Noiz sortua: 2019-05-22 00:30:00

Jagoba Arrasate. Osasunako entrenatzailea

«Hasiberria naiz aulkian, eta igoera mugarria da niretzat»

Osasunak gogotik ospatu du igoera azken bi egunetan, eta Arrasate izan da festaren izarretako bat. Nafarren teknikaria «pozik» dago jasotzen ari den laudorioekin, baina meritua talde osoarena dela deritzo.
IÑIGO URIZ / FOKU Tamaina handiagoan ikusi

Eñaut Agirrebengoa -

2019ko maiatzak 22
Zoriona, gozamena, eta «buruko min apur bat». Ospakizun handien ohiko osagaiak dira horiek, eta, astelehenaz geroztik, bere larruan bizi izan ditu Jagoba Arrasatek (Berriatua, Bizkaia, 1978). Behar bezala dastatu nahi du Osasuna Espainiako Lehen Mailara igo izana, oraindik etorkizunari askorik erreparatu gabe. Hori bai, bere burua eta taldea prest ikusten ditu elitean taxuzko lana egiteko.

Osasunarekiko zaletasunak eztanda egin du igoerarekin. Nola ari zara bizitzen ospakizunak?

Eromena ari da izaten. Denbora askoan egin dugu lan hau lortzeko, eta orain gorputzari libre utzi behar zaio, topera gozatzeko. Une gogoangarriak ari gara bizitzen. Oilo ipurdia jarri zait zaleek eginiko harrerarekin. Hau ezin daiteke diruz ordaindu.

Huts egindako hainbat aukeraren ondoren jaso duzue saria. Apur bat urduritzen hasiak zineten?

Inguruan izan da nolabaiteko urduritasuna edo presa, baina guk ez dugu nabaritu. Lasai egon gara. Hori bai, egia da lortzen duzunean nolabaiteko eztanda moduko bat sentitzen duzula barruan. Orain ikaragarri ari gara gozatzen. Uste dut ondo merezia dugula.

Denboraldi erabat biribila osatu duzue. Hasierako gorabeherak kenduta, dena nahieran atera zaizue.

Bai, eta oraindik erronka polit bat gelditzen zaigu: Bigarren Mailako txapeldun bihurtzea. Helburu nagusia lorturik dago, noski, baina ilusio handia dugu denboraldia ligako lehen postuan bukatzeko. Jardunaldi ugari daramatzagu bertan, eta uste dut sari hori ere merezi dugula. Beraz, ez pentsa azken hiru jardunaldietan galga sakatuko dugunik.

Askorentzat, zu zara talde honen arrakastaren giltzarria. Ospakizunetan etengabeak izan dira zuri eginiko kantuak. Nola ikusten duzu zuk?

Nik ez nuke izen propioez hitz egingo. Sekulako taldea dugu, jatorra eta lehiakorra. Familia baten gisakoa gara, eta ni ez nintzateke pertsona bakarraren lanarekin geldituko. Hori bai, abestiak asko eskertzen ditut, finean nire lanaren aitortza baitira. Etxean ere abesten didate; ezin dut deskonektatu!

Zure ustez, zein da marka historiko guztiak gainditu dituen taldearen sekretua?

Sadar, inolako zalantzarik gabe. Partida ia guztiak irabazi ditugu bertan, eta horrek asko lagundu digu. Gaizki egon garenetan, berpiztu egin gaitu Sadarrek; eta ondo egon garenetan, berriz, aurkariei are abantaila handiagoa ateratzeko baliatu dugu. Iruñean jokatzea ia amesgaiztoa izan da talde gehienentzat. Ikaragarri gozatu dugu gure zaleen aurrean. Badakigu oso zaila izango dela halako bolada bat errepikatzea.

Zure estiloa ezin hobeto barneratu dute jokalariek, eta talde ausart, sendo eta ikusgarri bat sortu duzue. Entrenatzaile gisa, oso harro egoteko modukoa da, ezta?

Hasieran zalantza batzuk izan nituen, batez ere emaitzak ez zirelako onak izan. Baina jokalariek sinistu egin dute gure proposamenean, eta, azkenean, talde oso fidagarria bilakatu gara. Edozein egoeratara moldatzen jakin dugu. Ezin dezaket gehiago eskatu.

