Albistea entzun

Hamar urte, bestela ospatzen eta bizitzen

Baionako besta alternatiboek hamar urte bete dituzte aurten, eta ospakizunen ospakizuna egin zuten atzo Patxa plazan, besta herrikoi, euskaldun eta parekidea posible dela aldarrikatzeko.
Gazteek antolatutako herri bazkarian lagun ugari bildu ziren atzo.
Gazteek antolatutako herri bazkarian lagun ugari bildu ziren atzo. BOB EDME Tamaina handiagoan ikusi

Garbine Ubeda -

2017ko uztailak 30 - Baiona

Kale masifikatuen aldean arnasgunea zen Patxa plaza atzo, Gazte Egunaren barruan. Zentzu askotan izan ohi da arnasgune. Batetik, irekitze fisiko bat sumatzen delako iritsi orduko; karrika estuetan barrena egin behar delako bidea, musika estiloen nahas-mahasari eta uholde zuri-gorriei aurre eginda. Bigarrenik, bestelako filosofia batez erantzun nahi izaten diotelako festetako eroaldiari, urterik urte.

Bake moduko bat eskaintzen duen espazio horretan, beraz, besta alternatiboen hamargarren urteurrena ospatu zuten atzo. Herri bazkariarekin hasi baino lehentxeago bildu ziren festazaleak, txarangei jarraikiz batzuk, egarria ase beharrean beste batzuk; eta gehientsuenak txartela erosi eta toki ona ziurtatzera, Ema Gratien, Kamila Gratien eta Maialen Duguine garaztarrek egin zuten gisan. Baionako gazteen lanari sostengua emateko asmoz heldu ziren bazkarira, ekinaldi alternatiboak «merezi duelako», eta hor izaten den giroa «beste inon aurkitzen ez delako». Mahaian jarriak zituzten adiskideak; besteak beste, Kuartz taldeko bateria eta gitarra jotzailea, garaztarrak haiek ere.

Otorduaren kalitatea laborarien elkarteak bermatu zuen, iaz bezala Xaho kaian ezarritako txokotik eraman baitzituzten axoa eta pastak, «jada prestaturik», gazte batzarreko kide Lili Hiriartek aipatu bezala, «lanik ez hartzeko, berotu besterik». Hiriarten hitzetan, «toki ireki, plurala eta sanoa» lortzea zen helburua, «eraso sexistarik eta bestelako erasorik gabekoa». Era berean, «euskal musikari eta euskal taldeei tokia uztea». Alde horretatik, lau kontzertu programatu zituzten Gazte Eguneko arrats eta gauerako: Aldiz, Xiberoots, Kuartz eta DJ Naughty J.

Gazte Egunari bestelako balioak eman asmoz sortutako ekinaldiak bide oparoa egin du hamar urteotan. Egun, bost egunerako ontzen dute egitaraua, eta bi txosna eta agertoki handi bat izaten dute lagungarri. Lili Hiriartek dioenez, gazte batzarreko kideak «harrituta» daude, asteazkenetik larunbatera «Patxa plaza bete egin delako zinez».

Gaur, preso eta iheslarien aldeko elkartasunak hartuko du Patxa plaza.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / @FOKU

«Galtzen ari den lan bat azaleratu nahi dut»

Enekoitz Telleria Sarriegi

Ontzi bat da, esamolde bat da, eta arrantzalearen azalean jarri nahi bat da 'Axalian'. Izen hori jarri dio Ortolaizek Zarauzko Photomuseumen paratu duen erakusketari: «Mundu eder bat da itsasoa».
Jon Mirande, eskuinean, Bretainiar Elkartearen Saria ekitaldian, 1969. ©Z / EZEZAGUNA

De viris illustribus: Jon Mirande bretainiarra

Miel A. Elustondo

Euskaraz baino lehen ikasi zuen bretoieraz Jon Mirandek Parisen. Euskaldunak lagun egin baino lehen, bretainiarrak egin zituen adiskide. «Gazte haien karra! Askok ez zekiten haurretatik beren herriaren hizkuntza, baina ikasi zuten eta bretoieraz ari dira beti. Guk, aldiz...», idatzi zuen. Goulven Pennaod bretainiarrarena dugu jakilegoa, Txomin Peillenek 1976an bildua.

 ©MARISOL RAMIREZ / FOKU

«Zorroztasuna funtsezkoa da kazetaritzan»

Urtzi Urkizu

Arabako, Bizkaiko eta Gipuzkoako kazetarien elkargoko dekano eta Euskal Kazetarien Elkarteko presidente izendatu dute Goikoetxea. Dioenez, kazetariek baldintza onak behar dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.