormatzak andreen erotika ardatz duen produktu batean.

Aurrekorik gabeko jostailuaren funtzionamendua esplikatu du Torrek: «Klitoriaren azala zuzenean ukitu gabe simulatzen du sexu orala: aire hurrupatze leunen bidez kitzikatzen zaitu, xurgagailuaren buruan duen mintza mugituz». Sinple baina eraginkor, bibrazio sotilak eta xurgatzea gurutzatuz orgasmo «ezberdinak» sortzen ditu. «Orgasmo oso biziak lortzen dira, igurtzi bortitzik gabe». Hori lortzeko, intentsitatea erregulatzeko aukera zabala ematen duela nabarmendu du sexologoak.

Prozedura mekanikoaz harago, beste aspektu batzuetan ere jostailu tradizionaletatik bereizi dela uste du Torrek: «Forman ere berritzailea da: ez du itxura falikorik». Haren aburuz, andre askorentzat «deserosoak» dira zakil itxura duten jostailuak. «Badugu bat pinguino itxura duena, pajarita eta guzti», kontatu du Alonsok aniztasunaren erakusgarri gisa. «Beste batzuek ile lehorgailu txiki baten itxura dute, eta ehundura eta kolore ugarikoak ere badira», erantsi du. Koloreen eraldaketari ere erreparatu dio Torrek: «Lehen, denak ziren arrosa edo urdin suabe kolorekoak, orain denetik aurki daiteke: zuriak, beltzak, ehundura ezberdinetakoak, marrazkitxoak dituztenak... hori ere bada aurrerapauso bat».

Azkartasuna, arrisku

Zentzu guztietan jarri du hankaz gora sexualitatea eta erotikaren ulerkera xurgagailuak, baina zenbait aldetan gabeziak ere nabari dizkiote adituek. Ormatzak eta Torrek ohartarazi dute «orgasmo azkarra» bultzatzen duela, plazer eredu hertsi eta jakin bat ezarriz. «Plazera hemen eta orain», Ormatzaren ustez. «Orgasmoak bi minutuan edukitzera ohitu gaitezke, eta gero frustrazioa sor dezake beste testuinguru batean denbora gehiago behar izateak», gehitu du Torrek. Are, egungo bizitza erritmoaren metafora eta paradoxa gisa ulertzen du Ormatzak. «Gauzak arin lortzeko presioa jartzen diogu geure buruari; eta era berean, horrek frustrazioa eta antsietatea sortzen ditu. Larrialdia eta pentsamendu kaotikoak errotik uxatzeko metodo gisa aurkeztu digute: jostailua hartu eta akabo arazoak».

Ormatzak bestelako soluziobidea proposatu du: «Agian, gauza gehiago ikas ditzakegu patxadaz eta geure buruari denbora emanez». Ildo beretik, Torrek ez idealizatzeko oharra ere egin du: «Ona da, bai, itxuran eta sortzen duen plazer motan aitzindaria da, baina nik uste dut gehiegizko ospea hartu duela». Are, hedapen faltsu baten arriskua ikusten du sexologoak: «Hainbestekoa da efektua non pentsaezina baita ez gustatzea, eta horrekin kontu handiz ibili beharra dago». Izan ere, sare sozialetako mezuetan, denda eta atari digitalen webguneetan, hedabideeetan edotan lagunen arteko elkarrizketetan; denetan hedatu da antzeko mezua: jostailu bikaina da.

Diskurtso horrek sor ditzakeen gaizki-ulertuengatik kezkatuta daude adituak. Ormatzak dio «ia ezinezkoa» dela zerbait «denontzako» ona izatea. «Baina mezu guztiak dira positiboak». Erabiltzaile gisa ere mintzatu da Torre: «Niri gustatu zait, baina ez nuke esango munduko sentsaziorik onena izan denik». Izan ere , orokorkertzea arriskutsua izan daitekeela uste du: «Ez du zertan denontzako berdin eta ondo funtzionatu». Posible da gustuko ez izatea: «Hainbesteko sona izan du, non beharbada inor ez baita ausartzen esatera 'ba, niri ez zait gustatu'; hori ere aukera bat da».

Jostailuaren, eta oro har jostailu sexualen salmentaz harago, gailuen hedapen eta eztandak sexualitatea mintzagai bihurtzeko aukeraz jardun dira adituak. Ormatzaren aburuz, «beste tresna bat gehiago» balira bezala ulertu behar dira jostailu sexualak. «Aitzakia bat dira, probatzeko, gure buruekin eta besteekin berba egiteko; itaunak egin eta horien bidez gozatzea da garrantzitsuena».

Bat egin du hausnarketarekin Alonsok: «Aldagai berri bat da, sentsazio berriak frogatzeko eta ezagutzeko aukera bat». Gizartean eman diren aldaketekin bat eginez, jostailu sexualen merkatuaren egokitzapena hauteman du Alonsok. «Lehen gehienak sarketara bideratuta zeuden eta zakil itxura zuten, asko dibertsifikatu da merkatua». 25 urte pasatu dira Alonsok sexu denda ireki zuenetik, eta aukerak ugaritu besterik ez dira egin, haren ustez. Klitori xurgagailuez gain, geroz eta ugariagoak dira bestelako formak dituzten bibradoreak, bola txinatarrak edota gizonen masturbaziorako arrautza sintetikoak. Are, gizonentzako xurgagailuak merkaturatzen hasi da Satisfayer.

Jostailuen aukeretan nola, bezeroen profilak ere bilakaera izan du Alonsoren dendan. «Oraingo erosleak askoz ere pluralagoak dira, esango nuke emakume gehiago datozela egun; 1994an, denda ireki nuenean, hori pentsaezina zen». Gizartearen beraren sintoma. «Aldarri bihurtu da emakumeon sexualitatea, kalean dago, eta mugimendu feministak izugarrizko lanketa egin du», hala uste du Ormatzak. Eta aldarri hori lehen pertsonan egin da. «Egia esan, beti hitz egin izan da emakumeen sexualitateaz, baina orain guk esaten dugu zer gustatzen zaigun eta zer ez, hor egin da urratsik handiena», zehaztu du Torrek. Bide horren sintoma bat gehiago da klitori xurgagailuaren bolada.

Ormatzak argi du jostailuak batzuentzat negozio bide besterik ez diren arren, badagoela hori beste era batera lantzeko parada. «Zenbaitek dirua besterik ez du ikusten, baina guk balia ditzakegu tramankulu horiek sexualitatean sakontzeko; betiere euren menpeko bihurtu gabe». Torrek azaldu du norbera dela bizitzen dituen sentsazioen jabe, eta ez teknologia. «Burmuina da dugun armarik boteretsuena; autoezagutza analogikoa da inportanteena».

Landu gabe dagoena

Tiraka hasteko helduleku berria aurkeztu dute jostailu sexualek, baina oraindik ere badago zer egin. Alonsok esan du sexu heziketa falta handia dagoela. «Prebentziora bideratzen dira eskoletan haurrei eta gazteei ematen zaien informazioa, sexuaren inguruko mezu negatiboak jasotzen dituzte». Kontrako noranzkoan jardun nahi du hark, sexua «dibertigarri» aurkeztuz. Torrek ere hutsune bera identifikatu zuelako sortu zuen Arseroticas izeneko bloga, «sexualitatea ikuspegi feministatik» landu nahian. «Jaso dugun sexu heziketa penagarria da, naturaltasunez jardun behar dugu sexualitateaz eta erotismoaz».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna