Albistea entzun

KRITIKA. Antzerkia

Hiru gorputz elur gainean

Agus Perez -

2019ko urriak 29

'Zaparrada-Avalancha'

Zuzendaria: Agurtzane Intxaurraga. Koreografia, eszena zuzendaritza eta soinua: Igor Calonge. Dantzariak: Agurtzane Intxaurraga, Myriam Perez, Noemi Viana. Lekua: Igorreko Lasarte aretoa. Eguna: Urriak 26.

Hiru gorputz agertu dira paisaia elurtu batean, hiru emakume elur gainean etzanda, eta eboluzio geldoei ekin diete hirurek oso berezia egin zaigun musika inguratzaile baten pean. Zaparrada - Avalancha dantza lanaren esku-programari begiratuta, ikusten dugu Hika taldearen ekoizpena izan dela, baina Igor Calongek hartu duela zuzendaritza. Egiaz, koreografia ere egon da bere ardurapean eta, bere beste lanetan bezala, berak hautatu ditu dantza girotzeko eta emozioak zein balizko kontakizuna bideratzeko behar zen soinu-banda.

Kasu honetan, Deaf Center bikote musikari norvegiarra izan da oinarri nagusia, eta haien soinuen hoztasun teknologikoa eta dentsitate ia sinfonikoa oso egokiak suertatu dira proposamen eszeniko dantzatuak esan behar zuena portu onera eramateko. Izan ere, bere harmonia ez lausoak integratuta zetozen harmonia handiago baten osotasunean, eta, giro iragarle trinkoa sortzeaz gain, ederto jaso dute proposamenaren beraren izpiritua.

Oso era geldoan hasi da dena, eta berdin jarraitu du emanaldi osoan zehar, koreografoa lurralde izoztuetan sartu izanak hango izaki isolatuen abiadura ere jelatu izan balu bezala. Une jakin batean, hiru dantzarietariko batek, zilarrezko soineko batekin agertu eta fusil bat atera du elur azpitik, baina horrek ere bat egiten zuen Calongeren hautuarekin; hau da, gu guztiok ere pertsonaia haien inguru oniriko, desolatu eta estrainioetan murgiltzearekin.

Dantza alorrekoa izan da emanaldia, dudarik ez, baina nolabaiteko antzerki ukitua ere izan du, era ia antzemanezinean. Fusilaren agerpenaren ostean ildo bereko beste zantzu batzuk etorri dira. Zilarrez jantzitako pertsonaia ileorde horail batekin agertu da batzuetan, eta benetako ilearekin besteetan, haize bolada hotzei bere bakardadetik aurre eginez; bitartean, beste dantzari biek kontraste estetiko nahiz sinbolikoa sortu dute behegainetik egindako eboluzio paraleloekin, eta noizbehinkako duelu dantzaturen batekin. Ez dut ulertu, ordea, zertara zetorren bien arroparen diseinu itxuragabea, ez bazen bestearekiko larregizko dotorezia kontrastea sortzearren. Dantzaren arloan, hobe da gauzak fin iradokitzea, agerikoegi egitea baino.

Bitartean, leunki areagotu da misterioa, eta une jakin batean konturatu naiz isiltasun sentsazioa nagusitzen zela, soinu-banda une oro entzuten zen arren. Kontu horietan datza, nik uste, dantzaren magia. Horietan eta proposamenak planteatu dizkigun itaunetan: Nor izan da zilarrezko emakume enigmatikoa? Nor ziren harengandik hurbil igarotzen ziren eskiatzaile geldoak? Haren bakardadea nabarmentzeko elementu hutsak ote? Eta, batez ere, noren edo zeren transposizioa zen azken eszenako piztia hila?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ana Cristina Barragan zinemagile ekuadortarraren 'La piel pulpo / Octopus Skin' filmak itxiko du saila. ©Donostiako Zinemaldia

Barragan, Beristain, Giroud, Guzman eta Lechuga, Horizontes saria eskuratzeko lehian

Ainhoa Sarasola

Mariano Biasin, Fabian Hernandez, Juan Pablo Gonzalez, Carolina Markowicz, Manuela Martelli, Valentina Maurel eta Andres Ramirez Pulido zinemagileen lehen lanek osatuko dute Donostiako 70. Zinemaldiko Horizontes Latinos saila.
 

Bazka musika taldeko kideak: ezkerretik eskuinera, Erik Berganza baxu jotzailea, Fer Apoa abeslaria, Hogei Esteban gitarrista, Txomin Urriza gitarrista eta Galder Izagirre bateria jotzailea. ©GALDER IZAGIRRE

Bederatzi dantza, baso ilunean

Miren Mujika Telleria

Bazka taldeak lehen diskoa ondu du: 'Basoaren ilunean dantza'. Poesia egin dute bederatzi doinu bortitzen gainean, eta horien bidez adierazi dituzte gaur egungo gizarteak eragindako zenbait zauri

Atzo arratsaldean egin zuten opera antzeztuaren entsegua. Irudian, entsegatzen. ©ANDONI CANELLADA/ FOKU

Euskal erako Donizetti bat

Leire Perlines Apalategi

Gaetano Donizettiren 'La Fille du Régiment' egokitu bat taularatuko dute bihar Kursaalean. Elena Sancho-Pereg eta Xabier Anduaga lehen aldiz ariko dira elkarrekin oholtzan

Carmen Alba, Joaquin Calderon eta Paz Fernandez, atzo, Iruñean. ©IÑIGO URIZ / FOKU

55 film lehiatuko dira NIFF Nafarroako zinema jaialdiaren 4. aldian

Itsaso Jauregi

Datorren astean izango da festibala, abuztuaren 17tik 20ra. Antzerki Eskolan, Kondestablearen jauregian eta katedralean emango dituzte filmak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...