Ibilera bizkortu nahian

Ligan abiadura galdu dute Osasunak eta Realak. Izan ere, nekez irabazi dute partidarik azkenaldian: nafarrek azken zortzi lehietatik bakarrean lortu dute sari nagusia, eta gipuzkoarrek lau jardunaldi daramatzate garaipenik ospatu gabe. Hala, gauzak zaildu egin zaizkie goiko postuen borrokan: Osasunari lausotzen ari zaio Europarako sailkatzeko ametsa, eta Realak kolokan du Txapeldunen Ligarako sailkatzea. Bada, garaipen suspergarriak lortzen saiatuko dira gaur, Vila-Realen (16:15, Movistar) eta Elxen aurka (16:15, Dazn).

Gorritxoek alde batera utzi nahi dute azken partidetan epaileen erabakien harira sortu den zalaparta. Era berean, Espainiako Kopako lehia erabakigarriarekin ere ez dute arretarik galdu nahi, geroz eta gertuago dagoen arren. Puntuak hirunaka behar dituzte ligan, salbazioa albait azkarren lortzeko, eta Europari begira segitzeko. Urrats handia egingo lukete Sadarren Vila-real menderatuko balute. Jardunaldia Europako postuetan hasi du Quique Setienen taldeak, eta nafarrak puntu bakarrera hurbil dakizkioke.

Horretarako, gol faltari irtenbidea topatu beharko diote Jagoba Arrasateren jokalariek. Izan ere, ligako azken 11 partidetan sei gol sartu dituzte bakarrik, eta horietatik hiru Sevillari sartu zizkioten. Bi jardunaldi daramatzate baloirik sareratu gabe, eta erasoan hutsune garrantzitsua izango dute gaur, Aimar Oroz zigortuta baitago. Ruben Peña, berriz, lesiotik osatzen ari da oraindik.

Reala, zauriak miazkatzera

Teknikari gorritxoak gogotsu dakusa taldea. «Etxean jokatu eta irudirik onena emateko ilusio handia dugu. Gainera, hobeto sentituz eta puntu gehiagorekin joan nahi dugu geldialdira». Vila-real Konferentzia ligatik kanpo geratu zen ostegunean, baina aurkari gaiztotzat du Arrasatek «Beti dute baloia, eta deseroso sentiarazi behar ditugu».

Realari ere bukatu zaio Europako bidaia, eta orain, ligako jardunari buru-belarri lotzea dagokio. Lau garaipen kateatu zituen Munduko Koparen ostean, baina azken zazpi neurketetatik bat baino ez du irabazi. Hala, Atletico Madrilen aurrea hartu dio sailkapenean, eta laugarren postua ere ez du ziurra, orpoz orpo jarraika baitu Betis; hiru puntu eskasera dauka. Bada, aukera ona izango du gaur azkenaldiko nahigabeak ahaztu eta bide onera itzultzeko, Elxen, azkenaren aurka.

Osasuna ez ezik, Reala ere antzu dabil erasoan. Ez zen gauza izan Erromari golik egiteko, eta ligan, bi aldiz bakarrik zulatu du aurkarien atea azken lau partidetan. Golarekin adiskidetzen saiatuko dira gaur Imanol Alguacilen jokalariak, zaleen babesean. Merino eta Carlos Fernandez ezingo ditu zelairatu teknikari txuri-urdinak, zigorra bete behar baitute. Bestalde, minez jarraitzen dute Aritz Elustondok eta Sadiqek. «Nahitaez» irabazteko lehia da, Imanolen ustez. Baikorra da aurrera begira: «Azken hamabi partidetan, gehi Erromaren aurkako bietan egin duguna egiten badugu berriro, ez dut kezkatuta egoteko motiborik».