Osasunaren igoera zure ibilbideko lorpenik garrantzitsuena dela esan daiteke?

Bai, hala uste dut. Oraindik hasiberria naiz aulkian, eta hau mugarria da nire ibilbidean. Aurrez gauza politak lortu ditut, baina hau berezia da. Sekulakoa da Osasuna bezalako klub historiko bat Lehen Mailara eramatea.

Bigarren Mailan lau urte behar izan dituzu talde bat elitera igotzeko. Atzera begira, nola ikusten duzu azken sasoietan egin duzun bidea?

Maila oso zaila da hau, eta arrakasta lortzeko, oso ondo ezagutu behar duzu. Ni esperientzia pixkanaka bilduz joan naiz. Hiru urte eman nituen Numantzian, asko ikasi nuen bertan, eta orain sari potoloa lortu dut Osasunan. Talde ikaragarri ona nuen nire esanetara, eta halako jokalariekin, askoz ere errazagoa da arrakasta lortzea.

Iruñera iritsi zinenean norbaitek esan izan balizu hiru jardunaldiren faltan Lehen Mailan izango zinetela, erotzat joko zenukeen?

Helburua ez zen igoera, eta halako sasoi bat izatea pentsaezina zen. Talde irmo bat osatzea zen asmoa, ondo lehiatu eta zaleekin berriz ere bat egiteko. Batasun giroa hasiera-hasieratik egon da, eta hori funtsezkoa izan da guretzat. Harmailek babes ikaragarria eman digute.

Aurrera begira jarrita, prest ikusten duzu Osasuna Lehen Mailan lehiatu eta egonkortzeko?

Proiektu lehiakorra sortu nahi dugu. Ez zaigu aski maila nagusira heltzearekin; hor urte askoan iraun nahiko genuke. Baina buruko min horiek izango ditugu geroago. Orain lortutakoa dastatzeko eta ospatzeko tarte bat hartu behar dugu.

Eta zeure burua ere prest ikusten al duzu berriro elitean jarduteko?

Ilusio handia daukat entrenatzaile gisa. Urtetik urtera hobera goaz talde teknikoa osatzen dugun kideak, eta gogoz gaude urrats hori egiteko. Badakigu datorren denboraldia oso zaila izango dela, baina denok gure onena emanez gero, lortuko dugu helburua, orain lortu dugun moduan.

Albiste gehiago

Apirilaren 2an eguneratua, 13:00etan. ©BERRIA

Koronabirusaren azken datuak

Berria

Euskal Herrian 10.022 gaixok eman dute positibo koronabirusaren proba eginda. 555 hil dira. COVID-19 gaitza izandako 2.459 pertsonari eman diete alta. Grafikoak, albiste barruan.

EHUko ateak, Gasteizen, itxita. / ©Raul Bogajo, Foku

Baxoko azterketarik ez dute egingo

Berria

Baxoa kontrol jarraikiaren bidez egingo dela esan du Jean Michel Blanquer Frantziako Hezkuntza ministroak. Hala ere, frantseseko ahozko azterketa mantentzea erabaki dute -lizeoko bigarren urteko ikasleek pasa beharko dute-. Jaurlaritzak ez du baztertzen unibertsitatetan aurrez aurreko klaseei ekitea berriro, nahiz eta Espainiako Unibertsitate ministroak nahiago duen ikasleak ez itzultzea ikasgeletera. Eusko Jaurlaritzak «autonomia» defendatu du. NUPek ere ez du erabakirik hartu oraindik.

Herri Urrats, iaz. ©GuiIlaume Fauveau

Bertan behera utzi dituzte Herri Urrats, Ibilaldia eta Araba Euskaraz

Oihana Teyseyre Koskarat

Udaberrian egitekoak ziren ikastolen aldeko jaiak ez dira egingo, baina beste garai batean egitea aztertzen ari dira.

Baxoa egiten ari den ikasle bat, artxiboko irudi batean ©Isabelle Miquelestorena

Kontrol jarraikiaren bitartez ebaluatuko dituzte baxoa eta brebeta pasatzen dituzten ikasleak

Oihana Teyseyre Koskarat

Unibertsitateko ikasleen kasua ez du zehaztu Jean Michel Blanquer Hezkuntza Ministroak, baina esan du datozen egunetan emango dituela azterketen nondik norakoak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna