Trump eta Kim, bigarrenez eskua emanda

Ameriketako Estatu Batuetako (AEB) presidente Donald Trump eta Ipar Koreako lider goren Kim Jong-un bigarrenez elkartu ziren atzo, oraingoan Vietnamgo Hanoi hirian. Prentsaren aurrean egindako adierazpenean, bi agintariak baikor agertu ziren bien arteko bigarren bileraz, batez ere desnuklearizazioaren inguruko eztabaidaz. AEBetako presidenteak adierazi zuen goi bilera «arrakastatsua» izango dela —gaur amaituko da—, eta Kimek eskerrak eman zizkion Ipar Korearekin hizketan hasteko «erabaki ausarta» hartzeagatik.