Albistea entzun

Baten agintea, bestearen ezina

Unai Lasok aise menderatu du Erik Jaka, Labriten. Nafarra lehendabiziko tantoetatik nagusitu da kantxan, eta finalerdietarako sailkatu da. Erik Jaka deseroso aritu da une oro
Laso aldeko tanto bat ospatzen, eta Jaka, atzean, kontrako aldartean, atzo Labriten biek jokatu zuten partidan.
Laso aldeko tanto bat ospatzen, eta Jaka, atzean, kontrako aldartean, atzo Labriten biek jokatu zuten partidan. IDOIA ZABALETA / FOKU Tamaina handiagoan ikusi

Jon Ander De la Hoz -

2022ko maiatzak 1

Unai Laso gozotik ari da. Bizkarreta-Gerendiaingoak (Nafarroa) bere garai onaren beste erakustaldi bat egin zuen atzo, Labriten. Baikoko aurrelaria aise nagusitu zitzaion enpresa bereko Erik Jakari (22-5), Buruz Buruko Txapelketako final-laurdenetako ligaxkako bigarren jardunaldiko partidan. Hasi eta buka, nagusi izan zen garailea, eta neurketak aurrera egin ahala apaldu zen hasierako ikusmina. Lasoren ahalaren adinakoa izan zen Jakaren ezina.

Izan ere, norgehiagoka desorekatua izan zen Iruñekoa. Hasieran soilik izan zen berdindua. Behin markagailuak binakoa adierazi eta gero, Lasok aurrerako urratsa egin, eta nahieran agindu zuen jokoan. Aurrelari nafarraren joak uxatu zuen ziurgabetasuna. Tantoak bata bestearen atzetik kateatu, eta garaipenaren bidean jarri zen.

Garaileak 34 minutu behar izan zituen final-laurdenetako bigarren garaipena erdietsi eta finalaurrekoetarako sailkatzeko. Lehen partidako garaipena atzoko erakustaldia gehituta, bere hautagaitza aurkeztu du jada.

Lasok hamahiru tanto egin zituen jokoan, eta beste bost, sakez. Azken horretan hobetzea zuen xede, eta lortu zuen: «Egia esan, zaila da partida hobea egitea. Eroso sentitu naiz kantxan. Eskuinarekin dena gozatu dut. Izugarri pozik nago egindako partidarekin; ezin dut gehiago eskatu», esan zuen neurketa amaitu berritan.

Aldiz, Erik Jaka gozakaitz aritu zen neurketa osoan. Ez alferrik, Lasoren jokoaren mende aritu baitzen une oro. Ez hori bakarrik; aukera eduki zuenetan ere ez zuen asmatu. Kontuak horrela, aho bizarrik gabe onartu zuen kontrarioaren nagusitasuna: «Lehenik eta behin, Unairena [Laso] goraipatu behar dut. Buruz buru ikusi dudan erakustaldirik handiena izan da. Gain hartuta sentitu naiz. Gero, neure aldetik, pilotakada batzuetan aukera eduki dut, baina ez dut asmatu».

Jakak Iñaki Artola izango du hurrengo aurkaria, eta ezinbestean irabazi behar du partida, baldin eta finalaurrekoetarako sailkatuko bada: «Ondo egin beharko dugu lan. Ea horrelako arratsalde bat izaten dudan; lortuz gero, 22 tantoak ez ditut urrun izango».

Ezkurdiak, jokatu gabe

Labriteko partidak osatu du maila nagusiko buruz buruko jarduna, aste honi dagokionez. Hasieran, Azpeitian (Gipuzkoa) jokatzekoa zen Joseba Ezkurdiaren eta Jokin Altunaren arteko partida, baina bertan behera utzi dute, Altunak minduta ditu eskuak; hortaz, Ezkurdiari eman diote garaipena, araudiak hala adierazten duenez gero (22-0). Gauzak horrela, jaialdi horren trukean, Eibarren jokatuko dute beste bat, gaur arratsaldean (17:00, ETB 1).

Promozio mailako bi neurketa jokatuko dituzte Astelena pilotalekuan: Egiguren V.a-Alberdi, eta Elordi-Alberdi. Tartean, Irribarria eta Tolosa Peio Etxeberriaren eta Martijaren aurka ariko dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

«Golden zirkuituan hirugarren amaitzea amesten dut»

Unai Ugartemendia

Bi urte bakarrik daramatza mendi lasterketak korritzen Alonsok, baina onenen mailan lehiatzen ari da. Sinetsi ezinda dago asteburuan Mont Blanceko maratoia irabazi ostean.
 ©BERRIA

Aldaketari zentzua

Julen Etxeberria

Gaur hasiko da Italiako Giroa. Euskal ziklista bakarra ariko da: Eukene Larrarte tolosarra. Lehen aldia du: «Hau nahi nuen Bizkaia-Durangora etorri nintzenean, eta lortu dut».
Maialen Garcia partida batean, Espainiako selekzioarekin. ©RFEH

Onenen artean onenak

Iñigo Lasa

Bihar hasiko da belar hockeyko munduko txapelketa. Terrassan eta Amsterdamen jokatuko da. Maialen Garcia donostiarrak podiumera igo nahi du bigarren aldiz.
 ©MAIALEN ANDRES / FOKU

«Ideia bat ondo transmititzeko, sentitu egin behar da aurrena»

Iñaki Berastegi

Atzerrian entrenatzen jarraitzeko asmoa du oraindik San Josek. Eskaintza bat onartzeko, klubaren historiari begiratzen dio aurrena, eta taldearen analisi bat ere egiten du. Gero, taldeko zuzendaritzari aurkezten dio analisi hori.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...