Hamar urteren buruan, Espainia prozeduratik at

Berria -

2019ko ekainak 6
2009. urtean, Jose Luis Rodriguez Zapatero gobernuburu zela, Espainiaren aurkako zigor prozedura zabaldu zuen Europako Batzordeak, 2007an %1,8ko superabita izatetik 2008an %4,4ko defizit publikoa izatera igaro zelako. Krisiak diru sarrerak jaitsi zituenez, EBko kide gehienek gainditu zuten defizitaren %3ko muga, eta prozeduran sartu zituzten. Baina haietako inork ez ditu hamar urte egin Bruselaren begiradapean, inoiz iritsi ez den zigor baten arriskupean. Frantzia izan du gertuen, bederatzi urterekin.

2009an jo zuen goia Espainiaren defizitak —%11— eta lau luzapen eskatu behar izan ditu, kontu publikoak txukundu ezinik ibili delako. Azkenean, iaz lortu zuen %3ko langatik jaistea: BPGaren %2,5eko desoreka izan zuen, agindutako %2,2aren gainetik, baina nahikoa Bruselak zerrenda beltzetik ateratzeko. Atzo eskatu zuen, eta baliteke datorren astean onartzea finantza ministroek.

Prozeduratik at geratu arren, Europako Batzordearen begiradapean geratuko da Espainia, eta jada ohartarazi dio diru sarrerak handitu beharko dituela defizita berriro gora ez egiteko, eta zorra %97tik behera jaisteko. Aldi berean, aurpegiratu dio behin-behineko kontratu gehiegi egitea, eta pobrezia maila handia izatea, batez ere haurren artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna